هــــه‌واڵ كــوردى
وێنه‌.. ساڵياد له‌ناوبردن كورده‌يل فه‌يلى وه‌ئاماده‌بوين حكومى وناوده‌وڵه‌تى

وێنه‌.. ساڵياد له‌ناوبردن كورده‌يل فه‌يلى وه‌ئاماده‌بوين حكومى وناوده‌وڵه‌تى


شه‌فه‌ق نيوز/ شار هه‌ولێر چالاكيه‌يل فراوانيگ ئه‌را 38ه‌مين ساڵياد جينۆسايد كورده‌يل فه‌يلى گرته‌ خوه‌ى و ئه‌و چالاكيه‌يله‌ له‌ژير ناونيشان" هويچ رووژيگمان بى ياد شه‌هيد نيه‌ " ئه‌نجام دريا وه‌ سه‌رپه‌رشى وزاره‌ت شه‌هيده‌يل و ئه‌نفالكرياگه‌يل له‌ كوردستان و ريكخرياگ پيشتكوو ئه‌را كورده‌يل ده‌يشت هه‌رێم و وه‌ئاماده‌بوين شماره‌يگ له‌ وه‌رپرسه‌يل حكومى و حزبى و نوێنه‌ره‌يل بيگانه‌و شماره‌ى فريه‌يگ له‌ رووڵه‌يل پيكهاته‌گه‌.

 

ئه‌و چالاكيه‌يله‌ وته‌يليگ له‌لايه‌ن شماره‌يگ له‌ وه‌رپرسه‌يليش گرته‌ خوه‌ى وه‌ل پيشكه‌شكردن شيه‌وكردنيگ تايبه‌ت وه‌ بارودوخ پيكهاته‌ى فه‌يلى و سازكردن نمايشگايگ و پيشكه‌شكردن چالاكيه‌يليگ مۆسيقى.

 

له‌ى باوه‌ته‌و، مه‌حمود حاجى ساڵح وه‌زير كاروبار شه‌هيده‌يل و ئه‌نفالكرياگه‌يل له‌ حكومه‌ت هه‌رێم، وت: كورده‌يل فه‌يلى به‌شيگ ره‌سه‌نن له‌ ملله‌ت كوردستان، وه‌لێ جى داخه‌ تائيسه‌ مافه‌يليان وه‌رنه‌گرتنه‌ ك هه‌رچه‌نى دادگاى ناوه‌ندييش له‌ 2010 ئه‌وه‌گ هاته‌ تويشيان وه‌ له‌ناوبردن وه‌جه‌م تاريف كرد.

 

جى باسه‌، له‌لايه‌ن خوه‌ييشه‌و، عه‌لى حسێن فه‌يلى نوێنه‌ر كورده‌يل فه‌يلى له‌ په‌رله‌مان كوردستان له‌ خول وه‌رين، له‌ وته‌يگى ئه‌وه‌ ده‌رخست و وت: سه‌ده‌يگ له‌ زوڵم و چل ساڵ له‌ چه‌وه‌ڕى تا يه‌كه‌و بگرن له‌يه‌ك بوونه‌؟ ئايا چوين ساڵياد هه‌زاران شه‌هيد و سه‌دان هه‌زار له‌ ده‌ركرياگه‌يل يه‌كه‌و ئه‌گرن له‌ يه‌ك بوونه‌، هه‌ميش وت: ئيمه‌ له‌ ساڵه‌يل گوزه‌يشت له‌ وڵاتيگ بويمنه‌ زوڵم گرته‌ خوه‌ى ك چوين سالياد شه‌هيده‌يل كورد فه‌يلى وه‌ڕيبكه‌يم وه‌بى پرسه‌و نه‌ريت تايبه‌ت چه‌مه‌ريمان ئه‌را ئه‌و هه‌مگه‌ شه‌هيده‌يل و بيسه‌روشوونكرياگه‌يله‌ له‌ مه‌ده‌نيه‌يل جايه‌ڵ جوان ك له‌شوون ناديار وه‌خاك سپاريان؟.

