له‌ عراق كورد و له‌ هه‌رێميش پارتی

شفق نيوز

 

له‌ عراق تازه‌ فريه‌جار ئه‌را په‌ياكردن ده‌نگ په‌لامار كورد ئه‌دريه‌يد، ئيچنه‌ په‌لامارداينيشه‌ وه‌ هويچ شيوه‌يگ ئاسايی نيه‌ ، شايه‌ت كه‌سه‌يليگ بويشن ئه‌يه‌ ته‌نيا ئه‌را په‌ياكردن ده‌نگه‌، وه‌لی مه‌ترسيه‌گه‌ ها له‌ورا ك له‌ عراق دوسای ٢٠٠٣ كار ئه‌را خوه‌ندنه‌وه‌ی پيكهاته‌يل نه‌ته‌وه‌يی ناكريه‌يد، ئمجا هيزيگ ئه‌گه‌ر بخوازيد وه‌ دژايه‌تيكردن كورد ده‌نگ په‌يا بكا چوين ئه‌تويه‌نيد پشت له‌و ده‌نگده‌ره‌يله‌ بكاو كار ئه‌را دگانناين وه‌ هه‌قه‌يل كورد بكا.

ئه‌و ديمه‌نه‌يله‌ له‌ هه‌رێم كوردستانيش ئه‌كه‌فيده‌ وه‌رچه‌و، ئه‌وه‌سه‌ ئه‌را په‌ياكردن ده‌نگ په‌لامار پارتی ئه‌دريه‌يد، يه‌يش ديد كه‌م ئه‌وزه‌ڵيگه‌، چوينكه‌ ئه‌و هيز سياسيه‌ ك هه‌وڵ ئه‌وه‌ ئه‌ياد ئه‌ندام و لايه‌نگره‌يلی له‌بان دژايه‌تيكردن پارتی هووكاره‌ بكاو له‌ولايشه‌و له‌يوا ره‌فتار بكا ك باوه‌ڕ وه‌ ديموكراسی ديريدو له‌يوا نيشان بيه‌يد ك ئه‌وه‌ پارتيه‌ بويه‌سه‌ گرفت و پشت له‌ راسی ئه‌كا، بايه‌سه‌ ئاگادار بوود له‌وه‌ك ك هووكاره‌كردن ئه‌ندامه‌يل حزب له‌بان دژايه‌تيكردن پارتی مانای ئه‌وه‌ ناڕه‌سنيد ك گشت مه‌ردم كوردستان له‌بان ئه‌و دژايه‌تيكردن پارتيه‌ هووكاره‌ كريانه‌.

ئه‌و دو جووره‌ دعايه‌كردنه‌ له‌ عراق و هه‌رێم كوردستان، وه‌پرسيارێتی گه‌ورايگ مێژوويی ئه‌كه‌فيده‌ بانی، چوينگه‌ ئه‌و جووره‌ ئاراسته‌ كار ئه‌را شيوانن كوومه‌ڵگا ئه‌كاو كه‌سيگ ئه‌يه‌ريده‌ به‌رهه‌م ك باز بيه‌يد له‌بان راسی و قه‌در جياوازيه‌يل نه‌گريد.

جی داخه‌ فريه‌جار هه‌ردوگ ميتۆد"دژايه‌تی كورد له‌ عراق" و"دژايه‌تيكردن پارتی له‌ هه‌رێم" نه‌ف له‌ يه‌كتری وه‌رگرن و به‌رژه‌وه‌نديه‌يليان جوور يه‌كه‌، ك باسه‌ له‌وه‌ ئه‌كه‌ن گوايا خه‌تای پارتيه‌ به‌غدا له‌ هه‌رێم تويڕه‌سه‌و به‌غدا فيشتر دژايه‌تی هه‌رێم ئه‌كاو له‌و كاريشه‌ روی له‌ پارتی ئه‌كاو باوه‌ڕی ئه‌وه‌سه‌ له‌ڕی دژايه‌تی پارتيه‌و ڕی له‌ پيشكه‌فتن هه‌رێم ئه‌گريد، له‌ولايشه‌و ميتۆد "دژايه‌تيكردن پارتی له‌ هه‌رێم" ئه‌ياده‌ سه‌ر خه‌ت و كه‌ی به‌غدا گيچه‌ڵ وه‌ هه‌رێم ئه‌كا، ئه‌ويش له‌ پارتی قينی هه‌ڵسيه‌يدو گشت ئه‌يانه‌يش له‌وه‌ گرده‌و ئه‌كه‌ن ك ئه‌گه‌ر نگه‌رانی و دڵته‌نييگ بخريه‌يده‌ ناو مه‌ردم ئه‌وه‌ پارتی له‌لی وه‌رپرسياره‌، له‌ليانيش هه‌ن ئويشن هه‌ر پارتی نه‌خش له‌ نه‌هيشتن نگه‌رانی نه‌يريدو ئيمه‌يش به‌شداريم، ئمجا كيشه‌گه‌ ئه‌وه‌سه‌ ك دو ئاراسته‌سه‌و دژايه‌تيكردنه‌گه‌يش كردنه‌سه‌ ئه‌رك رووژانه‌و كارنامه‌ی سياسييان له‌بان ئه‌و دژايه‌تيكردنه‌ دامه‌زرنن، وه‌لی ئه‌و هه‌ردوگ ميتۆده‌يل دژ كورد و پارتيه‌ چه‌نيگ باوه‌ڕيان ئه‌وه‌ بوود ك وه‌و شيوه‌ ده‌سكه‌فتيان دويننه‌و، ده‌ ئه‌وه‌نه‌يش شانازيه‌يل پارتی كه‌ڵه‌كه‌ بوون، چوينكه‌ بيئاگان له‌وه‌ك شيواز دژايه‌تيكردنه‌گه‌يان كورد و پارتی خسته‌سه‌ سه‌وه‌ته‌يگه‌و، ئمجا چه‌نيگ سه‌خته‌ له‌و ژينگه‌ ك پارتی شانازی چنيده‌و هه‌وڵ فراوانكردن به‌ره‌ی دژه‌ پارتی بدريه‌يد؟

دڵشاد مسته‌فا وه‌سانی

ج . أ