هــــه‌واڵ عــیراق
فه‌تواێ مسرى له‌باره‌ى په‌لاماره‌يل داعش: عراق هيمان ئامانج سه‌ره‌كيه‌

فه‌تواێ مسرى له‌باره‌ى په‌لاماره‌يل داعش: عراق هيمان ئامانج سه‌ره‌كيه‌


شه‌فه‌ق نيوز/ چه‌ودێر فه‌توايه‌يل ته‌كفيرى و هويروڕاى تونڕه‌وێ سه‌ر وه‌ ده‌زگاى فه‌توايه‌يل مسرى، چه‌ودێرى كرده‌وه‌يل هه‌فتانه‌ى تيرۆر ئه‌كا ك گرينگى ئه‌ياده‌ كرده‌وه‌يل تيرۆريستى و شيه‌وكردنى، ئه‌ويش له‌ باسكردن 34 كرده‌وه‌ى تيرۆريستى ك له‌ماوه‌ى هه‌فته‌ى گوزه‌يشت جيوه‌جێ كريانه‌و 13 ده‌وڵه‌ت له‌ ناوچه‌يل جياجيا گرته‌سه‌وه‌و 226 كه‌س كوشتگه‌و زه‌خمدار كردگه‌.

 

چه‌وديره‌گه‌ وت: خه‌ريته‌ى كرده‌وه‌يل چه‌كدارى له‌ماوه‌ى هه‌فته‌ى گوزه‌يشا جه‌خت له‌بان مه‌ترسى ستراتيجى ريكخرياگه‌يل تيرۆريسى ئه‌كا ك پيكهاتنه‌ له‌ تاڵيبان و ئه‌لقعيده‌و داعش له‌ هاوردنه‌وه‌ى چالاكيه‌يليان له‌ ناوچه‌يل خوه‌رهه‌ڵات ناوين و نيمچه‌ كشوه‌ر هندى و كشوه‌ر ئه‌سمه‌ر له‌ڕێ چه‌ن شيوازه‌يليگ جوراوجوو و گورج و ده‌سوه‌شانن له‌ هيزه‌يل ئه‌منى و هاووڵاتيه‌يل مه‌ده‌نى و له‌وانه‌يش له‌ ئه‌فغانستان.

 

جى باسه‌، چه‌ودێره‌گه‌ هه‌ميش وت: عراق هيمان ئامانج سه‌ره‌كى داعشه‌ ئه‌را ئه‌نجامداين چالاكيه‌يل تيرۆريستى له‌تى و باس له‌وه‌يش كرد ك هه‌فته‌ى گوزه‌يشت روێ وه‌ڕوێ بوينه‌وه‌ى له‌ناونى ئه‌و ريكخرياگه‌و هيزه‌يل ئه‌منى روێداگه‌ له‌چه‌ن شار و ئاوايه‌يليگ له‌ ده‌ورگرد به‌غداو موسڵ و دياله‌.