هــــه‌واڵ عــیراق
شيعه‌يل عراق تويڕه‌ن له‌ فره‌نسا

شيعه‌يل عراق تويڕه‌ن له‌ فره‌نسا


شه‌فه‌ق نيوز/ داواكاريه‌گه‌ى ئيمانويل ماكرۆن سه‌رۆك فره‌نسى ئه‌را لاوردن حه‌شد شه‌عبى عراقى، كه‌فته‌ وه‌ر ره‌خنه‌يل تونيگ له‌لايه‌ن كه‌سايه‌تيه‌يل سياسى له‌ عراق و ئى داواكاريه‌ وه‌ ده‌خاڵه‌تيگ فره‌نسى له‌ كاروبار به‌غدا تاريف كردن.

 

ماكرۆن له‌وه‌خت ديدارى وه‌ل نێچێروان بارزانى سه‌رۆك حكومه‌ت هه‌رێم كوردستان له‌ پاريس، داواى داماڵين چه‌ك كرد وه‌تايبه‌ت له‌ حه‌شد شه‌عبى ك له‌ى ساڵه‌يل دوياخره‌ دامه‌زريا وه‌ل لاوردن ته‌دريجى گشت ميليشيايه‌يل.

 

له‌ى باوه‌ته‌و، هويچ كاردانه‌وه‌يگ له‌ حه‌يده‌ر عبادى سه‌رۆك وه‌زيره‌يل عراقى نه‌كه‌فته‌و، وه‌لێ له‌لايگ تره‌و نورى مالكى جيگر سه‌رۆك كۆمار قسه‌و ناڕه‌زايى له‌بان ئه‌و داواكاريه‌ ده‌رخست و له‌ ماڵپه‌ڕ كۆمه‌ڵايه‌تى نويسا: چشت ئه‌ڵڵاجه‌وييگه‌ سه‌رۆك فره‌نسى ده‌خاڵه‌ت له‌ كاروبار ناوخوه‌يى عراقى ئه‌كاو داواى لاوردن ده‌زگايه‌يل ياسايى ده‌سه‌ى حه‌شد شه‌عبى ئه‌كاو ئيمه‌يش ئى هه‌ڵويسته‌يله‌ له‌ فره‌نسا وه‌ تونى ره‌ته‌و ئه‌كه‌يم ك ده‌خاڵه‌ته‌ له‌ سه‌روه‌رى عراق و دام و ده‌زگايه‌يلى.

 

جى باسه‌، له‌لايه‌ن خوه‌ييشه‌و، هومام حه‌مودى جيگر سه‌رۆك ئه‌نجومه‌ن نوێنه‌ره‌يل له‌ به‌ياننامه‌يگ وت: عراقيه‌يل له‌يوا تماشاى كۆمه‌ڵگاى ناوده‌وڵه‌تى و له‌وانه‌يش فره‌نسا كرديان ك باس ئازايه‌تى ئه‌و جه‌نگاوه‌ره‌يله‌ بكه‌ن ك گيان خوه‌يان كردنه‌ قوربانى له‌جياى گشت تاكيگ له‌ى جه‌هانه‌، ك ئه‌گه‌ر حه‌شد شه‌عبه‌ى نه‌ويااد ريكخرياگ ترۆريستى داعش ره‌سياده‌ پاريس.