هــــه‌واڵ كــوردى
بارزانى له‌باره‌ێ راپرسى په‌ياميگ كاريگه‌ر دا ئه‌را جه‌هان

بارزانى له‌باره‌ێ راپرسى په‌ياميگ كاريگه‌ر دا ئه‌را جه‌هان


شه‌فه‌ق نيوز/ مه‌سعود بارزانى سه‌رۆك هه‌رێم كوردستان ره‌خنه‌ له‌وانه‌ گرت ك ناويان نا "وازيزانه‌يل ناوده‌وڵه‌تى" وه‌ ئه‌وه‌گ دژ راپرسى ماف بڕيار چاره‌نويس سه‌روه‌خوه‌يين له‌ عراق له‌ وه‌ختيگ باسيش له‌ يدموكراسيه‌ت ئه‌كه‌ن و هه‌ر وه‌و خاتريشه‌ داخداره‌ له‌وه‌گ به‌رژه‌وه‌ندێ ئه‌وانه‌ زاڵه‌ له‌بان داب ونه‌ريت و ئه‌خلاق و په‌يڕه‌وه‌يل ئنسانى و له‌وه‌ر ئه‌وه‌يش په‌ياميگ ئه‌را جه‌هان دا وه‌ ئه‌وه‌گ ملله‌ت كوردستان مردن له‌ ورسگێ وه‌پيان خاستره‌ له‌وه‌گ له‌ژير داگيركارى مه‌ردمان تر بمينن.

 

بارزانى له‌ ديمانه‌يگ وه‌ل رووژنامه‌ێ "فورن پۆليسى" ئه‌مريكى وت: ئيمه‌ ئه‌خوازيم ئى راپرسيه‌ ئه‌را سه‌روه‌خوه‌يى بدێ، ك يه‌يش كارێ ئه‌وه‌سه‌ ده‌سميه‌تمان بيه‌ێد له‌ چاره‌سه‌ر كيشه‌يل فريه‌يگ.

 

بارزانى وت: ئه‌گه‌ر ته‌ماشاێ هه‌وڵه‌يل وڵاته‌يل تر بكه‌ين ئه‌را سه‌روه‌خوه‌يى، گشت ئه‌وانه‌ كيشه‌ێ ناوخوه‌يى داشتنه‌و چه‌وه‌ڕێ گشت ئه‌و كيشه‌يله‌ نه‌كردنه‌و ئيمه‌يش چه‌وه‌ڕێ چاره‌سه‌ر ئه‌را گشت كيشه‌يگ ناكه‌يم وه‌رجه‌ بڕيار چاره‌نويسمان و هه‌ر وه‌و خاتريشه‌ راپرسى ئه‌كه‌يم و دوياخريش ئه‌و كيشه‌يله‌ له‌ وه‌خته‌يل تر چاره‌سه‌ر ئه‌كه‌يم.

 

جى باسه‌، بارزانى هه‌ميش وت: هه‌وڵ فريه‌يگ دايم ئه‌را مقه‌يه‌تيكردن له‌ يه‌كگرتگى عراق و په‌يوه‌نديمان وه‌ل عراق وه‌ قوناغ سه‌ره‌كى بوى، يه‌كه‌ميان وه‌ل دامه‌زرانن عراق له‌ شوون جه‌نگ يه‌كه‌م جه‌هانى و وه‌رده‌وام بوى 2003 و دويه‌ميش په‌يوه‌ندى ناونى هه‌ولێر و به‌غدا بوى ك ده‌سوه‌پيكرد و تائيسه‌يش وه‌رده‌وامه‌.

 

بارزانى وت: قوناغ يه‌كه‌م له‌ساڵ 1920 تا ساڵ 2003 ، نسيو كورد چه‌ بوى له‌ حوكم عراق؟ هه‌ڵمه‌ت ئه‌نفال و بوردمان كيمياوێ و ويرانكردن ئاوايه‌يليان و قه‌ورسانه‌يل وه‌جه‌م و له‌ناوبردن وه‌جه‌م بوێ ك فره‌يگ له‌ كورد له‌ى وه‌خته‌يله‌ په‌يوه‌ندى وه‌ل به‌غدا داشتن و قوناغ دويه‌ميش دوياێ  2003 به‌ش كورد چه‌ بوێ؟ بودجه‌گه‌ێ كه‌مه‌و كردن و پابه‌ند نه‌وين وه‌ ده‌ستوور عراقى، هه‌ر وه‌و خاتريشه‌ پرسيارمان ئه‌را وازيزانه‌يل ناوده‌وڵه‌تى ئه‌وه‌سه‌ جوور وڵاته‌يل يه‌كگرتگ و ئه‌وباقى تر: ئيمه‌ بايه‌سه‌ بكه‌يم؟

 

جى باسه‌، بارزانى هه‌ميش وت: ئيمه‌ وه‌ جددێ كار له‌بان داناين ده‌ستوور كرديم له‌ عراق ك شايه‌ت بدێده‌ زه‌مانه‌ت ئه‌را مافه‌يلمان و ده‌نگيش ئه‌را ئى ده‌ستووره‌ دايم، وه‌لێ ده‌ستوور وة جووريگ دقه‌ت له‌بان يه‌كێتى عراق ئه‌كا ده‌ستوور جيوه‌جى بكريه‌ێد، هه‌ر له‌وه‌ر ئه‌وه‌يش پرسيارم ئه‌رايان ئه‌وه‌سه‌: ئايا ده‌ستوور عراقى جيوه‌جى كرياگه‌؟ بيگومان نه‌خێر.