به‌غدا له‌ ناوبه‌ین گه‌نى خزمه‌تگوزارى و باس چه‌مه‌نده‌فه‌ر هه‌وایى

شفق نيوز

دیرى ئه‌را سووكترین خزمه‌تگوزاریه‌یل شاره‌وانى و ته‌ندروستى و په‌روه‌رده‌یى و ڕووشنهویرى، ئمڕوو باس هاوردن و دامه‌زرانن چه‌مه‌نده‌فه‌ریگ هه‌وایى كریه‌ید ك وه‌ دریژى 25 كلم له‌ هه‌ردوگ لاى كه‌رخ و ره‌سافه‌وه‌ ڕه‌د بوود، وه‌لى جاده‌یل سه‌ره‌كى پایته‌خت جوور ڕه‌شید و سه‌عدون و ئه‌بو نوئاس مه‌ته‌ڵ گه‌نه‌وبوین خزمه‌تگوزاریه‌یل گرنگ  جوور پاكه‌وكردن و قیلتاوكردن باس كه‌ن؛ ئه‌وه‌ بیجگه‌ نه‌یاشتن داموده‌زگایه‌یل ژیارى گشتى.

ئه‌ندام ئه‌نجوومه‌ن پارێزگاى به‌غدا گۆرگیس به‌روارى له‌ په‌یوه‌ندییگى وه‌ل ماڵپه‌ڕ شه‌فه‌ق ئه‌وه‌ ڕه‌ته‌وكرد ك ئه‌نجوومه‌ن پارێزگاى به‌غدا په‌یوه‌ندى وه‌ پرۆژه‌ى چه‌مه‌نده‌فه‌ر هه‌وایى داشتوود ك باس دامه‌زراننى كریه‌ید و وت:"ئى پرۆژه‌ ها وه‌ده‌س شاره‌وانى به‌غدا(ئه‌مانه‌ت به‌غداد) و ئه‌نجوومه‌ن پارێزگا هویچ په‌یوه‌ندییگ وه‌پیه‌و نه‌یرى".

به‌روارى زیاتریش وت:"ئه‌و شاند یا وه‌فده‌ ك ئه‌را فه‌ره‌نسا سه‌فه‌ركرد ئه‌را گریه‌دان بۆند یا عه‌قدیگ وه‌ل كۆمپانیایگ په‌یوه‌ندیدار، له‌ شاره‌وانى به‌غدا بوى وه‌ به‌شداریكردن چه‌ن ئه‌ندامیگ له‌ ئه‌نجوومه‌ن پارێزگاى به‌غدا".

به‌روارى ئاماژه‌یش وه‌ واقع گه‌ن خزمه‌تگوزارى پایته‌خت دا و وت:"ئیمه‌ هه‌وه‌جه‌ى گه‌ورایگ دیریمن ئه‌را پیشكه‌شكردن خزمه‌تگوزارى جوور پاكه‌وكردن و هه‌ڵگردن زڕ وزباڵه‌ى پایته‌خت، و وه‌ڕاسى له‌ى باوه‌ته‌ كه‌مته‌رخه‌مى هه‌س".

محمد الربیعى سه‌رۆك لوجنه‌ى پلانداناین ستراتیجى له‌ ئه‌نجوومه‌ن پارێزگاى به‌غدا زویتر وت:"ده‌سته‌ى وه‌به‌رهاوردن یا ئستسمار به‌غدا  یاداشتنامه‌یگ سه‌ره‌تایى ئه‌را ماوه‌ى 180 ڕووژ وه‌ل كۆمپانیاى ئه‌لستۆم فه‌ره‌نسى ئمزاكرد ئه‌را جیوه‌جیكردن پرۆژه‌ى چه‌مه‌نده‌فه‌ر وه‌داره‌وكریاى به‌غدا ". و ئه‌وه‌یشه‌ ڕووشنه‌وكرد ك :" ئى پرۆژه‌ یه‌كیگه‌ له‌ پرۆژه‌یل مه‌زن، چوینكه‌ ئى چه‌مه‌نده‌فه‌ره‌ وه‌ دریژى 25 كلم وه‌هه‌ردولاى ڕه‌سافه‌ و كه‌رخه‌وه‌ ڕه‌د بوود".

زیاتریش وت:" داهاته‌یل ئى پرۆژه‌ هاوبه‌شه‌ له‌ ناوبه‌ین پارێزگاى به‌غدا و فه‌رمانگه‌ى خه‌ت ئاسنین (سكه‌ك) و كۆمپانیاى جیوه‌جیكه‌رى". و ئاماژه‌یش وه‌وه‌دا ك:" ئامانج نه‌خشه‌دانان ئى پرۆژه‌ كه‌مه‌وكردن قه‌ره‌باڵغ و نه‌قڵ كردن هاووڵاتیه‌یله‌ وه‌ شیوه‌ یگ  خێراتر ئه‌را ناوچه‌یلیگ زیاتر پایته‌خت".

له‌لاى خوه‌یه‌و به‌ڕێوه‌به‌ر فه‌رمانگه‌ى ڕه‌سانن له‌ شاره‌وانى به‌غدا حه‌كیم شاكر له‌ په‌یوه‌ندییگى وه‌ل ماڵپه‌ڕ شه‌فه‌ق ئه‌وه‌ ڕه‌ته‌و كرد ك شاره‌وانى به‌غدا ئاگاى له‌ پرۆژه‌ى چه‌مه‌نده‌فه‌ر هه‌وایى بوود  وت:"شاره‌وانى به‌غدا یه‌ سێ ساڵه‌ مه‌سه‌له‌ى مترۆ وه‌رگردیه‌ ك دو ڕى دیرى یه‌كم وه‌دریژى 20 كلم و دویمیش وه‌دریژى 19 كلم و بۆندیگ وه‌ل یه‌كیگ له‌ كۆمپانیایه‌یل جه‌هانیه‌و ئمزاكریا و وه‌ل كۆمپانیاى "سسته‌ره‌"ى فه‌ره‌نسى ك شاره‌وانى به‌غدا وه‌رجله‌ ساڵیگ بۆندیگ ئمزاكردیه‌، و ئى كۆمپانیا كار ئه‌را ئه‌وه‌ كه‌ید ك له‌یه‌كه‌وداین یا دراسه‌تیگ ته‌واو پیشكه‌ش بكه‌ید ئه‌را داناین گشت كه‌ره‌سته‌یل جیوه‌جیكردن پرۆژه‌ى مترۆ له‌ چوارچیوه‌ى شار به‌غدا".

له‌باوه‌ت واقع خزمه‌تگوزارى ك وه‌گووره‌ى هه‌وه‌جه‌ى هاووڵاتیه‌یل نیه‌ حه‌كیم شاكر وت:" پلانیگ هه‌س ئه‌را دروسكردن 9 وێستگه‌ یا مه‌حه‌ته‌ى ته‌حویلى له‌ به‌غدا وه‌ل دو كارخانه‌ى جیاوه‌كردن یا فه‌رزكردن زڕوزباڵه‌، و سێ وێستگه‌ له‌لیان ته‌واوكریان و ئمساڵ 9 وێستگه‌ى ته‌حویلى ته‌واوكریه‌ید و شوون وێستگه‌یل كۆنه‌ى به‌غدا گرن".