هــــه‌واڵ كــوردى
كوردستان جواو دويا لێدوان عبادى داره‌وه‌و خوه‌شاڵيشه‌ وه‌ كلكردن مووچه‌

كوردستان جواو دويا لێدوان عبادى داره‌وه‌و خوه‌شاڵيشه‌ وه‌ كلكردن مووچه‌


شه‌فه‌ق نيوز/ حكومه‌ت هه‌رێم كوردستان، جه‌خت له‌وه‌ كرد ك حه‌يده‌ر عبادى سه‌رۆك حكومه‌ت عراقى له‌ كۆنگره‌ى رووژنامه‌گه‌رى هه‌فتانى چه‌ن مه‌سه‌له‌يگ له‌باره‌ى هه‌رێم باسكردگه‌و وتگه‌ بيجگه‌ مه‌يلكردن ئه‌را چاره‌سه‌ر كيشه‌يل له‌بان مێز گفتگوو و دوير له‌ كاردانه‌وه‌ى ميديايى، له‌يوا دوينێد ك خواسته‌ جواو بڕيگ له‌ لايه‌نه‌يل ئه‌و قسه‌يل عباديه‌ بيه‌ێده‌و.

 

له‌ى باوه‌ته‌و، سه‌رۆكايه‌تى حكومه‌ت هه‌رێم له‌ به‌ياننامه‌يگ ئه‌را(شه‌فه‌ق نيوز)وت: له‌باره‌ى ده‌سه‌وه‌ركردن مووچه‌ێ كارمه‌نده‌يل هه‌رێم، حكومه‌ت خوه‌شاڵێ خوه‌ى ده‌رئه‌خا وه‌ ده‌سپيشخه‌رى عبادى ئه‌را ته‌ئمينكردن بودجه‌ له‌لايه‌ن حكومه‌ت ناوه‌نديه‌و.

 

جى باسه، به‌ياننامه‌گه‌ هه‌ميش وت: عبادى وه‌ گومانه‌و قسه‌ كردگه‌ له‌باره‌ى شماره‌ى ئه‌و كارمه‌نده‌يله‌ ك مووچه‌ وه‌رئه‌گرن له‌ هه‌رێم و حكومه‌ت هه‌رێميش ئاماده‌س ئه‌را ده‌رخستن گشت به‌يانه‌يل و زانياره‌يليگ ك پشت وه‌ تۆمار سيستم بايۆمه‌ترى تايبه‌ت بووه‌سێد وه‌ ناو ئه‌وانه‌گ مووچه‌ وه‌رئه‌گرن له‌ هه‌رێم و نمايشى بكريه‌ێد له‌بان ليژنه‌ى تايبه‌تمه‌ند له‌ حكومه‌ت ناوه‌ندى ئه‌را دقه‌تكردنى و هه‌ر وه‌و خاتريشه‌ به‌ياننامه‌گه‌ داوايش له‌ عبادى كرد چه‌ويگ بخشنێده‌ خشته‌ى تايبه‌ت وه‌ مووچه‌يل تايبه‌ت كارمه‌نده‌يل هه‌رێم ك مانگانه‌ ته‌نيا 334 مليار دينار ئه‌را گشت مووچه‌داره‌يل ته‌رخان كرياگه، يه‌يش له‌‌وه‌ختيگ ئه‌و بڕه‌ داراييه‌ ك حكومه‌ت هه‌رێم هه‌وه‌جه‌ى ئه‌كا ئه‌را دابه‌شكردن مووچه‌ مانگانه‌ ئه‌ڕه‌سيده‌ 897 مليار و 500 مليۆن دينار.