وتـــــار
ئه‌را كورده‌يل فه‌يلى لايه‌نگر و سه‌ر وه‌ حزبه‌يل شيعه‌

ئه‌را كورده‌يل فه‌يلى لايه‌نگر و سه‌ر وه‌ حزبه‌يل شيعه‌


شه‌فه‌ق نيوز/ مه‌ردمان تر ك بازرگانى وه‌ كيشه‌يل كورد فه‌يلى بكه‌ن، ئه‌يه‌ مه‌سه‌له‌يگه‌ قه‌بولكردنى مومكنه‌ وه‌تايبه‌ت ك كورده‌يل فه‌يلى كاڵايگ قه‌بولكرياێ بوين ئه‌را بازاڕكردن له‌وه‌ختيگ حزبه‌يل شيعه‌و كورد دژ رژيم به‌عس خوينمژ بوين، وه‌ل ئه‌وه‌يشا بازرگانيكردن وه‌ كيشه‌گه‌يان وه‌رده‌وامه‌ دوياى ئه‌وه‌گ هه‌ردوگلا له‌ خه‌نده‌ق ئۆپۆزسيۆنه‌و جيواز بوين ئه‌را خيزانيگ قه‌وى له‌ ميوانخانه‌ى ئه‌لخه‌زراى خاوه‌ن مليۆن ئاساره‌، ئه‌ويش له‌وه‌ر ئه‌وه‌گ ده‌نگه‌يل ئه‌نتخابى بوين يا به‌شيگ بوين له‌ سوزه‌مه‌نى ئه‌را ميليشيايه‌يل شيعه‌ ك يه‌يش شايه‌ت قه‌بول بكريه‌ێد، وه‌لێ مه‌سه‌له‌ى ئه‌وه‌گ فه‌يلى قه‌بول بكا بدێده‌ كاڵايگ له‌بان رفه‌ێ حزبه‌يل وه‌ خواست پڕاوپڕێ، ئه‌يه‌ له‌يرا ئى مه‌سه‌له‌ هه‌وه‌جه‌ وه‌ ئه‌وه‌ ديرێد ئاده‌ميزاد هوير فريه‌يگ له‌لى بكا.

 

ناخوازم له‌ى باوه‌ت كوڵه‌ فه‌يليه‌يل دويره‌و بخه‌م له‌ لايه‌نگريه‌يل فكرى و تايفى و نه‌ته‌وه‌ييان، وه‌لێ ئه‌خوازم بخه‌مه‌يانه‌ وه‌رده‌م پرسياريگ ك گشت رووژيگ له‌ خوه‌يان ئه‌كه‌نه‌ى، پرسياريگ ك يه‌يش بويه‌سه‌ كاڵايگ تر وه‌ل ئه‌و هه‌مگه‌ تيه‌ڵى بازاڕكردنى، كاڵايگ ك مه‌ردمانيگ ئه‌خه‌نه‌ى بوخچه‌ جوور هه‌ر ده‌ڵاڵيگ تا مێز حزبه‌يل جيوه‌جيكار وه‌پى فه‌رش بكريه‌ێد له‌و حزبه‌يله‌ ك لايه‌نگرى ئه‌راى ديرن تا دوياخر وه‌ زه‌رده‌خه‌نگ يا وه‌ شكيانيگه‌و ده‌ربچێ، ك وه‌هه‌ر حاڵ واده‌يليگ بوينه‌سه‌ واده‌يل عه‌رقوب.

 

پرسياريگ قورس جوور قورسى ساڵه‌يل سه‌رگه‌ردانى فه‌يلى و پڕ له‌ژان جوور ژان داڵگه‌يل فه‌يلى و سزنه‌ر جوور ئه‌سر مناڵه‌يل فه‌يلى ك ئمڕوو گه‌ورا بوينه‌ دوياى ئه‌وه‌گ ئه‌و ئه‌سره‌يله‌ رووحيان سزان و ماڵئاوايى له‌ باوگ و برايه‌يليان كردن تا ئه‌به‌د و، پڕ كاره‌ساتيش جوور كاره‌سات دويه‌ته‌يل فه‌يلى ك ماڵئاوايى له‌ هاوسه‌ر و دووس و خوه‌شه‌ويسه‌يليان كردن وه‌ ئه‌سره‌يل بيده‌نگيگ له‌ ترس كه‌متاره‌يل به‌عس له‌ وه‌خته‌يل خوه‌ى.

