هــــه‌واڵ كــوردى
وه‌رپرسيگ كورد: كوردستان نياز جيايى له‌ عراق نه‌يرێد

وه‌رپرسيگ كورد: كوردستان نياز جيايى له‌ عراق نه‌يرێد


شه‌فه‌ق نيوز/ وه‌رپرسيگ له‌ حكومه‌ت هه‌رێم كوردستان مه‌سه‌له‌ێ راپرسى له‌بان سه‌روه‌خوه‌يى هه‌رێم ك بڕياره‌ له‌ ئه‌يلوول ئاينده‌ ئه‌نجام بگرێد جوور ته‌كتيكيگ ئه‌را فشارخستن له‌بان به‌غدا تاريف كرد له‌وه‌ر ئه‌وه‌گ قه‌وڵ خوه‌ێ وه‌جه‌ بارێد له‌ باره‌ێ دوسيه‌ێ وزه‌ و دابه‌شكردن ده‌سڵات.

 

نازم ده‌باغ نوێنه‌ر حكومه‌ت هه‌رێم كوردستان عراق له‌ ته‌هران باس له‌ مه‌ترسيه‌يل په‌لامارداين بنگه‌يل كورد كرد له‌لايه‌ن هيزه‌يل عراقى دوياێ كووتاييهاتن له‌ ئازادكردن موسڵ له‌ ريكخرياگ داعش و باسيش له‌وه‌ كرد ك كورد عراق مه‌ندنه‌وه‌ جوور به‌شيگ له‌ عراق وه‌ خاستر زانن ك هه‌رچه‌نى داواێ راپرسييش ئه‌كه‌ن له‌بان سه‌روه‌خوه‌يى له‌ 25 ئه‌يلوول ئاينده‌.

 

ده‌باغ ئه‌را ئاژانس فرانس پرێس وت: ئيمه‌ ئه‌و راپرسيه‌ ئه‌نجام ئه‌يه‌يم ئه‌را چاره‌سه‌ر كيشه‌يلمان له‌ عراق و تائيسه‌يش نياز جيايى له‌ عراق نه‌يرێم و ئحساس وه‌ ئه‌وه‌ ناكه‌يم عراق قه‌بولمان ئه‌كاو هه‌ر وه‌و خاتريشه‌ هه‌وڵ نه‌فوه‌رگرتن له‌ى ده‌رفه‌ت گونجياگه‌ ئه‌يه‌يم له‌ڕى دبلۆماسيه‌ت و په‌رله‌مان و ملله‌ت وه‌خاتر داواكردن مافه‌يلمان و ئه‌گه‌ريش ده‌سڵاته‌يل عراقى نه‌خوازن كيشه‌يلمان چاره‌سه‌ر بكه‌ن، ئه‌وه‌ ملله‌تمان ئاماده‌س ئه‌را قوربانى.