هــــه‌واڵ عــیراق
ئئتلاف ياسا وه‌ قسه‌ په‌لامار كوه‌يت دا

ئئتلاف ياسا وه‌ قسه‌ په‌لامار كوه‌يت دا


شه‌فه‌ق نيوز/ عاليه‌ نسه‌يف ئه‌ندام ئئتلاف ده‌وڵه‌ت ياسا، وه‌ قسه‌ په‌لامار كوه‌يت داو ئاماژه‌ وه‌ ئه‌وه‌ كرد ك ملله‌ت عراقى هويچ وه‌ختيگ ئه‌و رۆڵ توڵه‌كاريه‌ له‌هويريان ناچێد ك كوه‌يت داشته‌ێ له‌ ئه‌زيه‌تكردنيان وه‌ دريژايى ده‌يان ساڵ وه‌ مه‌هانه‌ێ كرده‌وه‌يل رژيم وه‌رين.

 

نسه‌يف له‌ به‌ياننامه‌يگ ئه‌را شه‌فه‌ق نيوز وت: كۆنگره‌ێ كوه‌يت له‌باس و ناوه‌ڕوك خوه‌ێ به‌تاڵ كريا هه‌ناى ك له‌ كۆنگره‌يگ ئه‌را ده‌وڵه‌ته‌يل ده‌سميه‌تده‌ر عراقه‌و ئاڵشت بوێ ئه‌را كۆنگره‌يگ له‌وه‌ر وه‌به‌رهاوردن له‌ عراق، ك يه‌يش گه‌مه‌يگه‌و ئه‌وه‌ ده‌رخه‌ێد ك كوه‌يت گشت خێر و به‌ير عراق و داهاته‌يلێ له‌لێ برد و هه‌وڵ ورسگكردن ملله‌ت عراقى ئه‌ياد له‌ڕێ ده‌سكه‌فتن قه‌ره‌بووه‌يلێ و ئمڕوويش هه‌وڵ وه‌به‌رهاوردن ئه‌ياد له‌ عراق.

 

جى باسه‌، نسه‌يف هه‌ميش وت: كوه‌يت ده‌س گرته‌سه‌ بان خاكه‌يل عراق و زاڵ بويه‌سه‌ بان به‌نده‌ر و كه‌ناڵه‌يل ئاوى و فراوان به‌نده‌ره‌يل كردگه‌ ئه‌را ئه‌وه‌گ له‌ڕوێ ئابووريه‌و دژايه‌تيمان بكاو هه‌ر وه‌و خاتريشه‌ وه‌رپرسه‌يل كوه‌يتى مه‌راميان ئه‌وه‌سه‌ كوچگيگ له‌ى وڵاته‌ له‌بان يه‌كه‌و نه‌مينێد.