 

پرسياره‌گه‌ ئه‌ى ريزداره‌يل ئه‌ندام و مه‌ردم و لايه‌نگر حزبه‌يل شيعه‌ ئه‌وه‌سه‌: كووا ته‌رم شه‌هيده‌يلمان؟ ده‌سڵاته‌يل ئه‌لخه‌زرا چه‌ كردن ئه‌را ده‌رخستن چاره‌نويسيان؟

 

بيلا له‌ دو مه‌سه‌له‌ى پڕ له‌ ئه‌هميه‌ت ياد فه‌يليه‌يل بكه‌يم و له‌ وه‌رجه‌ گشتيانيش ئه‌ندام و لايه‌نگر و مه‌ردم حزبه‌يل شيعه‌، يه‌كه‌ميان ئه‌وه‌سه‌ ئى حزبه‌يله‌ ك هانه‌ نك ده‌سڵات ده‌س نانه‌ بان ته‌نه‌يليگ له‌و به‌ڵگه‌يله‌ ك رژيم به‌عس هيشته‌يانه‌ جى، دويه‌ميش ئه‌وه‌سه‌ په‌يجوورى وه‌ل سه‌دان كه‌س گه‌وراى به‌عس و ئه‌ندامه‌يل ده‌زگايه‌يل ئاسايشى و هه‌واڵگرى كردن، ك ئايا مه‌عقوله‌ ناو جايه‌ڵ جوانه‌يل بيسه‌رو شوونكرياێ فه‌يلى له‌ هويچ به‌ڵگه‌يگ جوور ريواريگيش وه‌لاى تومه‌تباريگ به‌عسى له‌ وه‌ختيگ په‌يجوورى وه‌ليا كرياوێد!؟ يا په‌يجووريه‌يل ئاشكراى ئه‌و به‌عسيه‌يله‌ نه‌كردوێن ك ده‌سيان له‌ خوين شه‌هيده‌يل بوێد ك ئمڕوو به‌شيگن له‌ مه‌شهه‌د سياسى ك يه‌يش خوازيار وه‌ڕيكردن مه‌سه‌له‌گه‌ بوود!؟

 

ئه‌وه‌گ هيشته‌م ئى باوه‌ته‌ بنويسم، ئه‌و ئعلان وزاره‌ت وه‌رگرى عراقيه‌ بويه‌ له‌بان ته‌رخانكردن موكافئه‌يگ ئه‌را هه‌ركه‌سيگ زانيارى بيه‌ێد له‌بان ته‌رم كوه‌يتيه‌يل گومبوى له‌ عراق، يا له‌بان ماڵ و دارايى دزرياگ كوه‌يتى له‌وه‌خت داگيركردن ئه‌و وڵاته‌ له‌لايه‌ن عراقه‌و، وه‌ل ئه‌وه‌يشا وزاره‌ته‌گه‌ له‌ به‌يانه‌گه‌ى وت: ئه‌و عراقيه‌يله‌ ك هه‌ر زانيارييگ ديرين له‌بان ته‌رم عراقيه‌يل يا كوه‌يتيه‌يل يا ئيرانه‌يليگ ك بيسه‌رو شوونن له‌وه‌خت جه‌نگ ناونى عراق و ئيران و جه‌نگ كه‌نداو يا په‌يوه‌سه‌ وه‌ گومكرياگه‌يل ئه‌رشيف ميرايه‌تى كوه‌يتى و مومته‌لاكات كوه‌يتى، شايه‌تى بيه‌ێد له‌لاى لايه‌نه‌يل په‌يوه‌نديدار له‌ وزاره‌ته‌گه‌. به‌يانه‌گه‌ له‌لايگ تريشه‌و وت: وزاره‌ته‌گه‌ موكافئه‌ ئه‌را ئه‌و كه‌سه‌يله‌ ته‌رخان كردگه‌ ئى زانياريه‌يله‌ پيشكه‌ش بكا دوياى ئسپاتكردنى، وه‌لێ وه‌بى ئه‌وه‌گ جووره‌يل ئه‌و موكائفه‌ ئاشكرا بكا.

 

ئيسه‌يش ئايا پرسيار بكه‌م يا فه‌يليه‌يل پرسيار ئه‌كه‌ن له‌ لايه‌نگره‌يل و مه‌ردم سه‌ر وه‌ حزبه‌يل شيعه‌ى ده‌سڵاتدار له‌بان هووكار ئه‌وه‌گ ئى حزبه‌يله‌ تائيسه‌ خه‌ڵاتيگ دارايى ته‌رخان نه‌كردنه‌ ئه‌را ئه‌وانه‌گ زانيارى بيه‌ن له‌بان شه‌هيده‌يل بيسه‌ر وشوون و شيوازه‌يل له‌ناوبردنيان؟ ئايا جورئه‌ت ئى چشته‌ ديرن يا شه‌هيده‌يلمان بايه‌سه‌ بوونه‌ كاڵايگ له‌بان رفه‌ى پشتگووشخرياێ يا له‌ بوخچه‌ جوور ئه‌وه‌گ باسىه‌ كردم تا مه‌ردمانيگ جوور ده‌ڵاڵ ئه‌را ئى حزبه‌يله‌ هه‌ڵيبگرنه‌ بان شان ك له‌يوا كردنه‌ ئافره‌ته‌يلمان وه‌بى ده‌نگ بمرن و ته‌رم شه‌هيده‌يلمان له‌ علم غه‌يو بوود.

ئايا سوو ده‌ڵاڵه‌يلمان دوينيم داوا له‌ حكومه‌ت عراقى بكه‌ن مامڵه‌ وه‌ل بيسه‌رو شوونه‌يل فه‌يلى جوور بيسه‌رو شوونه‌يل ئيرانى و كوه‌يتى بكا، يا خوين ئه‌وان كه‌وه‌؟

زه‌كى ره‌زا