هــــه‌واڵ كــوردى
سلێمانى له‌ڕێ به‌غداوه‌ هه‌وڵ ده‌س وه‌پيكردنه‌وه‌ى گه‌شته‌يلى وه‌ره‌و توركيا ئه‌ياد

سلێمانى له‌ڕێ به‌غداوه‌ هه‌وڵ ده‌س وه‌پيكردنه‌وه‌ى گه‌شته‌يلى وه‌ره‌و توركيا ئه‌ياد


شه‌فه‌ق نيوز/ هه‌ڤاڵ ئه‌بو به‌كر پاريزگار سلێمانى، داوا له‌ ده‌سڵاته‌يل ته‌ياره‌وانى ناوه‌ندى كرد، بڕيار توركيا له‌باره‌ى گه‌مارۆى ئاسمانى له‌بان ته‌ياره‌خانه‌ى سلێمانى لاوريه‌ێد.

 

شاند پارێزگاى سلێمانى له‌وه‌ر تاوتوێكردن چه‌ن دوسيه‌يگ گرنگ ره‌سيه‌ به‌غداى پايته‌خت و چه‌وێ كه‌فته‌ عه‌لى خه‌ليل وه‌ڕيه‌وبه‌ر گشتى ده‌سڵات ته‌ياره‌وانى ناوه‌ندى و داوا له‌لى كرد كار جدێ بكا ئه‌را لاوردن گه‌مارۆ ئاسمانى توركى له‌بان ته‌ياره‌خانه‌ى سلێمانى وه‌ ئه‌وه‌گ ئه‌و گه‌مارۆ زه‌ره‌د ره‌سنێده‌ كه‌رت بازرگانى و گه‌شتيارى له‌ سلێمانى و هه‌رێم وه‌گشتى.

 

جى باسه‌، له‌لاى خوه‌يه‌و، ده‌سڵات ته‌ياره‌وانى ناوه‌ندييش قه‌وڵ چاره‌سه‌ركردن كيشه‌ى گه‌شته‌يل ته‌ياره‌خانه‌ى ناوده‌وڵه‌تى سلێمانى داو وت: دوسيه‌ى گشه‌ته‌يل ئاسمانى چگن و هاتن ئه‌را ته‌ياره‌خانه‌گه‌ محوه‌ريگ گردبوينه‌وه‌ى هه‌ردوگ ده‌سڵاته‌يل ته‌ياره‌وانى عراقى و توركى ئه‌گرێده‌ خوه‌ى له‌ هه‌فته‌ى ئاينده‌، جوور ئه‌وه‌گ ره‌ساننه‌يل يه‌كێتى نيشتمانى ئاماژه‌ وه‌پى كردن.