هــــه‌واڵ عــیراق
شاره‌زايگ له‌ يونسكۆ: حكومه‌ت عراقى گرنگى وه‌ شوونه‌واره‌يل نه‌ياگه‌

شاره‌زايگ له‌ يونسكۆ: حكومه‌ت عراقى گرنگى وه‌ شوونه‌واره‌يل نه‌ياگه‌


شه‌فه‌ق نيوز/ هيمان شوونه‌واره‌يل عراقى بريه‌ێد و دزيه‌ێد ئه‌را ده‌يشت وڵات ك هه‌رچه‌نى حكومه‌ت عراقييش باس له‌ هه‌وڵه‌يلى ئه‌كا له‌ى باوه‌ته‌و ئه‌را سزاداين ئه‌نجامده‌ره‌يلى، وه‌لێ له‌راسى ئى دزيكردنه‌ وه‌رده‌وامه‌.

 

سه‌ركردايه‌تى سوپاى عراقى باس له‌ پويچه‌ڵكردن هه‌وڵێگ ئه‌را دزين شوونه‌واره‌يل كرد له‌ 21 ئايار 2018، ك ئاماده‌ كرياوێد ئه‌را دزينى له‌ عراقه‌و وه‌ره‌و سوريا له‌ڕێ شار موسڵه‌و له‌ پاريزگاى نه‌ينه‌وا.

 

له‌ى باوه‌ته‌و، ئه‌حمه‌د جومعه‌ شاره‌زا له‌ ريكخرياگ يونسكۆ وت: شوونه‌واره‌يل عراقى گرنگى وه‌پيان نه‌درياگه‌ له‌لايه‌ن حكومه‌ته‌يل يه‌ك له‌شوون عراقيه‌و له‌شوون 2003و هه‌ر وه‌و خاتريشه‌ كار دزيكردن شوونه‌واره‌يل وه‌بوونه‌ى كه‌مته‌رخه‌مى حكومه‌ته‌و وه‌رده‌وامه‌، يه‌يش له‌ حاڵه‌تيگ بايه‌سه‌ حكومه‌ت هيزيگ ئه‌منى تايبه‌ت وه‌ شوونه‌واره‌يل دابنه‌ێد و تواناى مقه‌يه‌تيكردن شوونه‌واره‌يل داشتوود له‌ هه‌ر كاريگ دزيكردن، چوينكه‌ مه‌ترسى گه‌ورا له‌بان شوونه‌واره‌يل هه‌س و بايه‌سه‌ له‌بان حكومه‌ت ئه‌و مه‌ترسيه‌ نه‌يلێد.