 

فه‌يلى باس له‌ ديد هه‌رێم كوردستانيش كرد ئه‌را هه‌ڵكه‌فت ژيان كورده‌يل فه‌يلى و ئه‌وه‌گ هاته‌ تويشيان و چوين تويه‌نستن سه‌بر به‌ن ئه‌را ماوه‌ى سه‌ده‌يگ وه‌ ته‌مامى له‌ كه‌شيگ له‌ ره‌گه‌زپه‌رسى نه‌ته‌وه‌يى عه‌ره‌بى وه‌بى ئه‌وه‌گ له‌ناوى بتاويه‌نه‌وه‌و وت: ساڵه‌يل وه‌رين له‌ خاسترين حاڵه‌ته‌يليگ رى وڕه‌سم خوه‌نينه‌وه‌ى بڕيگ ئايات ساز كريا وه‌ل بڕيگ به‌يانات و وه‌شماره‌يگ له‌ باوه‌ته‌يل ئيكسپايه‌ر كوتايى وه‌پى هاتياد، ئه‌ويش له‌وه‌ر ئه‌وه‌گ حكومه‌ت ناوه‌ندى خوه‌ى وه‌ ميراتگر و قه‌ره‌بووكه‌ر ئه‌و كاره‌يله‌ نه‌زانست رژيم به‌عسى كردياده‌ى و هيمان تائيسه‌يش پابه‌ندى نه‌ته‌وه‌ييمان يه‌كلاوه‌ نه‌ويه‌ له‌ناونى هه‌رێم و به‌غدا ك وه‌ كرده‌وه‌ خاوه‌ن ئى دوسيه‌سه‌.

 

فه‌يلى پرسيار له‌وه‌يش كرد ك فه‌يليه‌يل هوير له‌لى ئه‌كه‌ن له‌ى بوونه‌و وت: ئايا هوير له‌ ئازادى ئه‌كه‌ن: ئيمه‌ هويچ وه‌ختيگ ئازاد نه‌ويمنه‌! ئايا هوير له‌ ئه‌مان ئه‌كه‌ن؟ ئيمه‌ هويچ وه‌ختيگ ئه‌مان نه‌ياشتيمنه‌ و له‌ ديم تاريگ له‌ عراق ژيه‌يم!، باس له‌وه‌يش كرد ك فه‌يليه‌يل هه‌ميشه‌ به‌شيگ بوينه‌ له‌و نه‌ته‌وه‌ ك هويچ وه‌ختيگ به‌خته‌وه‌ر نه‌ويه‌ له‌ى وڵاته‌، و مادام گوزه‌يشته‌يان پڕ بويه‌ له‌و هه‌مگه‌ مه‌ينه‌تيه‌يله‌، ئه‌ى دى ئه‌يراسه‌ دڵته‌نگن ئه‌ڕاێ.

 

فه‌يلى ره‌خنه‌يش له‌ مه‌سه‌له‌ى ته‌زكيه‌ گرت ك درياسه‌ بريگ له‌ ريكخرياگه‌يل مه‌ده‌نى و تاك فه‌يلى ئه‌را ژيان و كار و موڵكيه‌ت له‌ هه‌رێم كوردستان وه‌ ئه‌وه‌گ ته‌نانه‌ت سه‌داميش گومان له‌ كوردبوين فه‌يليه‌يل له‌ به‌غدا نه‌كرد، ئاماژه‌ وه‌يه‌يش كرد ك كفره‌ هه‌ركه‌سيگ گومان وه‌ كوردبوين فه‌يليه‌يل بكا تا هه‌وه‌جه‌ وه‌ ته‌زكيه‌ى كه‌سيگ بكا.

 

جى باسه‌، فه‌يلى هه‌ميش وت: ئيسه‌ وه‌خت ئه‌وه‌ هاتگه‌ ده‌رفه‌ت له‌ كوردستان بدريه‌ێده‌ كورده‌يل فه‌يلى ئه‌را په‌ره‌داين وه‌ خاسيه‌يل فكر و كاره‌يليان، چوينكه‌ فه‌يليه‌يل له‌ هه‌رێم قورسايى له‌بانى دروس ناكه‌ن.