هــــه‌واڵ كــوردى
هۆڵه‌ندا له‌ هاوكاريكردن هه‌رێم كوردستان وه‌رده‌وام ئه‌دێ

هۆڵه‌ندا له‌ هاوكاريكردن هه‌رێم كوردستان وه‌رده‌وام ئه‌دێ


شه‌فه‌ق نيوز/ مارك روته‌ سه‌رۆك حكومه‌ت هۆڵه‌ندى له‌وه‌خت پيشوازيكردن له‌ نێژيروان بارزانى سه‌رۆك حكومه‌ت هه‌رێم كوردستان ئاماده‌گى وڵاته‌گه‌ى ده‌رخست ئه‌را هه‌ر ده‌سميه‌تيگ وه‌ ئامانج له‌ناوبردن مه‌ترسيه‌يل تيرۆر و پرووژه‌ى خاسسازى له‌ وه‌زاره‌ت پێشمه‌رگه‌و ئوميد ئه‌وه‌يش خواست ناكووكيه‌يل ناونى هه‌ولێر و به‌غدا چاره‌سه‌ر بكريه‌ێد.

 

سه‌رۆكايه‌تى حكومه‌ت هه‌رێم له‌ به‌ياننامه‌يگ ك شه‌فه‌ق نيوز ئاگادارى بوێ وت: بارزانى و شانده‌ ياوه‌ره‌گه‌ وه‌ داوه‌تيگ فه‌رمى ره‌سيه‌سه‌ هۆڵه‌نداو چه‌وى كه‌فته‌سه‌ مارك روته‌ سه‌رۆك حكومه‌ت هۆڵه‌ندى.

 

به‌ياننامه‌گه‌ وت: بارزانى له‌و ديداره‌ رووشنايى خسته‌سه‌ بان په‌يوه‌نديه‌يل ناونى كوردستان و هۆڵه‌ندا و ئه‌و ده‌سميه‌ته‌يله‌ ك هۆڵه‌ندا پيشكه‌شى وه‌ ملله‌ت كوردستان كردگه‌ له‌ ناوڕاس ساڵه‌يل هه‌فتاى سه‌ده‌ى گوزه‌يشت و پيشوازيكردنى له‌ په‌نابه‌ره‌يل كورد و پشتگيريكردنى له‌ هيزه‌يل هاوپه‌يمان دژ تيرۆر و وه‌رده‌وامى هاوكارى سه‌ربازى و ئنسانى و له‌ هه‌مان وه‌خت سه‌ردان ئى دوياخر وه‌زير بازرگانى هۆڵه‌ندييش ئه‌را هه‌رێم به‌رز نرخاانگه‌.

 

لاى خوه‌ييشه‌و، سه‌رۆك حكومه‌ت هۆڵه‌ندى خوه‌شاڵى خوه‌ى ده‌رخست وه‌ سه‌ردانه‌گه‌ى بارزانى و شانده‌ ياوه‌ره‌گه‌ى و ئاماژه‌ وه‌ په‌يوه‌نديه‌يل ناونى وڵاته‌گه‌ى و هه‌رێم كوردستان كرد و رۆڵ پێشمه‌رگه‌يش به‌رز نرخان دژ داعش و مقه‌يه‌تيكردنى له‌ پيكهاته‌يل جياجيا له‌ مه‌ترسى تيرۆر و له‌خوه‌يگرتن شماره‌ى فريه‌يگ له‌ په‌نابه‌ر و ئاواره‌يل.

 

جى باسه‌، روته‌ ئاماژه‌ وه‌ ئاماده‌كردن راپۆرتيگيش كرد له‌باره‌ى سه‌ردانه‌گه‌ى ئى دوياخريه‌ ئه‌را هه‌رێم كوردستان و باسيش له‌ دياريكردن ئه‌و بواره‌يله‌ كرد ك حكومه‌ته‌گه‌ێ له‌تى ئه‌تويه‌نێد ده‌سميه‌ت ملله‌ت و حكومه‌ت هه‌رێم كوردستان بيه‌ێد.