ڕاپــۆرت تایبـه‌ت
ويرانه‌يليگ شوونه‌وارى له‌ناو موزه‌خانه‌ى موسڵ له‌ سه‌ندن نايه‌ن

ويرانه‌يليگ شوونه‌وارى له‌ناو موزه‌خانه‌ى موسڵ له‌ سه‌ندن نايه‌ن


شه‌فه‌ق نيوز/ ئه‌تويه‌نێد سه‌ردان موزه‌خانه‌ى موسڵ بكه‌ێد له‌ى ماوه‌يله‌ له‌ڕى كونايگ له‌ بنمێچ  ئه‌و باڵه‌خانه‌ ك تويش ويرانكارى و دزى هات وه‌ده‌س چه‌كداره‌يل ريكخرياگ ترۆريستى داعش ك له‌ حزه‌يران 2014 ده‌سڵات گرتنه‌ بان شاره‌گه‌.

 

له‌ ناوه‌و تيه‌ريكى فريه‌يگه‌و ويرانه‌ىفريه‌يگيش جه‌م بويه‌ وه‌تايبه‌ت له‌ پارچه‌ شوونه‌واره‌يل ئاشوورى ك وه‌ده‌س داعشه‌يه‌يل ويران كريانه‌و كوتكوته‌و بوينه‌.

 

هيزه‌يل عراقى ئاشكراى ئازادكردن باڵه‌خانه‌ى ئه‌و موزه‌خانه‌ كرد له‌ڕى پيشڕه‌ويكردنى له‌ ديم خوه‌رئاوا له‌ شاره‌گه‌ له‌چوارچيوه‌ى هه‌ڵمه‌يل سه‌ربازى ئه‌را قاوداين چه‌كداره‌يل ريكخرياگ ترۆريستى داعش له‌موسڵ له‌ باكوور وڵاته‌گه‌.

 

هاوردنه‌وه‌ى ئه‌و موزه‌خانه‌يشه‌ سه‌ركه‌فتنيگ ره‌مزى بوى.

 

ريكخرياگ داعش له‌ شووبا/ فبرايه‌ر 2015 گره‌ ڤيديۆيگ بڵاو كرد و له‌ه‌ى بڕيگ له‌ چه‌كداره‌يلى په‌لامار ئه‌و موزه‌خانه‌ دان ك پارچه‌ شوونه‌واره‌يلى ئه‌وه‌نه‌ نرخدار بوين له‌ سه‌ندن ناتيان و ويرانينان كردن له‌ڕى كه‌ره‌سه‌يل حه‌فركردن.

 

ئمڕوو ئه‌و موزه‌خانه‌ وه‌ ته‌مامى ويران بويه‌و هويچ چشتيگ له‌تى وه‌ ساق و سه‌ڵامه‌تى نه‌مه‌ندگه‌.

 

ناو هۆڵ ئه‌و باڵه‌خانه‌ى تيه‌ريكيشه‌ پڕه‌ له‌ كوچگ كه‌ڵه‌كه‌ كرياێ له‌و شوونه‌ ك گه‌شتياره‌يل سه‌رسام بوين وه‌پى له‌وه‌ختيگ سه‌ردانى كرديان و چه‌ويان كه‌فتياده‌ گاى ئاشوورى باڵدار ك روخسار و سيماى له‌ شيوه‌ى ئاده‌ميزاد بوى.

 

وه‌ گووره‌ى قسه‌يل له‌يلا ساڵح وه‌پرس له‌بان باڵه‌خانه‌يل شوونه‌وارى له‌ موسڵ ئه‌وه‌ ده‌ركه‌فت ك دو په‌يكه‌ر وه‌ به‌رزى دو مه‌تر  و كيش فيشتر له‌ 4 ته‌ن بوينه‌ و له‌ناونى ويرانه‌يل بوينه‌و له‌يوا دياره‌ ك پايه‌يل و باڵه‌يليان مه‌ندگه‌ وه‌ل پارچه‌يليگ شوونه‌وار تر ك نه‌خشه‌و پيته‌يل لاتينى بزمارى وه‌پيانه‌و بويه‌.

 

له‌ناوڕاس ئه‌و ويرانه‌يله‌، كونايگيش هه‌س وه‌ره‌و نهۆم خوار، ك چشته‌يليگ ئاسنين دياريگيش هه‌ن له‌ چشته‌يل بنه‌ڕه‌تى باڵه‌خانه‌گه‌.

 

وه‌ل ئه‌وه‌يشا له‌ناونى وه‌خته‌يليگيش باڵه‌خانه‌گه‌ له‌رزيه‌ێده‌و تووز له‌لى به‌رزه‌و  بوود هه‌ناى ك هيزه‌يل عراقى وه‌ مووشه‌ك بنگه‌يل ريكخرياگ ترۆريستى داعش بوردمان ئه‌كه‌ن.

 

له‌ نهۆم يه‌كه‌م، قه‌ناس وه‌ده‌سيگ له‌ پشت ده‌روه‌چه‌ى پويچگيگ خوه‌ى حه‌شار داگه‌و هه‌وڵ چه‌وديريكردن چه‌كداره‌يل ريكخرياگ داعش كردياد له‌ مه‌سافه‌ى نزيكيگه‌و.

 

مه‌مله‌كه‌ى ئاشوور و نه‌ينه‌واى پايته‌ختى، ك حاڵ حازر وه‌پى ئويشن موسڵ له‌ باكوور وڵات ناونى دوچه‌مان، يه‌كيگ له‌ وه‌هيزترين ئمبراتۆريه‌ت خوه‌رهه‌ڵات ناوين كويه‌ن بوى.

 

ساڵح باس له‌وه‌يش كرد و وت: بيجگه‌ په‌يكه‌ر گاى باڵداريش، شيريگيش باڵدار وجوود داشت و باس له‌وه‌يش كرد ك ئه‌و هه‌رسێ په‌يكه‌ره‌ گومبويه‌ له‌ناونى پارچه‌ شوونه‌واره‌يل تر بوينه‌ له‌ موزه‌خانه‌گه‌.

 

ساڵح يه‌يش خسته‌ڕوێ ك موزه‌خانه‌گه‌ سه‌دان پارچه‌ى تر شوونه‌وارى گرته‌سه‌ خوه‌ى، وه‌لێ ته‌نيا 6 پارچه‌ له‌ليان ره‌سه‌ن بوينه‌.

 

باسيش له‌وه‌ كرد و وت: ئه‌و په‌يكه‌ره‌يله‌ ك كيشيان 4 ته‌ن بويه‌ دزيكردنيان مه‌حاڵ بويه‌و هه‌ر وه‌و خاتريشه‌ له‌ شوون خوه‌يان ويران كريانه‌.

 

ريكخرياگ ترۆريستى داعش باوه‌رڕى ئه‌وه‌سه‌ ك ويرانكردن شوونه‌واره‌يل فه‌ريزه‌يگ ئايينيه‌، چوينكه‌ بتن،  وه‌لێ ئى دعايه‌يليشه‌ نواگيرى له‌لى نه‌كرد له‌ بازرگانيكردن وه‌ پارچه‌ شوونه‌واره‌يل له‌ بازاڕه‌يل.

 

دوياى ئه‌وه‌يش ساڵح وت: خاسه‌وكردن شوونه‌واره‌يل مه‌حاڵ نيه‌، وه‌لێ زه‌حمه‌ته‌ گشت پارچه‌ شوونه‌واره‌يل باريه‌نه‌و يا په‌يا بكريه‌ن.