هــــه‌واڵ كــوردى
راپرسێ كوردستان له‌ دياله‌ 225 هه‌زار ده‌نگده‌ر ئه‌گرێده‌و

راپرسێ كوردستان له‌ دياله‌ 225 هه‌زار ده‌نگده‌ر ئه‌گرێده‌و


شه‌فه‌ق نيوز/ مه‌سعود دارا وه‌رپرس نويسينگه‌ێ راپرسێ سه‌روه‌خوه‌يى هه‌رێم كوردستان له‌ دياله‌ ئاشكراێ ئه‌وه‌ كرد 225 هه‌زار كه‌س له‌ مه‌ردم ناوچه‌يل خانه‌قين و سه‌عديه‌و جه‌له‌ولا و قه‌ره‌ته‌په‌ و مه‌نه‌لى و جه‌باره‌ ئه‌كه‌فنه‌ وه‌ر راپرسێ سه‌روه‌خوه‌يى كوردستان له‌ عراق و ئاماژه‌ وه‌ واوكردن 10 ناوه‌ند تۆماركردنيش كرد له‌و ناوچه‌يله‌ له‌ پاريزگاگه‌.

 

دارا له‌ لێدوانيگ تايبه‌ت ئه‌را(شه‌فه‌ق نيوز)ئه‌وه‌ ده‌رخست ك نويسينگه‌گه‌ێ ئه‌را ماوه‌ى دو هه‌فته‌سه‌ ده‌سكرده‌سه‌ وازكردن 10 ناوه‌ند تۆماركردن و باسيش له‌ تازه‌كردنه‌وه‌ێ سجله‌يل ئه‌و كه‌سه‌يليشه‌ كرد ك ئه‌كه‌فنه‌ وه‌ر راپرسێ و ئه‌و تازه‌كردنيشه‌ له‌ 20/ 8/ 2017 ده‌س وه‌پيكردگه‌و دوياێ هه‌فت رووژ ته‌مام بويه‌.

 

جى باسه‌، دارا هه‌ميش وت: قوناغ دوياێ تازه‌كردنه‌وه‌ تۆماركردن كارمه‌نده‌يل ده‌نگداين بويه‌ وه‌ل مه‌شقداينيان ئه‌را ئه‌نجامداين راپرسێ، وه‌لێ قوناغ دوياێ ئه‌وه‌يش دياريكردن و داناين چه‌وديره‌يله‌ له‌ لايه‌ن فراكسيۆنه‌يل سياسيه‌و.