وتـــــار
فراكسيۆن گه‌ورا له‌ كوردستانه‌و ئه‌نجام ئه‌گرێد

فراكسيۆن گه‌ورا له‌ كوردستانه‌و ئه‌نجام ئه‌گرێد


شه‌فه‌ق نيوز/ دوياى ئه‌وه‌گ زانستن هويچ چشتيگ له‌وه‌رده‌ميان نيه‌ بيجگه‌ گله‌وخواردن ئه‌را كوردستان، وه‌تايبه‌تدوياى شكه‌ست له‌ جيوه‌جيكردن ياسايى فراكسيۆن گه‌وراى په‌رله‌مانى له‌چوارچێوه‌ى هه‌وڵدانيان وه‌خاتر دامه‌زرانن حكومه‌ت تازه‌، فراكسيۆنه‌يل سياسى شيعه‌و سه‌ركه‌فتگ له‌ هه‌ڵوژاردنه‌يل په‌رله‌مانى عراقى وه‌ قوبڵه‌نمايانه‌و روێ له‌ هه‌رێم كوردستان كردن وه‌تايبه‌ت وه‌ره‌و لاى خود سه‌رۆك مه‌سعود بارزانى، ئه‌ويش له‌ ئاماژه‌يگ ئه‌را ئه‌وه‌گ حزبه‌يل به‌غدا هيمان باوه‌ڕ وه‌ ئه‌وه‌ ديرن ك هه‌ر هاوپه‌يمانييگ ته‌مام نادێ وه‌بى ده‌ور كورد و بارزانى سه‌ركرده‌يان.

 

كورد ئسپات ئه‌وه‌ كرد ك هيمان خايه‌ى ته‌رازويه‌گه‌ى پرۆسه‌ى سياسيه‌، ك شايه‌ت يه‌يش له‌يواكرد هاوپه‌يمانى فه‌ح و ئئتلاف ده‌وڵه‌ت ياسا و بڕيگ تر له‌ فراكسيۆنه‌يل سنى بكه‌فه‌ڕى وه‌ره‌و هه‌ولێر ئه‌را خود سه‌رۆك جوور گاميگ يه‌كه‌م له‌وه‌ر ئاماده‌كارى كه‌شيگ ئه‌را ده‌سوه‌پيكردن دانيشتنه‌يل دامه‌زرانن حكومه‌ت.

 

دوياى چه‌وپيكه‌فتن ئه‌و شانده‌يله‌ وه‌ل‌ وه‌رپرسه‌يل له‌ دوسيه‌ى دانيشتن له‌ هه‌رێم، ده‌نگدوو ئه‌وه‌ بڵاو بوى ك ئى دانيشتنه‌يله‌ گشت دوسيه‌يل ناونى به‌غداو هه‌ولێر واز ئه‌كا.

 

ئيمه‌ گشتمان زانيم ك هان فراكسيۆنه‌يل شيعه‌و سنى ئه‌را هه‌ولێر چشت تازه‌يگ نيه‌، ئه‌گه‌ريش ئى ديده‌ و رويداگه‌ وه‌ل گشت كووايى هه‌ڵوژاردنه‌يليگ نوێنه‌رايه‌تى له‌يه‌كه‌و بيه‌يم و گشت ئه‌و قه‌وڵه‌يل و په‌يمانه‌يله‌ و ريككه‌فتنه‌يله‌ ته‌ماشا بكه‌يم ك ته‌نيا له‌ هه‌ولێر ده‌رئه‌چن وه‌ره‌و به‌غداو هويچ چشتيگ له‌ليان جيوه‌جى نادێ ك وه‌ل كوردستان ئمزاى ئه‌كه‌ن، ئه‌وه‌ بايه‌سه‌ له‌بان لايه‌ن كوردستانى به‌شدار له‌ى گفتوگووه‌يله‌ زياتر مقه‌يه‌ت خوه‌يان بوون و دوجاره نه‌خه‌ڵه‌تيه‌ن، ك ئه‌گه‌ر ئيجاره‌ زه‌فه‌ر له‌ليمان باريه‌ێد ئه‌وه‌ مناگه‌ ئه‌كه‌فێده‌ بان پاكى نيازه‌يلمان و ئه‌و نيازه‌يل خاسه‌ ك ملله‌ت كورد ديرێده‌ى، ك ماناى ئه‌وه‌سه‌ سياسه‌ت چشتيگه‌و پابه‌ندبوينيش وه‌ قه‌وڵه‌يل چشتيگ تره‌، يا وه‌لاى كه‌مه‌و بايه‌سه‌ وه‌و جووره‌ مامڵه‌ وه‌ليانا بكه‌يم ك ئه‌وان ئه‌و مامڵه‌ ئه‌كه‌ن.

 

ئمجا وه‌گووره‌ى ئه‌وه‌گ ئاشكرا كريا، مه‌رج يه‌كه‌م كورد ئه‌وه‌سه‌ ك گشت له‌يه‌كڕه‌سينه‌وه‌يگ وه‌گووره‌ى ده‌ستوور بدێى و گفتگوويش بايه‌سه‌ له‌باره‌ى مافه‌يل كورد بدێ.

 

مه‌سه‌له‌ له‌يرا ئه‌وه‌سه‌ ك گله‌وخواردن ئه‌را ده‌ستوور مه‌رجيگ بنه‌ڕه‌تيه‌ ئه‌را به‌شدارى حزبه‌يل كوردسان له‌ دانيشنه‌يل دامه‌زرانن حكومه‌ت تازه‌، ئى مه‌رج ياسايى و مه‌رجه‌يل تريشه‌ ك قابل ره‌ته‌وكردن نيه‌ وه‌ موباره‌كى يه‌كێتى ئۆرپاو له‌بان خواستى ك بايه‌سه‌ له‌بان كورد داواى زه‌مانه‌ت ناوده‌وڵه‌تى بكا ئه‌را وه‌رگرتن مافه‌يلى له‌و لايه‌نه‌گه‌ى تر ك وه‌ دريژايى ساڵه‌يل فريه‌يگ پشت له‌ى مافه‌يله‌ كردگه‌، ك عراق دوياى 2003 بنيات له‌بان ريڕه‌و شه‌راكه‌ت نريا.

جه‌لال شێخ عه‌لى