وتـار شـه‌فـه‌ق
" ئايا ئى جاره‌ جواو پرسيار به‌يمنه‌و؟"

" ئايا ئى جاره‌ جواو پرسيار به‌يمنه‌و؟"


شه‌فه‌ق نيوز/ ئويشن ته‌نيا ڕيييگ ئه‌را ره‌سينه‌وه‌ له‌ مه‌رگ ئه‌وه‌سه‌ بمريد تا ماناى بزانێد! هه‌ر له‌وه‌ر ئه‌وه‌يش ئه‌و چشته‌گ هه‌ميشه‌ هايمنه‌ چه‌وه‌ڕيكردنى وه‌پيمان ناويشيه‌ێد و وه‌پيمان نادريه‌ێد، فه‌يليه‌يل خاس ئه‌زانن كه‌سيگ ك هه‌ناى يه‌تيم ئه‌دێ ئه‌را يه‌كجارى له‌ ژيانى، دى تا مه‌ندگه‌ هه‌ر يه‌تيمه‌.

 

له‌ هه‌ڵوژاردنه‌يل ئاينده‌ ئه‌گه‌ر جياييمان و تايبه‌تمه‌نديمان هووكاريگ نه‌دێ ئه‌را ركابه‌رى، ئه‌وه‌ بايه‌سه‌ له‌ بنه‌ڕه‌ته‌و به‌شدارى نه‌كه‌يم، ئمجا ئه‌نجامداين هه‌ڵه‌يل وه‌رين ئه‌دێده‌ هووكار زه‌ره‌دمان هه‌تاهه‌تاس.

 

له‌ى قوناغ ئيسه‌مانه‌ سه‌رناكه‌فيم له‌ مه‌يدان هووز و هووزايه‌تى، چوينكه‌ جوورايه‌تى هووزايه‌تيمان وه‌شيوه‌ى ته‌ماميگ خوه‌ى دا ده‌سه‌وه‌و هويچ قورساييگ ئه‌راى نه‌مه‌ند. له‌ڕوى ئابوورييشه‌و محوه‌ر قورسيگ نييم مقه‌يه‌تى له‌ هاوسه‌نگى بكه‌يم و له‌ سياسه‌تيش هويچ جموجويليگ نه‌يريم ا شماره‌ى ديارييگ بدێ له‌ناونى گشت ئى حزبه‌يل سياسيه‌.

 

ئه‌وه‌گ ديريمنه‌ى ته‌نيا كه‌سايه‌تيه‌يل سياسى و بازرگان و رووشنهوير و وه‌رزشكار و كه‌سايه‌تيه‌يل كۆمه‌ڵايه‌تيين، وه‌لێ وه‌شيوه‌ى تاك نه‌ك وه‌جه‌م! ئيمه‌ له‌ڕوێ وه‌پيمان ئويشن مه‌زه‌ويه‌يل په‌يوه‌سه‌و نه‌ته‌ويه‌يل جاڕس، وه‌لێ وه‌ بوونه‌ى مردن ده‌مار ژان و پابه‌نديه‌و بايه‌سه‌ ئه‌وه‌ بزانيم ك دوياى ماوه‌ى يه‌كگرتگى و دويرگرتن وه‌رده‌وام هه‌ڵه‌يلمان دوباره‌وه‌ ئه‌دێ، ئنكار و په‌رده‌پووشكردنيش چاره‌سه‌رمان نيه‌، كۆمه‌ڵگامانيش هه‌وه‌جه‌ وه‌ نه‌شته‌رگه‌رى قويل و هه‌ڵه‌په‌ڵه‌يگ ديرێد، وه‌لێ خاستر ئه‌وه‌سه‌ هويريش له‌وه‌ بكه‌يم ئى سه‌رده‌مه‌ بايه‌سه‌ ته‌واو بدێ، وه‌لێ نه‌ك له‌بان ريڕه‌و زه‌ره‌ده‌يل.

 

راسه‌ ئيمه‌ ئاماده‌ نه‌ويمن ئه‌را گشت ئه‌و مه‌ويسى و كاره‌ساته‌يله‌ ك هاته‌ تويشمان له‌ گوزه‌يشته‌ ك هويچ ده‌رفه‌تيگ ئه‌را وه‌رگرى له‌ خوه‌مان نه‌يشه‌و، دوياى ئه‌وه‌يش رۆڵيگ تر وه‌رگرتيم له‌وه‌گ رژيميگ دڕنده‌ جوور رژيم به‌عسى كوشتنمان ئاڵشت بكا وه‌ داوه‌زانن نه‌فره‌ت له‌بانمان و كووچ وه‌پيمان بكا، ئمجا رازييش بويمن ك بويمنه‌ قوربانى ئه‌و سه‌رده‌ميشه‌ نه‌ك وه‌ لايه‌نگرى.

 

عراق ئه‌و شوونه‌سه‌ ك هه‌زاران له‌تى كوشيه‌ێد تا ديكتاتۆر حوكم بكا له‌ ده‌سڵات و زاڵم وه‌رده‌وام بدێ له‌ زوڵمكردنى. ناتويه‌نيم جواو ئى پرسياره‌ به‌يمنه‌و دوياى چل ساڵ له‌ له‌ناوربردن وه‌جه‌ممان وه‌ئه‌وه‌گ ئه‌راچه‌ بايه‌سه‌ له‌بانمان بويمنه‌ نيشانه‌ى سته‌مديده‌يى و زه‌ردكرده‌؟!! بايه‌سه‌ له‌بانمان ئه‌وه‌ بزانيم ك چويچيان و پاشگه‌زبوينه‌وه‌ له‌ هه‌وڵ و خه‌بات وه‌خاتر هه‌ڵوژاردنه‌يل ئاينده‌ خاسترين ڕييه‌ ئه‌را ده‌سه‌وه‌ركردن زه‌ره‌د.

عه‌لى حسێن فه‌يلى