هــــه‌واڵ كــوردى
حكومه‌ت هه‌رێم كوردستان دويا ئامار قوربانيه‌يل ئێزيدى ئاشكرا كرد

حكومه‌ت هه‌رێم كوردستان دويا ئامار قوربانيه‌يل ئێزيدى ئاشكرا كرد


شه‌فه‌ق نيوز/ وه‌ڕيه‌و‌به‌رایه‌تی گشتى كاروبار ئێزدیه‌يل له‌ وه‌زاره‌ت ئه‌وقاف و كاروبار ئاینیی له‌ حكومه‌تى هه‌رێم كوردستان، له‌ راپۆرتيگ دويا ئامار قوربانيه‌يل كورده‌يل ئێزيدى وه‌ده‌س تاوانه‌يل داعش له‌  3 /8/2014 تا رووژ ئمڕوو ئاشكرا كرد.

 

وه‌ گووره‌ى ئاماره‌يل وه‌ريه‌وبه‌رايه‌تيه‌گه‌ ئه‌وه‌ ده‌ركه‌فت ك شماره‌ى كورده‌يل ئێزيدى له‌ عراق نزيكه‌ى 550 هه‌زار كه‌س بويه‌ وه‌گووره‌ى ئاماره‌يل له‌لاى نه‌ته‌وه‌يل يه‌كگرتگ.

 

يه‌يش ئاماره‌يل وه‌ڕيه‌و‌به‌رایه‌تی گشتى كاروبار ئێزدیه‌يله‌ له‌ وزاره‌ت ئه‌وقاف و كاروبار ئاینیی له‌ حكومه‌تى هه‌رێم كوردستان له‌بان شماره‌ى قوربانيه‌يل كورده‌يل ئێزيدى وه‌ده‌س داعش:

 

- شماره‌ى ئاواره‌يل له‌ئاكام په‌لاماره‌يل داعش نزیكه‌ى 360 هه‌زار كه‌س.

- شماره‌ى شه‌هيده‌يل هه‌ر له‌ يه‌كه‌م رووژ په‌لاماره‌گه‌ ره‌سيه‌ 1293 كه‌س.

- شماره‌ى ئه‌و مناڵه‌يله‌ ك بى باوگ كريان، 1759 مناڵ.

- شماره‌ى ئه‌و مناڵه‌يله‌ ك بى دايگ كريان، 407 مناڵ.

- شماره‌ى ئه‌و مناڵه‌يله‌ ك بى باوگ ودايگ كريان، 359 مناڵ.

- ئه‌و مناڵه‌يليشه‌ باوگ و دايگيان له‌لايه‌ن داعشه‌و رفيانه‌، 220 مناڵ.

- جه‌م گشتى مناڵه‌يل يه‌تيم ره‌سيه‌سه‌ 2745 مناڵ.

- شماره‌ى قه‌ورسانه‌يل وه‌جه‌مه‌ له‌ شه‌نگاڵ ك تائيسه‌ ئاشكرا كريانه‌، 68 قه‌ورسان وه‌جه‌مه، يه‌يش بيجگه‌ ده‌يان قه‌ور ته‌نيا ته‌نيا.

- شماره‌ى ئه‌و شوون و مه‌زارگه‌يله‌ ك له‌لايه‌ن داعشه‌و ته‌قيانه‌سه‌و، 68 مه‌زارگه‌س.

- شماره‌ى ئه‌وانه‌گ كووچ وه‌ره‌و ده‌يشت وڵات كردنه‌ زياتره‌ له‌ 100 هه‌زار كه‌س.

- شماره‌ى رفياگه‌يل 6417 كه‌س، ك 3548 له‌ليان ئافره‌ت و 2869 له‌ ره‌گه‌ز نير بوين.

- شماره‌ى ئه‌وانه‌گ تويه‌نريا قورتار بكريه‌ن له‌ده‌س داعش وه‌ى جووره‌ بوێ: 3300 ئافره‌ت، 1150 پیاگ و 337 منداڵ.