هــــه‌واڵ كــوردى
مه‌سعود بارزانى: له‌ناوبردن كورده‌يل فه‌يلى سه‌ره‌تاى هه‌وڵ تاواننه‌وه‌ى ملله‌ته‌گه‌مان بوێ

مه‌سعود بارزانى: له‌ناوبردن كورده‌يل فه‌يلى سه‌ره‌تاى هه‌وڵ تاواننه‌وه‌ى ملله‌ته‌گه‌مان بوێ


شه‌فه‌ق نيوز/ مه‌سعود بارزانى سه‌رۆك پارت ديموكرات كوردستان وت: له‌ناوبردن وه‌جه‌م كورده‌يل فه‌يلى زه‌خميگه‌ ساڕێژ نادێ له‌ جه‌سه‌ێ ملله‌ت كورد.

 

بارزانى له‌ بروسه‌كه‌يگ ئه‌را كۆنگره‌يگ ك وه‌زاره‌ت شه‌هيده‌يل و ئه‌نفالكرياگه‌يل له‌ حكومه‌ت هه‌رێم كوردستان و ريكخرياگ"پيشتكو" ئه‌را كورده‌يل ده‌يشت هه‌رێم له‌ هه‌ولێر سازێ كرد وه‌ بوونه‌ێ له‌ناوبردن وه‌جه‌م كورده‌يل ك له‌لايه‌ن مه‌حمود محه‌مه‌د قسه‌كه‌ر وه‌ناو پارتى له‌جياى خوه‌نرياوه‌، وت:

ئاماده‌بويه‌يل رێزدار له‌ مه‌راسيم 39يه‌مين ساڵياد له‌ناوبردن وه‌جه‌م كورده‌يل فه‌يلى.. ده‌سخوه‌شى له‌لێدان ئه‌كه‌م ئه‌را ريكخستن ئى مه‌راسيمه‌و ئوميد سه‌ركه‌فتن ئه‌رادان ئه‌خوازم.

 

ملله‌ت كوردستان وه‌ گشت پێكهاته‌يلى، مێژوويگ پڕ له‌ ژان ديرێد، له‌ناوبردن وه‌جه‌م كورده‌يل فه‌يلييش سه‌ره‌تايگ بوێ ئه‌را هه‌وڵه‌يل تاواننه‌وه‌ى ملله‌ته‌گه‌مان و يه‌كيگ بوێ له‌و زه‌خمه‌يله‌ ك ساڕێژ نادێ له‌ جه‌سه‌ێ ملله‌ته‌گه‌مان و ئه‌و زوڵم و جه‌وره‌ ك هاته‌ تويشيان هويچ وه‌ختيگ نه‌بايه‌د له‌ هويره‌و بچێد.

 

هه‌رچه‌نى ملله‌ته‌گه‌مان تويش تاوانه‌يل نامرۆيى هات، وه‌لێ خوه‌ى وه‌ده‌سه‌و نه‌ياو وه‌رده‌وام بوێ له‌ روێ وه‌ڕوێ بوينه‌وه‌ى زوڵم و سته‌م ك ده‌رهه‌قمان ئه‌نجام دريا و مێژوو رزگاريخواز ملله‌ته‌گه‌يش شايه‌ته‌ له‌بان ئه‌وه‌گ كورده‌يل فه‌يلييش به‌شدارى كاريگه‌ر داشتنه‌ له‌ قوناغه‌يل جياجياى خه‌بات له‌بان گشت ئاسته‌يل و هه‌زاران شه‌هيد دانه‌ له‌وه‌رخاتر ئازادى و مافه‌يل ره‌وا بيجگه‌ به‌شدارييان له‌ شۆڕش ملله‌ته‌كان و پشتگيريكردنيان له‌لێ.