هــــه‌واڵ عــیراق
يه‌كێتى نيشتمانى: لايه‌نيگ هه‌رێمى فشار خسته‌ بان به‌غدا ئه‌را په‌سه‌نكردن بودجه‌ وه‌بى كورد

يه‌كێتى نيشتمانى: لايه‌نيگ هه‌رێمى فشار خسته‌ بان به‌غدا ئه‌را په‌سه‌نكردن بودجه‌ وه‌بى كورد


شه‌فه‌ق نيوز/ رێزان شێخ دلێر ئه‌ندام په‌رله‌مان عراقى له‌بان يه‌كێتى نيشتمانى كوردستان، ئاشكراى ئه‌وه‌ كرد ك فشاره‌يل فريه‌يگ له‌لايه‌نيگ هه‌رێميه‌و له‌بان به‌غدا بويه‌ ئه‌را په‌سه‌نكردن بودجه‌ى ناوه‌ندێ وه‌بى به‌شدارى كورد.

 

له‌ى باوه‌ته‌و، رووژنامه‌ى ئه‌لشه‌رقولئه‌وسه‌ت له‌ زووان شێخ دلێره‌و وت: ئه‌وه‌گ روێدا له‌ناو په‌رله‌مان نه‌ك هه‌ر ته‌نيا جيوه‌جيكردن ياسايگ، به‌ڵكوو سزايگ ته‌دبيركرياێ بوێ ئه‌را ملله‌ت كورد له‌لايه‌ن هاوبه‌شه‌يلمان و يه‌يش ماناى ئه‌وه‌سه‌ جوور شه‌ريك ناخوازنه‌مان له‌ عراق، چوينكه‌ نادێ بيده‌نگ بوێد له‌بان سزايگ وه‌جه‌م دژ ملله‌تيگ وه‌ ته‌واوى.

 

جى باسه‌، شێخ دلێر هه‌ميش وت: لايه‌نيگ هه‌رێمى هه‌س ك ئاشكرا ئويشمه‌ى توركه‌يل بوين له‌ى باوه‌ته‌و فشار خستنه‌ بان به‌غدا ئه‌را چه‌سپانن سزايه‌يل فيشتر له‌بان ملله‌ت كورد، چوينكه‌ ئه‌وه‌گ روێدا كوده‌تاێ ته‌ماميگ بوى له‌بان ده‌ستوور و لاوردن هاوبه‌شى.