هــــه‌واڵ كــوردى
په‌رله‌مان و حكومه‌ت كوردستان تێبنى خوه‌يان له‌باره‌ى بودجه‌ ده‌رخستن

په‌رله‌مان و حكومه‌ت كوردستان تێبنى خوه‌يان له‌باره‌ى بودجه‌ ده‌رخستن


شه‌فه‌ق نيوز/ په‌رله‌مان و حكومه‌ت هه‌رێم كوردستان، باس له‌ ياساى بودجه‌ێ گشتى عراقى ئه‌را ساڵ ئاينده‌ى 2018 كردن و تاريفى وه‌ ئه‌وه‌ كردن ك ره‌شنويسيگ نائاشكراو ناده‌ستوريه‌.

 

سه‌رۆكايه‌تى په‌رله‌مان له‌ به‌ياننامه‌يگ وت: جه‌عفه‌ر ئبراهيم ئيمنكى جيگر سه‌رۆك په‌رله‌مان وه‌ ئاماده‌بوين بێگه‌رد تاڵه‌بانى سكرتێر په‌رله‌مان و ليژنه‌ى دارايى و كاروبار ئابوورى و وه‌به‌رهاوردن له‌ په‌رله‌مان دانيشتنيگ ساز كردگه‌ وه‌ل شاند حكومه‌ت هه‌رێم ك پيكهات له‌ هه‌ر يه‌ك له‌ ئامانج ره‌حيم سكرتێر ئه‌نجومه‌ن وه‌زيره‌يل هه‌رێم و رابه‌ر سديق بريكار وزاره‌ت دارايى و ئابوورى وه‌ وكاله‌ت.

 

به‌ياننامه‌گه‌ وت: جيگر سه‌رۆك په‌رله‌مان باس له‌ گرينگى وه‌رده‌وامبوين ريكخستن ناونى هه‌ردوگلا كردگه‌و جه‌خت له‌بان خواست چه‌وديرێ و له‌وه‌رچه‌وگرتن كاره‌يل حكومه‌ت كردگه‌و داوايش له‌ سه‌رۆك و ئه‌ندامه‌يل ليژنه‌ى دارايى و كاروبار ئابوورى له‌ په‌رله‌مان كردگه‌ گشت ره‌خنه‌ و تێبينى و پيشنياره‌يليگ ك ديرن له‌باره‌ى ره‌شنويس ياساى بودجه‌ى گشتى عراقى ساڵ 2018 ئاشكرا بكه‌ن وه‌خاتر زيايكردن و ده‌وڵه‌مه‌نكردن پرووژه‌ى هه‌رێم كوردستان ك بڕياره‌ گفتگوو له‌باره‌يه‌و وه‌ل حكومه‌ت عراقى بكا.

 

له‌لايه‌ن خوه‌ييشه‌و سه‌رۆك ليژنه‌ى دارايى و كاروبار ئابوورى له‌و دانيشتنه‌ باس له‌ خاڵه‌يل ناو ره‌شنويس ياساى بودجه‌گه‌ كرد و تاريفى وه‌ نائاشكراو ناده‌ستوورى كرد و وت: به‌شه‌يل هه‌رێم كوردستان له‌و ره‌شنويسه‌ گشتى وه‌ چه‌واشه‌س جوور دياريكردن 12.6 له‌سه‌د ئه‌را هه‌رێم كوردستان.

 

جى باسه‌، ئه‌ندامه‌يل شاند حكومه‌تيش خوه‌شاڵى و ئاماده‌گى خوه‌يان ده‌رخستن ئه‌را سازكردن ئيچنه‌ دانيشتنه‌يليگ و ئاماژه‌ وه‌ئه‌وه‌ كردنن ك بڕيگ له‌ بنه‌ماى به‌يانات شه‌فاف و ئاشكرايش وه‌ل خوه‌يانا ئاماده‌ كردنه‌ وه‌خاتر ئه‌وه‌گ گشتلايگ له‌لى بڕه‌سنه‌و له‌باره‌ى بودجه‌ى عراقى ساڵ 2018 و باس له‌وه‌يش كردن ك حكومه‌ت تێبينى و ره‌خنه‌يليگ ديرێد و راپۆرته‌يليگ له‌ى باره‌وه‌ ئاماده‌ كردگه‌.