وتـــــار
نرخه‌يل به‌رز گيرفان هاوولاتيه‌يل سزانگه‌

نرخه‌يل به‌رز گيرفان هاوولاتيه‌يل سزانگه‌


شه‌فه‌ق نيوز/ هه‌رچه‌نى قه‌يران ئابوورى تائيسه‌ چنگڕێ له‌ مل چينه‌يل فريه‌يگ له‌ هاووڵاتيه‌يل گير كردگه‌و روێ له‌ مه‌ردمان تريش ئه‌كا وه‌ره‌و فه‌قيرى، وه‌لێ وه‌ل ئه‌وه‌يشا تێبينى يه‌يش ئه‌كريه‌ێد ك نرخ زوورم مادده‌يل خوارده‌مه‌نى له‌ بازاڕه‌يل تاك و جه‌م فيشتره‌و بويه‌.

 

ئى گه‌شته‌ له‌ به‌رزه‌وبوين خراو نه‌خه‌يل ريككه‌فته‌ وه‌ل نزيكه‌وبوين مانگ ره‌مه‌زان پيرووز و يه‌يش ديارده‌يگه‌و سروشتيه‌و بويه‌، ك له‌يوا دياره‌ ده‌سوه‌ردارى له‌لى نيه‌ مادام لايه‌نه‌يليگ ك بايه‌سه‌ هاوسه‌نگى و سه‌قامگيرى بارنه‌و له‌ نرخه‌يل و له‌بان ئى حاڵه‌ته‌ بى ته‌كجم وسيانه‌ و حه‌بله‌گه‌ دانه‌سه‌ ده‌س گه‌ورا بازرگانه‌يل و ئه‌وانه‌ك مينه‌ێ ئيچنه‌ ده‌رفه‌ته‌يليگ ئه‌كه‌ن.

 

مه‌ردم ده‌نگيان به‌رزه‌و بويه‌و ره‌خنه‌ له‌ى زيايه‌ى خراوه‌ له‌ نرخ مادده‌يل خوارده‌مه‌نى ئه‌گرن ك ئه‌چێده‌ بان سفره‌ى ره‌مه‌زان و هه‌ر له‌ئيسه‌و بازاڕ ئه‌كه‌ن له‌وه‌ر ئه‌وه‌گ پويل كه‌متريگ خه‌رجج بكه‌ن له‌ هاتن ئى مانگ پيرووزه‌، چوينكه‌ نرخ كاڵايه‌يل به‌رزه‌و ئه‌دێ، وه‌ل ئه‌وه‌يشا شكايه‌ت ئه‌را فه‌ره‌جيگ ئه‌كه‌ن وه‌تايبه‌ت ئه‌وانه‌گ تواناى سه‌ندن نه‌يرن.

 

له‌ بڕيگ له‌ هاووڵاتيه‌يل ژنه‌فيم تويڕه‌ن له‌ ئه‌ركه‌يل وزاره‌ت بازرگانى ك به‌شه‌ خوه‌راك له‌واده‌ى خوه‌ى دابه‌ش ناكا تا وه‌لاى كه‌مه‌و به‌ش كه‌ميگ له‌ هه‌وه‌جه‌يليان پڕه‌و بكا وه‌ل به‌رزه‌وبوين نرخه‌يل و هه‌ر وه‌و خاتريشه‌ پيشنيار يه‌يش ئه‌كه‌ن ئه‌را وزاره‌ته‌گه‌ مادده‌يل بنه‌ڕه‌تى فيشتره‌و بكا له‌ بازاڕه‌يل و ئه‌و به‌شه‌يل دوياكه‌فتگ خوارده‌مه‌نيه‌ بيه‌ێده‌ هاووڵاتيه‌يل ك بڕگه‌ێ به‌شه‌ ته‌موينى و كاريش ئه‌را دابه‌شكردن به‌شه‌يل زيايه‌يش بكا وه‌ بوونه‌ى مانگ ره‌مه‌زان پيرووز وه‌رجه‌ هاتنى له‌وه‌ر نواگيرى له‌ به‌رزه‌وبوين نرخه‌يل، چوينكه‌ هويچ قانجازيگ نه‌يرێد ئه‌گه‌ر له‌مانگ ره‌مه‌زان دابه‌ش بكريه‌ێد، چوينكه‌ مه‌ردم وه‌رجه‌ هاتن مانگ پيرووز بازاڕ ئه‌كه‌ن ئه‌را سه‌ندن هه‌وه‌جه‌يليان.

 

ئه‌وه‌گ ئيسه‌ باسه‌ له‌لاى هاووڵاتيه‌يل ئه‌وه‌سه‌ ك باس گرانيه‌ له‌ نرخه‌يل و هه‌وڵ نواگيرى وازيكردنه وه‌ نه‌رخه‌يل، ئى مه‌سه‌له‌يشه‌ كاريگه‌رى له‌ ئابوورى ئازاد نه‌يرێد، چوينكه‌ له‌گشت وڵاته‌يل دونيا قه‌يه‌غه‌ێ وازيكردن وه‌ نرخه‌يل ئه‌كريه‌ێد وه‌ل وازيكردن وه‌ قووت هاووڵاتيه‌يل و دروسكردن قه‌يرانه‌يل په‌يوه‌س وه‌پى.

 

چه‌وديرێ مه‌ردمى كار خواستيگه‌و حكومه‌تيش راى لايه‌نگرى زوورمينه‌ وه‌رئه‌گرێد له‌ رووڵه‌يل ملله‌ت، وه‌تايبه‌ت ئه‌وانه‌گ سزيانه‌ وه‌ ئاگر قه‌يران ئابوورى له‌ئاكام خود سياسه‌ته‌يل حكومى ك ئنسافيان ناكاو مه‌ينه‌تى گه‌ورايگ ناسه‌ بانيان.

 

له‌يرا ئه‌رك حكومه‌ت ئه‌وه‌سه‌ گووش له‌ مه‌ردم بگرێد و بزانێد حاڵيان چوينه‌ له‌ژيان و گوزران، يه‌يش بيجگه‌ ئه‌وه‌گ مه‌ردميش بايه‌سه‌ پيشنيار خاس و په‌سه‌ن پيشكه‌ش بكه‌ن و مايه‌ى جيوه‌جيكردن بوود ئه‌را قورتاربوين له‌ى مه‌ينه‌تيه‌ ك هاته‌سه‌ تويشيان.

 

جاريگتر ئويشيم وزاره‌ت بازرگانى تواناى ئه‌وه‌ ديرێد له‌ى ديارده‌ قورتار بوود ئه‌گه‌ر هه‌ڵه‌په‌ڵه‌ بكا له‌ هاورده‌كردن بڕ فريه‌يگ مادده‌يل خوارده‌مه‌نى بنه‌ڕه‌تى و بخاده‌ى بازاڕ، وه‌تايبه‌ت ئه‌گه‌ر بتويه‌نێد نواى گه‌ناته‌كارى بگرێد، ك وه‌ى جووريشه‌ ئاسانكارى ماددى ئه‌كا ئه‌را ماوه‌يگ دياريكرياگ له‌ى وه‌رزه‌و هان بازرگانه‌يليش ئه‌ياد وه‌ نرخه‌يل مه‌عقوليگ بفرووشن تا فه‌قير بتويه‌نێد بڕيگ له‌ هه‌وه‌جه‌يليان بسينن ئه‌را تيركردن زگه‌يليان له‌ ره‌مه‌زان پيرووز.

ماجد زه‌يدان