هــــه‌واڵ عــیراق
عراق داواكاره "وه‌خشين ناوده‌وڵه‌تى" سه‌ردان موسڵ بكا

عراق داواكاره "وه‌خشين ناوده‌وڵه‌تى" سه‌ردان موسڵ بكا


شه‌فه‌ق نيوز/ عه‌ميد يه‌حيا ره‌سول قسه‌كه‌ر وه‌ناو سه‌ركردايه‌تى فه‌رمانده‌يى هاوبه‌ش له‌ عراق، وت: ريكخرياگ ترۆريستى داعش تاوانه‌يل گه‌ورايگ دژ مه‌ده‌نيه‌يل ئه‌نجام داگه‌ جوور كوشتن و رفانن و تاوانه‌يل تر جوور سه‌ربرين و زينگ وه‌چاڵكردن و مينڕيژكردن ماڵه‌يل و ده‌سوه‌سه‌ركردن هاووڵاتيه‌يل.

 

ره‌سول وت: هيزه‌يل عراقى مقه‌يه‌تى له‌ گيان مه‌ده‌نيه‌يل كردنه‌ له‌ موسڵ و كه‌رته‌يل سوپايش چه‌ك سووك و نيمچه‌ قورس هاوردنه‌سه‌ كار و دوير گرتگه‌ له‌ وه‌كارهاوردن چه‌ك قورس و هه‌رچه‌نى سه‌ركه‌فتن سوپاێ عراقى تويڕه‌يل مه‌ردمانيگيش كردگه‌، وه‌لێ سه‌ركه‌فتنيگ ئنسانى بويه‌ وه‌رجه‌ سه‌ركه‌فتنيگ سه‌ربازێ.

 

جى باسه‌، ره‌سول داويش له‌ ريكخرياگ وه‌خشين ناوده‌وڵه‌تييش كرد ليژنه‌يگ سه‌روه‌خوه‌ێ دامه‌زرنێد ئه‌را په‌يجوريكردن له‌و تاوانه‌يله‌ ك ئه‌نجام درياگه‌ له‌ موسڵ ده‌رهه‌ق مه‌ده‌نيه‌يل چ تاوانه‌يليگ ك داعش ئه‌نجامى داگه‌ يا تاوانه‌يليگ له‌لايه‌ن هيزه‌يل عراقى يا هاوپه‌يمان ناوده‌وڵه‌تيه‌و ئه‌نجام درياگه‌ دژ داعس وه‌ سه‌رۆكايه‌تى وڵاته‌يل يه‌كگرتگ و داوايش كرد وه‌خشين ناوده‌وڵه‌تى سه‌ردان خاك موسڵ بكا وه‌ چه‌و خوه‌ێ ره‌فتار هيزه‌يل چه‌كدار بوينێد دوير له‌ تومه‌ت و هه‌ميش وت: ئيمه‌ مقه‌يه‌تى له‌ گيان هاووڵاتيه‌يل و ماڵ و موڵكه‌يليان و شه‌ره‌ف عراقيه‌يل كرديمنه‌.