هــــه‌واڵ عــیراق
سه‌رچه‌وه‌يگ: عه‌بدولمهدى دامه‌زرانن حكومه‌ت وه‌ى قه‌وڵه‌ پيشكه‌ش وه‌ په‌رله‌مان ئه‌كا

سه‌رچه‌وه‌يگ: عه‌بدولمهدى دامه‌زرانن حكومه‌ت وه‌ى قه‌وڵه‌ پيشكه‌ش وه‌ په‌رله‌مان ئه‌كا


شه‌فه‌ق نيوز/ سه‌رچه‌وه‌يگ ئاگادار سياسى له‌ به‌غدا وت: عادل عه‌بدولمهدى سه‌رۆك وه‌زيره‌يل راسپارياێ ئه‌را دامه‌زرانن حكومه‌ت عراقى، ئه‌خوازێد ئه‌و وه‌خته‌ دياريكرياگه‌ كه‌مه‌و بكا ك درياگه‌ وه‌گووره‌ى ده‌ستوور ئه‌را دامه‌زرانن حكومه‌ته‌گه‌ێ و پيشكه‌شكردنى ئه‌را وه‌رده‌م په‌رله‌مان له‌وه‌ر وه‌ده‌سهاوردن متمانه‌.

 

رووژنامه‌ێ شه‌رقولئه‌وسه‌ت له‌ شماره‌ى ئمڕووى وت: عه‌بدولمهدى و ئه‌ندامه‌يل تيم كار تايبه‌تى بڕيار دانه‌ ك رووژ 24 له‌ى مانگه‌ نه‌دێده‌ دويا رووژ ته‌مامكردن دامه‌زرانن حكومه‌ت و چگن ئه‌را په‌رله‌مان، ئاماژه‌ وه‌يه‌يش كرد ك سه‌رۆك وه‌زيره‌يل راسپارياێ ده‌سكرده‌سه‌ وه‌رگرتن ناوه‌يل له‌ بڕيگ له‌ كوتله‌يل سياسى وه‌و مه‌رجه‌گ له‌ ماوه‌ى 4 رووژ تر ته‌مام ته‌سليمى بكا.

 

سه‌رچه‌وه‌گه‌ پرسيار ئه‌وه‌ كرد ك ئايا عه‌بدولمهدى سوودمه‌ن ئه‌دێ له‌وانه‌گ ناويان پيشكه‌ش كردنه‌ ئه‌را وه‌رگرتن پۆسته‌يل وه‌زارى له‌ڕێ پيشكه‌شكردن ئه‌لكترۆنى ك وازى كرد له‌وه‌ر خاتر پيشكه‌شكردن داواكاريه‌يل له‌ى باوه‌ته‌و، جواوه‌گه‌ى ئه‌وه‌ بوى ك سه‌رۆك وه‌زيره‌يل راسپارياێ ئى وه‌ى گامه‌ تويه‌نستگه‌ دو مه‌لويچگ وه‌ كوچگيگ بكوشێد، فشار هاورده‌سه‌ بان كوتله‌يل سياسى ئه‌را هه‌ڵه‌په‌ڵه‌كردن له‌ پيشكه‌شكردن ناو كانديده‌يليان، له‌ هه‌مان وه‌ختيش بنه‌مايگ له‌ زانيارى فره‌ خاس وه‌ده‌سهاوردگه‌ ئه‌را كه‌سه‌يل شاره‌زاو خاوه‌ن تايبه‌تمه‌ندى جياجيا ك ئه‌تويه‌نريه‌ێد نه‌ف له‌ليان وه‌ربگيريه‌ێد له‌ شوونه‌يل جياجيا له‌ ئاينده‌.