هــــه‌واڵ عــیراق
دو وه‌زير له‌ كابينه‌گه‌ێ عوبدولمهدى ئه‌كه‌فنه‌ وه‌ر پرس وپرسكارى

دو وه‌زير له‌ كابينه‌گه‌ێ عوبدولمهدى ئه‌كه‌فنه‌ وه‌ر پرس وپرسكارى


شه‌فه‌ق نيوز/ ده‌سه‌ێ پرس و پرسكارى و دادپه‌روه‌رى له‌ عراق ئاشكراى كرد ك دو وه‌زير له‌ حكومه‌ت عادل عه‌بدولمهدى ك هيمان ته‌واو نه‌ويه‌، ئه‌كه‌فنه‌ وه‌ر مه‌ترسى لاوردن، ئه‌ويش له‌وه‌ر ئه‌وه‌گ پۆست له‌ وه‌خت رژيم سه‌دام حسێن داشتنه‌.

 

ئه‌را جار دويه‌مه‌ له‌ ماوه‌ى هه‌فه‌يگ، په‌رله‌مان عراقى سه‌رنه‌كه‌فت له‌ ده‌نگداين له‌بان باقى ئه‌ندامه‌يل حكومه‌ته‌گه‌ێ عادل عه‌بدولمهدێ سه‌رۆك وه‌زيره‌يل ك شماره‌يان 8 وه‌زيره‌ له‌ جه‌م 22 وه‌زير.

 

فارس عه‌بدولستار مه‌ولا قسه‌كه‌ر وه‌ناو ده‌سه‌ى پرس وپرسكارى له‌ لێدوانيگ رووژنامه‌گه‌رى وت: ده‌سه‌گه‌ كتاويگ ئه‌را ئه‌نجومه‌ن نوێنه‌ره‌يل كلكردگه‌و شيه‌وكردن ته‌واويگ له‌بان هه‌ر يه‌ك له‌و 22 وه‌زيره‌ داگه‌و جه‌خت له‌وه‌يش كردگه‌ ك دو وه‌زير له‌ليان ئه‌كه‌فنه‌ وه‌ر رێ و شوون پرس و پرسكارى و ئى گاميشه‌ له‌وه‌ر ئه‌وه‌سه‌ نواگيرى له‌ هاتنه‌وه‌ى ئه‌و وه‌رپرسه‌يله‌ بكريه‌ێد ئه‌را حوكم ك پۆست داشتنه‌ له‌ رژيم سه‌دام حسێن.

 

جى باسه‌، قسه‌كه‌ر وه‌ناو ده‌سه‌ى پرس وپرسكارى، ئه‌و هه‌ردوگ وه‌زيره‌ ده‌سنيشان نه‌كرد، وه‌لێ وه‌رپرسيگ له‌ په‌رله‌مان ئه‌را ئاژانس رووژنامه‌ێ فره‌نسى وت: ئه‌و هه‌ردوگ وه‌زيره‌ پيكهاتنه‌ له‌: ئه‌حمه‌د عوبێدى وه‌زير وه‌رزش ولاوان و نه‌عيم روبه‌يعى وه‌زير په‌يوه‌نديه‌يل ك متمانه‌ى په‌رله‌مان وه‌ده‌سهاوردن له‌ 25 ئوكتۆبه‌ر گوزه‌يشت.