هــــه‌واڵ كــوردى
ريكخرياگيگ له‌ هه‌رێم كوردستان: عه‌سايب له‌ به‌غدا هه‌ڕه‌شه‌ له‌ كورده‌يل فه‌يلى ئه‌كه‌ن

ريكخرياگيگ له‌ هه‌رێم كوردستان: عه‌سايب له‌ به‌غدا هه‌ڕه‌شه‌ له‌ كورده‌يل فه‌يلى ئه‌كه‌ن


شه‌فه‌ق نيوز/ ريكخرياگ كورده‌يل فه‌يلى له‌ پاريزگاێ سلێمانى جه‌خت له‌وه‌ كرد ك كورده‌يل فه‌يلى له‌ به‌غداێ پايته‌خت تويش ناڕه‌حه‌تى وه‌رده‌وام هاتنه‌ له‌ وه‌ختيگه‌و ئعلان واده‌ێ ئه‌نجامداين راپرسى ماف بڕيار چاره‌نويس وه‌ سه‌روه‌خوه‌يى هه‌رێم كوردستان كرياگه‌ له‌ عراق.

 

له‌ى باوه‌ته‌و، ئسرا فه‌يلى ئه‌ندام ريكخرياگه‌گه‌ له‌ كۆنگره‌يگ رووژنامه‌گه‌رێ وه‌ل باقى ئه‌ندامه‌يل تر وت: كورده‌يل فه‌يلى له‌ شوونه‌يل كاركردن و له‌ بازاڕ و له‌ دام و ده‌زگايه‌يليش ك رووڵه‌يل ئه‌و پيكهاته‌ له‌تيان وجوود ديرن تويش ناڕه‌حه‌تى ئه‌يه‌ن و ئاگاداريان ئه‌كه‌ن له‌بان زه‌فتكردن ماڵ و موڵكه‌يليان و ده‌ركردنيان له‌ به‌غدا.

 

فه‌يلى وت: جمشت عه‌سايب ئه‌هلولهه‌ق هه‌ڕه‌شه‌ له‌ كورده‌يل فه‌يلى ئه‌كه‌ن وه‌ شيوه‌يگ راسه‌وخۆ، ئاماژه‌ وه‌يه‌يش كرد ك له‌ى دوياخريشه‌ سێ كه‌س له‌ رووڵه‌يل ئى پيكهاته‌ كوشيانه‌و فريه‌يگيش له‌ليان تويش هه‌ڕه‌شه‌ێ وه‌رده‌وام ئه‌يه‌ن.

 

جى باسه‌، فه‌يلى هه‌ميش وت: سعه‌د مه‌تڵه‌بى ئه‌و هه‌ڕه‌شه‌يله‌ كردگه‌و وتگيشه‌ ئه‌و هه‌ڕه‌شه‌ كورده‌يل فه‌يلى ناگرێده‌و، وه‌لێ ئيمه‌يش ئويشيم ئيمه‌ كورديم و جياوازێ نه‌يرێم وه‌ل باقى پيكهاته‌يل تر كورد و هه‌ر هه‌ڕه‌شه‌يگ له‌ كورد ره‌ته‌و ئه‌كه‌يم ك جياوازێ بخاده‌ ناونيمان.