فه‌یله‌یل ..دكتاتۆر..دكتاتیر!!

شفق نيوز

كاره‌ساتیگ خراوتر ئه‌یه‌ێده‌ تویشیان و نه‌وه‌ له‌شوون نه‌وه‌ خراوتر دویننه‌ چه‌و، ته‌نانه‌ت ئه‌گه‌ر بخه‌نستنیانیش داواى وه‌خشین له‌خودا كه‌ن، چوینكه‌ وه‌گوره‌ى هویروباوه‌ڕ گه‌ورا ساڵه‌یلیان باوه‌ڕیان ئیچنه‌سه‌ له‌شوون ئه‌و خه‌نستنه‌ مه‌ویسى دوینن.

تاریخ كویه‌ن ك له‌تازه‌وه‌ نویسیه‌ید! ئویشێد ئه‌یانه‌ نه‌وه‌یل سۆمه‌ریین، ك له‌یرا وه‌خت باسكردنى نیه‌، وه‌لى ناوچه‌ى خوه‌رهه‌ڵات دجله‌ كورد فه‌یلى بویه‌، له‌مه‌نه‌لى(به‌نده‌نیج)تا شۆرجه‌(شوره‌ جا- ناوچه‌ى شوره‌كات)، وه‌ل ئه‌وه‌یشا ناو گشت شار و ئاوایه‌یلیش كوردى فه‌یلى بویه‌ جوور(خانه‌كیو، شه‌هربانو، وه‌رازه‌ڕوو...هتد)ك تائیسه‌یش شار سۆمار له‌مه‌رز عراق و ئیران نموونه‌ى ئى ناوه‌یله‌سه‌، ك ئه‌ویش له‌شوون داناین و دیاریكردن مه‌رز كه‌فته‌ به‌ش ئیران وه‌نا سۆماریش له‌عراق بویاتاد ناوه‌گه‌ى ئاڵشت كریا له‌وه‌خت عه‌فله‌قى.

له‌شوون كوده‌تایه‌یل نه‌ته‌وه‌په‌رسه‌یل و سته‌م و سیاسه‌ت وه‌عه‌ره‌بكردن و كووچ وه‌پیكردن و ده‌ركردن زووره‌ملى، مه‌رده‌م ره‌سه‌ن ئى شاره‌یله‌ جوور بیگانه‌ له‌ناو خاك خوه‌یان ته‌ماشا كریان و هه‌میشه‌ كه‌فتیانه‌ وه‌ر هه‌ڕه‌شه‌و فشار حكوومه‌ت.

ئه‌وه‌ بوى حوكم به‌عس هه‌ر له‌سه‌ره‌تاى ده‌سڵاتیان په‌یان خوه‌یان ئاشكرا كردن ك پڕ بوى له‌ شۆڤێنیه‌ت و تونڕه‌وى و خوسه‌و كینه‌ت و ئه‌نجامداین تاوان، ك فه‌یلیه‌یل له‌ژیر ده‌سڵاتیان كه‌فتنه‌ وه‌ر گه‌وراترین كاره‌سات و تائیسه‌یش خه‌وه‌ر نه‌یرن جایه‌ڵ جوانه‌یلیان له‌كوورا نریانه‌سه‌ قه‌ور و چوین بڕیگ له‌لیان خریانه‌ وه‌ر تاقیگاى كیمیاوى و ئایا چه‌نیگ له‌لیان كوشت له‌وه‌خت بردنیان وه‌ره‌و مه‌رز ئیران له‌ڕییگ مینڕیژكریاى!

بیگومان شماره‌ى كه‌میگ له‌لیان هاته‌و ئه‌را عراق، چوینكه‌ یاساى پڕ له‌ڕه‌حمه‌ت ئۆرپى و ئه‌مریكى و كه‌نه‌دى و ئوسترالى ره‌حم له‌خوه‌یان و روڵه‌یلیان كردو ملیۆن جار خاستر بوى له‌دادگه‌رى عروبیه‌یل و موسڵمان، ك ئسلام له‌لیان دویره‌.

له‌وه‌ختیگیش رژیم ئاڵشت بوى، بڕیگ له‌كورده‌یل فه‌یلى هه‌ناس خوه‌شى هه‌ڵكیشان، چوینكه‌ ئیسه‌ تویه‌نن وه‌ئازادى سینه‌ بكوتن و سه‌ردان مه‌زارگه‌ى ئیمامه‌یل و قه‌ور باوگ وباپیره‌یلیان بكه‌ن له‌نه‌جه‌ف و هوكاره‌ى مناڵیان بكه‌ن له‌بان ئى چشته‌یله‌ وه‌بى ئه‌وه‌ك داواى ناسنامه‌ له‌لیان بكریه‌ێد.

له‌یرا له‌سه‌رده‌م عراق تازه‌یش ته‌ماشاى شیواز هه‌ڕه‌شه‌كردن بكه‌ن جوور شیواز عه‌سابه‌یل هاغاناو شتێرن سه‌هیۆنى ك دێر یاسین سه‌ربڕى ك ئاواییگ فلستینیه‌. ئیمه‌ له‌یرا هویچ چشتیگ شك نیه‌وه‌یم ته‌نیا ئه‌وه‌ نه‌ود ك قسه‌ى ئه‌و ئه‌دیب كورده‌ دوباره‌و بكه‌یم له‌وه‌ختیگ ده‌سه‌یلى به‌رزه‌و كرد وه‌ره‌و ئاسمان له‌ناو ئه‌و هه‌مگه‌ كوشتار و هاوار هه‌ڵه‌بجه‌و وت: خودا ئه‌یان كورد خوه‌دن ئه‌ى خودا!!

 

سوبحى مه‌نده‌لاوى
ج