هــــه‌واڵ كــوردى
بريتانيا باس له‌ خاسسازى دارايى كوردستان كرد و راى خوه‌ى له‌باره‌ى خاڵه‌يل گومرگى ده‌رخست

بريتانيا باس له‌ خاسسازى دارايى كوردستان كرد و راى خوه‌ى له‌باره‌ى خاڵه‌يل گومرگى ده‌رخست


شه‌فه‌ق نيوز/ رێباز حه‌ملان وه‌زير دارايى و ئابوورى له‌ حكومه‌ت هه‌رێم كوردستان، پيشوازى له‌ بارونيس نيكلسۆن كلكرياگ تايبه‌ت سه‌رۆك حكومه‌ت بريتانى و شانده‌ ياوه‌ره‌گه‌ێ كرد ك پيكهات له‌ جون ويلكس باڵيۆز بريتانى له‌ عراق و مارتن وار باڵيۆز گشتى له‌ هه‌رێم كوردستان.

 

 وه‌زاره‌ته‌گه‌ له‌ به‌ياننامه‌يگ ئه‌را شه‌فه‌ق نيوز وت: كلكرياێ بريتانى باس سه‌ركه‌فتن هه‌رێم كردگه‌ له‌ په‌ڕينه‌وه‌ له‌ بارودوخ جاران و وه‌زاره‌ت دارايى و ئابوورى كوردستانى وه‌تايبه‌ت خاسسازيه‌يل وه‌رچه‌و و گه‌ورا ك له‌ماوه‌ى يه‌ك ساڵ ئه‌نجام درياگه‌ وه‌ل ئاسانكارێ ئه‌را كومپانيايه‌يل بريتانى.

 

به‌ياننامه‌گه‌ هه‌ميش وت: رێباز حه‌ملان ئاماژه‌ وه‌ په‌يوه‌نديه‌يل ئابوورى و دارايى له‌ناونى هه‌رێم و كۆمپانيايه‌يل بريتانى و پاڵپشتى حكومه‌تى بريتانى كردگه‌و باسيش له‌و خاسسازيه‌يله‌ كردگه‌ ك وه‌زاره‌ته‌گه‌ كرده‌سه‌ى له‌ بواره‌يل بانكه‌يل و ده‌روازه‌يل مه‌رزێ و ته‌ياره‌خانه‌و گومرگه‌يل و باجه‌يل.

 

جى باسه‌، به‌ياننامه‌گه‌ هه‌ميش وت: په‌يوه‌نديه‌يل ناونى هه‌ولێر و به‌غدا دويا ته‌وه‌ر ئه‌و ديداره‌ بويه‌ وه‌تايبه‌ت مه‌سه‌له‌ى لاوردن خاڵه‌يل گومرگى له‌ناونى هه‌رێم و به‌غدا و به‌ش كورد له‌ پرووژه‌ى ياساى بودجه‌ى عراقى و يه‌كه‌وخستن گومرگ له‌ناونى هه‌ردوگلا.