وتـــــار
موباره‌ك له‌ كوردستان

موباره‌ك له‌ كوردستان


شه‌فه‌ق نيوز/ له‌ 25 سپته‌مبه‌ر ئاينده‌، وه‌رجه‌ هاتن وه‌رز پايز ملله‌ت كورد واده‌ وه‌ل راپرسى گشتى مه‌ردم هه‌رێم ديرێد تا ده‌نگ له‌بان بڕيار جيابوينه‌وه‌  يا مه‌ندن وه‌ل به‌غدا بيه‌ن، جى باوه‌ڕه‌ ك پيشوازى فريه‌يگ هه‌س ئه‌را راپرسى له‌ يه‌كه‌م ده‌سپيشخه‌رێ له‌يوايگ له‌ مێژوو نه‌ته‌وه‌ێ كورد ك ئيچنه‌ ده‌رفه‌تيگ ئه‌رايان هه‌ڵكه‌فێد و به‌شدارى له‌ ده‌نگداين بكه‌ن ئه‌را بريار چاره‌نويس، ئاكاميشى خاس نيشێد و ماقوڵ نيه‌ هاووڵاتى كورد ئى ده‌رفه‌ته‌ له‌ده‌س خوه‌ێ بيه‌ێد ئه‌را وه‌ديهاتن خه‌و كويه‌ن.

 

بيجگه‌ مه‌ترسيه‌يليگ له‌ روێداگه‌يل ئيچنه‌ راپرسييگ، وه‌لێ وه‌ل ئه‌وه‌يشا كورد باوه‌ڕيان ئه‌وه‌سه‌ وجوود راسكانييان له‌ وه‌ديكردن نه‌ته‌وه‌يى و جياييان دويننه‌و له‌ نه‌ته‌وه‌يل تر و ناخوازن سه‌ر وه‌ نه‌ته‌وه‌يگ تر بوون يا جوور كه‌مينه‌ بوون له‌ وڵاته‌يليگ مافه‌يل خوه‌ر و هاووڵاتى بچه‌وسنن و موحاسبه‌يان بكريه‌ێد له‌بان جنگ ته‌قليدى و زووان تايبه‌ت و داب و نه‌ريته‌يليان و تويش مه‌رگ و زيندانى بان له‌ حاڵه‌ت راپه‌ڕين يا داواكردن مافه‌يل ره‌وايان.

 

مه‌سعود بارزانى سه‌رۆك هه‌رێم كوردستان جه‌خت له‌وه‌ كرد ك ئه‌نجامداين راپرسى په‌شيمانى له‌تى نيه‌و گشت ئه‌وانه‌يش ك ناڕه‌زايى ده‌رخستن له‌ كورد وه‌تايبه‌ت سياسيه‌يل ئه‌وانه‌ ناڕازيين له‌بان په‌يڕه‌وه‌يل دياريكرياێ، وه‌لێ ده‌نگ له‌بان ره‌ته‌وكردن نايه‌ن ئه‌را بڕيار جيايى له‌ به‌غدا و گووش ئه‌يه‌نه‌ ئيراده‌ێ مه‌ردمى ك بڕيار چاره‌نويس ئه‌ياد وه‌ يه‌ك ده‌نگ و هه‌ر يه‌يش روێ ئه‌ياد و دياره‌ وڵاته‌يل خوه‌رئاوا و وڵاته‌يل يه‌كگرتگ ئه‌مريكييش ره‌سينه‌سه‌و له‌ هه‌ڵويست كورد، وه‌تايبه‌ت دوياێ روێداگه‌يل دوسيه‌ێ سوورى و پيشڕه‌وێ هيزه‌يل ديموكراتخواز سوريا وه‌ پشتگيرى كورده‌يل، ك هه‌رچه‌نى توركيايش ناڕه‌زايى ديرێد و داخداره‌ ئه‌را بڕيار ئه‌نجامداين راپرسى وه‌نسبه‌ت ئه‌را كورده‌يل عراق و بيجگه‌ ره‌ته‌وكردن ئيرانى و ئه‌گه‌ره‌يل ناكووكى ناونى پێشمه‌رگه‌و هيزه‌يل عراق يا حه‌شد شه‌عبى له‌ ئاكام مه‌سه‌له‌ێ كه‌ركووك يا ناوچه‌يل كيشه‌ له‌سه‌ر وه‌تايبه‌ت ئه‌و ناوچه‌يله‌ ك كه‌فتنه‌سه‌ خوه‌رهه‌ڵات موسڵ و ناوچه‌يل ئازادكرياێ ژير ده‌سڵات داعش.

 

حكومه‌ت عراقى كارته‌يل فريه‌يگ نه‌يرێد ئه‌را فشارخستن و په‌كخستن راپرسى، يا ئاكامه‌يلى ره‌ته‌و بكا، يا نواگيرى له‌ راسييگ بكا چه‌واشه‌وه‌ بدێ له‌ واقع پرووسه‌ێ سياسى، ئمجا وه‌هه‌ر حاڵ رووژه‌يل و هه‌فته‌يل ئاينده‌ و روێداگه‌يل گورج له‌ ده‌ورگرد عه‌ره‌بى و هه‌رێمى كه‌فيله‌ وه‌ ئاكامه‌يل ناپيشبينى كرياێ و راسيه‌يليگ ك گشت چشتيگ ئاڵشت بكاو، ئيمه‌يش چشتيگ تر نه‌يريم بيجگ له‌ چه‌وه‌ڕيكردن.

هادى جله‌و مه‌رعى