هــــه‌واڵ عــیراق
عراق له‌ كه‌مترين په‌لاماره‌يل تيرۆريستى و داعشيش له‌ كزترين رووژه‌يلێ

عراق له‌ كه‌مترين په‌لاماره‌يل تيرۆريستى و داعشيش له‌ كزترين رووژه‌يلێ


شه‌فه‌ق نيوز/ تازه‌ترين ئامار ناوده‌وڵه‌تى ئه‌را ئاشتى، ئاشكراى شماره‌ى كرده‌وه‌يل تيرۆريستى و قوربانيه‌يل ساڵ گوزه‌يشت كرد له‌چوارچێوه‌ى هه‌وڵه‌يل تيرۆريستانه‌ى ريكخرياگ داعش و واينه‌يلێ له‌ سوريا و عراق.

 

ئه‌و ئاماره‌ ك له‌لايه‌ن ده‌زگاى ئابوورێ و ئاشتيه‌و ئه‌نجام دريا، ئه‌وه‌ ده‌رخست شماره‌ى په‌لاماره‌يل له‌ 2017 وه‌ ريژه‌ى 27 له‌سه‌د داوه‌زيه‌ وه‌ به‌راورد وه‌ل ساڵ 2016، وه‌لێ شماره‌ى قوربانيه‌يل ره‌سيه‌سه‌ 18 هه‌زار و 814 كوشياگ.

 

ئه‌را سێيه‌مين ساڵه‌ له‌شوون يه‌ك، شماره‌ى كوشياگه‌يل له‌ئاكام كاره‌يل تيرۆريستى له‌ جه‌هان روێ له‌ داوه‌زين كردگه‌، ئه‌ويش ك له‌ساڵ 2014 جوور ئه‌وه‌گ ده‌زگاگه‌ باسى كرد به‌رزترين ريژه‌يگ تۆمار كردگه‌.

 

ده‌زگاى ناوبرياگ له‌ راپۆرتيگ ئاماژه‌ وه‌ شماره‌ى كوشياگه‌يل كرد له‌ ئۆرپا، ك له‌ساڵ 2017 داوه‌زيه‌ ئه‌را 81 كه‌س، وه‌لێ له‌ساڵ 2016 ره‌سيه‌ 168 كوشياگ. باس له‌وه‌يش كرد ك شماره‌يل سه‌ره‌تايى له‌ 2018يش ئاماژه‌ وه‌ داوه‌زين كردنه‌ وه‌ل تۆماركردن كه‌متر له‌ 10 كوشياگ له‌ ئۆرپاى رۆژئاوا له‌ مانگ يه‌ناير تا مانگ ئوكتۆبه‌ر.

 

جى باسه‌، راپۆرته‌گه‌ ناو په‌نج ده‌وڵه‌ت بردگه‌ ك كوشتار فريه‌ له‌تيان بويه‌ له‌ئاكام په‌لاماره‌يل تيرۆريستى له‌ 2017، ك ئه‌وانيش پيكهاتنه‌ له‌ ئه‌فغانستان و عراق و نه‌يجيريا و سوماڵ و سوريا.