هــــه‌واڵ عــیراق
عبادى باس له‌ جه‌نگيگ تر دوياێ قوناغ داعش كرد

عبادى باس له‌ جه‌نگيگ تر دوياێ قوناغ داعش كرد


شه‌فه‌ق نيوز/ حه‌يده‌ر عبادى سه‌رۆك ئه‌نجومه‌ن وه‌زيره‌يل و سه‌ركرده‌ێ گشتى هيزه‌يل چه‌كدار، باس له‌وه‌ كرد ك جه‌نگيگ تر چه‌وه‌ڕێ عراق ئه‌كا دوياێ راوناين ريكخرياگ ترۆريستى داعش له‌ گشت خاكه‌يل عراق و باسيش له‌ خاسه‌وبوين بار ئابوورێ له‌ عراق كرد له‌ڕێ ره‌ته‌وكردن مه‌سه‌له‌ێ لاوردن حه‌شد شه‌عبى و تيكه‌ڵكردنى وه‌ل ده‌زگاێ ئاسايشێ.

 

عبادى له‌ وته‌يگ له‌ فيستيڤاڵ "فتوى النصر" ك له‌لايه‌ن تيم جه‌نگكه‌ر ئه‌لعه‌باس سه‌ر وه‌ حه‌شد شه‌عبى ساز كريا، وت: گشت ئاماده‌كارييگ ته‌مام كرديمنه‌ ئه‌را ئازادكردن قه‌زاێ ته‌لعه‌فه‌ر له‌ خوه‌رئاواێ موسڵ و ئاماژه‌ وه‌يه‌يش كرد ك كوتكردنيگ هه‌س ئه‌را به‌شداريكردن گشت لايه‌نه‌يل له‌ كرده‌وه‌يل ئازادكردن قه‌زاگه‌، ئه‌ويش له‌ ئشاره‌تيگ ئه‌را حه‌شد شه‌عبى.

 

عبادى وت: هه‌رچه‌نى جه‌نگ داعشيش داشتيم، وه‌لێ وه‌ل ئه‌وه‌يشا تويه‌نستيم بار ئابوورێ عراق خاسه‌و بكه‌يم و يه‌يش ده‌رخست ك قوناغ دوياێ ئازادكردن گشت خاكه‌يل له‌ژير ده‌سڵات ريكخرياگ داعش جه‌نگيگ تر هه‌س ك ئه‌ويش جه‌نگ يه‌كده‌نگييه‌.