هــــه‌واڵ كــوردى
وزاره‌ت پێشمه‌رگه‌ ئاشكراى شماره‌ى ئه‌و جه‌نگاوه‌ره‌يله‌ كرد چاره‌نويسيان نادياره‌

وزاره‌ت پێشمه‌رگه‌ ئاشكراى شماره‌ى ئه‌و جه‌نگاوه‌ره‌يله‌ كرد چاره‌نويسيان نادياره‌


شه‌فه‌ق نيوز/ وزاره‌ت پێشمه‌رگه‌ ئاشكراى ئه‌وه‌ كرد ك 62 جه‌نگاوه‌ر له‌ هيزه‌يلى هيمان چاره‌نويسيان نادياره‌ له‌وانه‌گ كه‌فتنه‌سه‌ ده‌س ريكخرياگ ترۆريستى داعش له‌وه‌ختيگه‌و هاتنه‌سه‌ ناو شار و ناوچه‌يليگ له‌ عراق له‌ ناوڕاس ساڵ 2014.

 

ليوا قه‌هره‌مان كه‌مال جيگر ده‌سه‌ى ئه‌ركان له‌ وزاره‌ته‌گه‌ له‌ لێدوانيگ فه‌رمى ك(شه‌فه‌ق نيوز)ئاگادارى بوى، وت: له‌ سه‌ره‌تاى جه‌نگ وه‌ل ريكخرياگ داعش تائيسه‌ ئه‌وانه‌گ چاره‌نويسيان نادياره‌ شماره‌يان 62 جه‌نگاوه‌ره‌ ك بڕيگ له‌ليان شايه‌ت كه‌فتنه‌سه‌ ده‌س ئه‌و ريكخرياگه‌و بڕيگيش له‌ليان شايه‌ت شه‌هيد بوينه‌و ته‌رمه‌يليان ها لاى ئه‌و ريكخرياگ ترۆريستيه‌.

 

جى باسه‌، كه‌مال هه‌ميش وت: وزاره‌ته‌گه‌ ناو ئه‌و جه‌نگاوه‌ره‌يل پێشمه‌رگه‌ وه‌ چاره‌نويس ناديار تۆمار كردگه‌.