هــــه‌واڵ جیــهانى
ئه‌نداميگ ئيرانى له‌باره‌ێ چاره‌نويس وڵاته‌گه‌ێ هاوشيوه‌ى يه‌كێتى سوڤێت وشدارى دا

ئه‌نداميگ ئيرانى له‌باره‌ێ چاره‌نويس وڵاته‌گه‌ێ هاوشيوه‌ى يه‌كێتى سوڤێت وشدارى دا


شه‌فه‌ق نيوز/ جه‌ليل ره‌حيمى جهان ئابادى ئه‌ندام ئيرانى، وشدارى دا وڵاته‌گه‌ێ له‌ چاره‌نويس يه‌كێتى سۆڤێت و وا: يه‌كێتى سۆڤێت هه‌رچه‌نى 13 هه‌زار كڵاوه‌ى ئه‌تۆمى داشت، وه‌لێ په‌رچه‌م خوه‌ێ وه‌ده‌سه‌وداين به‌رزه‌و كرد له‌ جاده‌يل مۆسكۆ.

 

جهان ئابادى له‌ لێدوانيگ ئه‌را ماڵه‌په‌ڕه‌يل ئيرانى وت: ئه‌گه‌ر له‌ خه‌رجه‌يل زيايه‌مان له‌ ناوخود و له‌ده‌يشت وڵات كه‌مه‌و نه‌كه‌يم، ئه‌وه‌ بايه‌سه‌ واين وه‌چه‌و خوه‌مان بوينيم له‌ناو ته‌هران.

 

ئه‌و ئه‌ندام ئيرانيه‌ له‌ يه‌كشه‌ممه‌ى گوزه‌يشت له‌ دانيشتن په‌رله‌مان ئيرانى وت:وه‌ختيگ ك يه‌كێتى سۆڤێت كه‌فت 13 كڵاوه‌ى ئه‌تۆمى داشت وه‌ل نفوز له‌ 20 وڵات جه‌هان و وێستگه‌يگ ئاسمانى، وه‌لێ له‌ناو جاده‌يل مۆكسۆ چويچيا.

 

جى باسه‌، ئه‌و ئه‌ندامه‌ ئاماژه‌ وه‌ ده‌خاڵه‌تكردن وڵاته‌گه‌يشى كرد له‌ ناوچه‌گه‌ و جه‌هان و باس له‌ ئاقبه‌ته‌ سياسيه‌گه‌ى كرد و وت: هه‌رچه‌نى ئيمه‌ كاريگه‌رى و ئاماده‌گى ديريم له‌ ناوچه‌گه‌، وه‌لێ بايه‌سه‌ ئه‌وه‌يش له‌هوير نه‌كه‌يم ك ئه‌و كاره‌يله‌ جارجاريگ باجه‌گه‌ێ قورس ئه‌دێ له‌ بانمان و له‌ هه‌مان وه‌خت ره‌خنه‌ له‌ سياسه‌ت وڵاته‌گه‌يشى گرت و وت: ئمڕوو مه‌ردم وه‌ سه‌ختى سه‌رچه‌وه‌ى رزقيان دويننه‌و ك ئه‌گه‌ر خه‌رجه‌يل زيايه‌ له‌بانيان كه‌مه‌و نه‌كريه‌ێد له‌ ناو و ده‌يشت، ئه‌وه‌ بايه‌سه‌ ئيمه‌ باج ئه‌و هه‌مگه‌ خه‌رجه‌ بيه‌ێم و زه‌ره‌د روێ له‌ ئاسايش نه‌ته‌وه‌ييمان ئه‌كا ك نه‌ك له‌ڕێ دوشمه‌نه‌يل، به‌ڵكوو له‌ناوخود وڵاته‌گه‌وه‌.