وتـــــار
ئيران فورات ئه‌كوشێد ..!

ئيران فورات ئه‌كوشێد ..!


شه‌فه‌ق نيوز/ وه‌رجه‌ رووژه‌يليگ و له‌وه‌خت زياره‌ت چله‌ى ئيمام حسێن(س،خ)له‌لێ، له‌ ميديايه‌يله‌و هه‌واڵ سه‌رئاوكه‌فتن شماره‌ێ فريه‌يگ له‌ ماسى بڵاو بوێ و ده‌رياچه‌ێ فورات و ده‌رياچه‌يل ئمايه‌تكردن ماسه‌يل له‌ كنار ئاوه‌يل تويش كاره‌ساتيگ ئابوورێ هاتن و كاريگه‌رى ئه‌كاه‌ بان به‌رهه‌م سامانه‌يل ماسى له‌ عراق وه‌گشتى، له‌وه‌يش گرنگتر ئه‌وه‌سه‌ ك بايه‌سه‌ له‌بانمان هووكاره‌ راسكانيه‌گه‌ێ بزانيم ك بويه‌ سه‌رئاوكه‌فتن ده‌يان هه‌زار ته‌ن له‌ سامانه‌يل ماسى، هه‌ر له‌وه‌ر ئه‌وه‌يش هووكاره‌يل فريه‌يگ باس ئه‌كريه‌ێد و مه‌رگيش يه‌كيگه‌!

 

وه‌ قه‌وڵێ مه‌سڵه‌ته‌گه‌ێ ك ئويشێد: موسيبه‌ت مه‌ردمانيگ ئه‌را مه‌ردمانيگ تر قانجازو! دوينيم كه‌سه‌يليگ نه‌فسيه‌ت نزم له‌ ئاشووگه‌ره‌يل و دانه‌ره‌يل سيناريۆهات هه‌ن حاڵه‌ت سه‌رئاوكه‌فتن مليۆنه‌ها ماسى له‌ ده‌رياچه‌ى فورات ئستغلال كردنه‌ تا بودعه‌يگ دروس بكه‌ن ك بنه‌ڕه‌ته‌گه‌ێ و سه‌رچه‌وه‌گه‌ێ له‌ ته‌هريجه‌و ئه‌وه‌نه‌ دوير نيه‌، و باوه‌ڕمانيش ئه‌وه‌سه‌ ئه‌و دعايه‌يله‌ ك ئه‌وانه‌ دروسى ئه‌كه‌ن له‌ نه‌خوه‌شييگ خراو بترازيه‌ێد چشتيگ تر نيه‌ ك وه‌ گورجى جيواز ئه‌دێ و خوسه‌و كينه‌ت چه‌ويان كوور كردگه‌.

 

تومه‌تباركردن يه‌كيگ له‌ كه‌سه‌يل سه‌ر وه‌حه‌شد وه‌ ژه‌هراويكردن ده‌رياچه‌ێ فورات وه‌ ده‌سميه‌ت بڕيگ له‌ زياره‌تچيه‌يل ئيرانى، سيناريۆێگ ئاشكراسه‌و هووكاره‌يل سياسى و ئه‌جنداى ده‌ره‌كى ها پشتى، جوور ئه‌وه‌گ له‌ فيلمه‌يل هه‌س! ئمجا وه‌خت ئيچنه‌ قه‌يرانه‌يليگ بيگومان يه‌كمجار حكومه‌ت تازه له‌تى ئه‌گريه‌ێده‌ ئامانج ‌وه‌ل پرووسه‌ى سياسى وه‌ ته‌واوى، ئه‌ويش له‌وه‌ر ئه‌وه‌گ قوناغ ئاينده‌ هه‌وه‌جه‌ وه‌ له‌يه‌كڕه‌سينه‌وه‌ى قويل و شيه‌كرياێ ديرێد وه‌خاتر په‌ڕێنه‌وه‌ ئه‌را ده‌يشت ئه‌مان.

 

ئمجا سه‌ركه‌فتن حه‌شد شه‌عبى و موازره‌ى سوپاى عراقى و هيزه‌يل ئه‌منى وه‌ له‌ناوبردن داعش كاريگه‌رێ فريه‌يگ كرده‌ بان پلانه‌يليگ ك مه‌رام له‌ليان شكه‌ستهاوردنه‌ وه‌ پرووسه‌ى سياسى، وه‌ل وسيان كۆمار ئسلامى له‌ ئيران وه‌ل عراق و پشتگيريكردنى ك ناڕه‌حه‌ ده‌وڵه‌ت ته‌ماحدار كرد ئه‌را زه‌فه‌رهاوردن له‌ عراق و ئاسايشه‌گه‌ێ و سه‌روه‌ريه‌گه‌ێ و بردن سامانه‌يلێ.

 

ملله‌ت عراق بايه‌سه‌ گشيان وه‌بى جياوازێ ئاگاداره‌و بوون، وه‌ ئه‌وه‌گ دوشممن راسكانى ژير وه‌ژير كار ئه‌كا و چه‌وه‌ڕێ ئاساييترين ده‌رفه‌ت و كوڵترين ريه‌ييگ ئه‌كا ئه‌را كاڵين ئاشوو له‌ناونى دو ده‌وڵه‌ت و دو ملله‌ت ك خوينيان تيكه‌ڵه‌و چاره‌نوييان يه‌كيانه‌و ئه‌خا، هه‌ر له‌وه‌ر ئه‌وه‌يش ئويشيمنه‌ گشت هاووڵاتيه‌يل، بنوڕنه‌ دوشمن راسكانى ك هه‌وڵ ئه‌وه‌ ئه‌ياد له‌وه‌ر مه‌رامه‌يل نه‌خوه‌شى جيايى بخاده‌ ناونى ملله‌ته‌يليگ ك دووس يه‌كترى ديرن.

ئه‌سير شه‌رع