كووچكردن وه‌ره‌و فیدراڵیه‌ت

شفق نيوز

  ئه‌و فیدراڵیه‌ته‌ ك زوورم عه‌ره‌به‌یل عراق وه‌ هه‌ردوگ پیكهاته‌ى شیعه‌و سنى جى ره‌زامه‌نى نه‌وى له‌لیان و گشت وه‌ختیگ وه‌گشت خوسه‌و كینه‌تیگه‌و ره‌تیه‌و كردیان و هه‌ر هه‌وڵ ئه‌وه‌ دیان ده‌سڵات ته‌كڕه‌وى و تونڕه‌وى بنبڕ نه‌ودو هه‌میشه‌ سته‌م و چه‌وسیان له‌ساى دیكتاتۆریه‌ت وه‌رده‌وام بوود، ئه‌وه‌سه‌ خه‌ریكه‌ خاوه‌ن خود ئه‌و ئه‌قلیه‌ت شۆفێنى و خاوه‌ن ئه‌و هویر وڕاى نه‌خوه‌شه‌ ك دژایه‌تى ئه‌و سستم سه‌رفرازیه‌ كردیان ئیسه‌ وه‌ زوور و كووچكردن وه‌ یه‌كترى چه‌سپننه‌ى وه‌بى ئه‌وه‌ك دگان وه‌و راسیه‌ بنه‌ن ك زویتر كورد و بڕیگ له‌ لایه‌نه‌یل پیشكه‌فتنخواز له‌ژیر چه‌تر ئاسووده‌یى هه‌وڵ وه‌رده‌وام ئه‌ڕاى دان.

ئاشكراس له‌لاى گشتمان ك سستم فیدراڵیه‌ت نزیكترین رییگه‌ ئه‌را قورتاربوین له‌ ده‌س سته‌م و چه‌وسیان گوزه‌یشته‌و گله‌ونه‌خواردن ئه‌را ژیر ساى حوكم دیكتاتۆریه‌ت، وه‌ل ئه‌وه‌یشا فیدراڵه‌یت بووده‌ وه‌ربه‌سیگ له‌وه‌رده‌م كرده‌وه‌یل ترۆریستى و هاتنه‌وه‌ى له‌ناوبردن و كوشتن وه‌جه‌م و گشت ئه‌و ده‌رده‌سه‌ریه‌ ك له‌لایه‌ن رژیم و ده‌سڵات به‌عسیه‌یل عه‌فله‌قى هاتیاده‌ تویش گشت ملله‌ت و پیكهاته‌ى ئى وڵاته‌.

ئویشن ئه‌قڵ ئه‌را ئاده‌میزاد چاره‌سه‌ر گشت گرفتیگه‌، وه‌لى جى داخه‌ نوڕید ئه‌و ئه‌قڵه‌ ك خوداى گه‌ورا وه‌ په‌تى داسه‌ى ئه‌را وه‌دیكرن ژیانیگ ئارام و ئاسووده‌و دویر له‌ كیشه‌و گرفت، عه‌ره‌ب عراق وه‌گشت ئه‌قڵیه‌تیگ حاشا له‌لى كردنه‌و مه‌یل ئه‌وه‌ نه‌یرن وه‌بى داین قوربانى و خوین و كوشتار بكه‌نه‌ى دروشم سه‌رفرازى و خه‌یر له‌ساى بوینن!!

راسه‌ ده‌س ده‌ره‌كى و نه‌خشه‌و پلان بڕیگ له‌ وڵاته‌یل هه‌رێمى ده‌س باڵایگ دیرن له‌ شیوانن شیرازه‌ى ته‌بایى و له‌ناوبردن ژیان هاوبه‌ش و پشتگیریكردن ترۆر و كرده‌وه‌یل نائنسانى وه‌خاتر مه‌رام تایبه‌ت، وه‌لى یه‌یش ماناى ئه‌وه‌ نیه‌ ئى وڵاته‌ وه‌رده‌وام بكه‌فیده‌ ژیر شمشیر ناهه‌قى و نا ئارامى، به‌ڵكوو هه‌ر له‌شوون رمیان رژیم وه‌رین بایه‌س بوى عه‌ره‌ب عراق وه‌گشت خوه‌شاڵییگه‌و پیشوازى له‌ دیموكراسى و فیدراڵى بكردیان و ئى عراقه‌ وه‌ ده‌سایس فه‌رمانڕه‌وایه‌یل و ده‌وڵه‌ته‌یل تر عه‌ره‌بى نه‌كردیانه‌ مه‌یدان كوشتار و كیشمه‌كیش و سه‌ربڕین ئاده‌میزاد بیتاوان.

مه‌رام باسه‌گه‌م له‌یرا ئاشكراو دیاره‌، ئه‌و جیاییه‌ ك ئه‌وسا وه‌په‌تى و سووك و ئاسان هاته‌ وجوود ئه‌را عه‌ره‌به‌یل ئى وڵاته‌و ره‌تیه‌و كردیان، ئیسه‌ وه‌ هه‌ڕه‌شه‌ى كوشتن و خوینڕشانن خه‌ریكه‌ جیوه‌جى كریه‌ید!

ئیسه‌ له‌ناوچه‌یل سنى وه‌ ئاشكرا شیعه‌ بار كریه‌یدو له‌بڕیگ ناوچه‌ى شیعه‌نشینیش عه‌ره‌ب سنى شوون وه‌خوه‌یان نیه‌خڕن و متمانه‌ نه‌یرن له‌تى بمینن، ئى مه‌سه‌له‌یشه‌ وه‌ ئاشكرا ره‌نگه‌و داگه‌و ته‌نانه‌ت له‌ ئاكام ئه‌و هه‌ڕه‌شه‌یله‌ ك له‌پیكهاته‌ى شه‌به‌ك كریا له‌وه‌رجه‌ ماوه‌یگ له‌ شار موسڵ ك بویه‌ مایه‌ى كووچ وه‌پیكردن زووره‌ملى سه‌ده‌ها خیزان، ئیسه‌یش وه‌قسه‌ى دیوان وه‌قف سنى، له‌ پاریزگاى به‌سره‌ ده‌سكریاسه‌ هه‌ڕه‌شه‌كردن له‌ خیزانه‌یل سنى و سه‌رله‌نوو مه‌سه‌له‌ى تایفى خریاسه‌ خانه‌ى جیوه‌جیكردن و لانه‌ویزكردن.

ئنجا خاستر ئه‌وه‌سه‌ ئى هه‌ڕه‌شه‌و كووچ وه‌پیكردن وه‌رده‌وام ناونى شیعه‌و سنى عه‌ره‌به‌ دریژه‌ كیشیدو ئه‌گه‌ریش وه‌ ئه‌قڵ و هویروڕاى دروسیگه‌و نه‌چنه‌ پیرى فیدراڵیه‌ت و پیشوازى خاسیگ له‌لى نه‌كه‌ن ئى كووچكردنه‌ نه‌كه‌نه‌ كووچكردن وه‌ره‌و فیدراڵیه‌ت، ئه‌وه‌ بیگومان ئاقبه‌ت خراوتر له‌لى كه‌فیده‌و، وه‌لى ئیمه‌ ئومیده‌واریم ئى ملله‌ته‌یل سته‌مدیده‌ى عراقه‌ وه‌ زویترین وه‌خت بكه‌فنه‌ ساى خوه‌شى و ده‌س ترۆر زاڵ نه‌وده‌ بان گشت بواره‌یل ژیانیان.

جه‌ماڵ ئه‌ركوازى