هــــه‌واڵ كــوردى
بارزانى موباره‌كبايى له‌ عبادى كرد و ده‌سكرده‌ گه‌شتيگ ئۆرپى تايبه‌ت وه‌ راپرسى

بارزانى موباره‌كبايى له‌ عبادى كرد و ده‌سكرده‌ گه‌شتيگ ئۆرپى تايبه‌ت وه‌ راپرسى


شه‌فه‌ق نيوز/ مه‌سعود بارزانى سه‌رۆك هه‌رێم كوردستان موباره‌كبايى له‌ حه‌يده‌ر عبادى سه‌رۆك ئه‌نجومه‌ن وه‌زيره‌يل عراقى كرد وه‌ بوونه‌ێ ئازادبوين شار موسڵ له‌ژير ده‌سڵات ريكخرياگ ترۆريستى داعش و ده‌سيش كرده‌ گه‌شتيگ خارجى ئه‌را تاوتوێكردن راپرسى له‌بان سه‌روه‌خوه‌يى هه‌رێم كوردستان.

 

بارزانى له‌ په‌يوه‌ندييگ ته‌له‌فۆنى وته‌ عبادى: ئازادبوين موسڵ له‌ ئاكام ريككه‌فتن ناونى هيزه‌يل پێشمه‌رگه‌ ك قوربانى وه‌ خوين شه‌هيده‌يل دا و هيزه‌يل عراقى بوێ.

 

بارزانى موباره‌كبايى له‌ ملله‌ت عراق و ملله‌ت كوردستان كرد وه‌ بوونه‌وه‌ێ هاوردنه‌وه‌ى شار موسڵ له‌ ژير ده‌سڵات داعش و جه‌خت له‌وه‌يش كرد ك هه‌ردوگلا وه‌رده‌وامن له‌بان ريكخستن هاوكارى ناونى هه‌ردوگلا ئه‌را له‌ناوبردن ترۆر.

 

جى باسه‌، بارزانى سه‌رۆكايه‌تى ليژنه‌ێ باڵاێ راپرسى كرد له‌ گه‌شتيگ خارجى ك له‌ په‌رله‌مان يه‌كێتى ئۆرپاوه‌ له‌ برۆكسل ده‌س وه‌پى ئه‌كا ئه‌را تاوتوێكردن راپرسى هه‌رێم كوردستان ك كورد خوازياره‌ له‌ 25 ئه‌يلوول ئاينده‌ ئه‌نجامى بيه‌ێد.