هــــه‌واڵ كــوردى
په‌مپيۆ له‌ هه‌ولێره‌و له‌باره‌ى هيزه‌يل كورد له‌ سوريا: مقه‌يه‌تى له‌ليان ئه‌كه‌يم

په‌مپيۆ له‌ هه‌ولێره‌و له‌باره‌ى هيزه‌يل كورد له‌ سوريا: مقه‌يه‌تى له‌ليان ئه‌كه‌يم


شه‌فه‌ق نيوز/ مايك په‌مپيۆ وه‌زير خارجيه‌ى ئه‌مريكى جه‌خت له‌وه‌ كرد ك وڵاته‌گه‌ى وه‌گشت توانايگه‌و هه‌وڵ مقه‌يه‌تيكردن هيزه‌يل كورد له‌ سوريا ئه‌ياد له‌ هه‌ر په‌لاماريگ ك توركيا ئه‌نجامى بيه‌ێد ئه‌را بانيان.

 

په‌مپيۆ ئه‌را رووژنامه‌نويسه‌يل له‌ هه‌ولێر ئه‌وه‌ ده‌رخست ك باس وه‌ل سه‌ركرده‌يل كردگه‌ له‌باره‌ى بڕياره‌گه‌ى دۆناڵد تره‌مپ ئه‌را كيشانه‌وه‌ى هيزه‌يل ئه‌مريكى له‌ سورياو هه‌رچه‌نى ره‌جه‌ب ته‌يب ئه‌ردۆغان ره‌خنه‌ى تونيگ له‌باره‌ى مه‌رجه‌يل كيشاننه‌وه‌ى ئه‌و هيزه‌يله‌ گرت وه‌تايبه‌ت له‌ مقه‌يه‌تيكردن جه‌نگاوه‌ره‌يل كورد له‌ سوريا، وه‌لێ وه‌زير خارجيه‌ى ئه‌مريكى وت: ئيمه‌ گفتوگوو وه‌ليانا ديريم و باس له‌وه‌ ئه‌كه‌يم چوين كاراى ئه‌و هه‌وڵه‌يله‌ بكه‌يم ئه‌را مقه‌يه‌تيكردن له‌ هيزه‌يل هاوپه‌يمانمان.

 

جى باسه‌، په‌مپيۆ دوياى سه‌ردانى ئه‌را به‌غدا و ديدارى وه‌ل عادل عه‌بدولمه‌هدى سه‌رۆك وه‌زيره‌يل و به‌رهه‌م ساڵح سه‌رۆك كۆمار و محه‌مه‌د حه‌لبوسى سه‌رۆك ئه‌نجومه‌ن نوێنه‌ريل، سه‌ردان هه‌ولێريش كرد و چه‌وێ كه‌فته‌ وه‌رپرسه‌يل حكومه‌ت هه‌رێم كوردستانيش.