به‌شیه‌و بكه‌ن تا له‌ێه‌ زیاتر خوێن نه‌ڕشیه‌ێ

شفق نيوز

به‌عزێگ باس نه‌خش وڵاته‌یل له‌ پشتگیری داعش ئه‌كه‌ن له‌ لایه‌َن ڕژیم سیاسی قه‌ته‌ر یا له‌ڕێ توركیه‌وه‌ ، یه‌یش له‌ وه‌ختێگه‌ په‌نجه‌ێ تومه‌ت ئه‌ڕا سعودیه‌یش درێژ كریه‌ێ جور سه‌رچاوه‌ێگ سه‌ره‌كی ئه‌ڕا كل كردن جه‌نگاوه‌ر و خوه‌ێ كوژه‌یل ، وه‌ل بوین ده‌یان كومه‌ڵه‌ێ خێر خواز ك پشتگیری ماڵى له‌و ڕێكخراوه‌یله‌ ئه‌كه‌ن ، له‌ وه‌ختێگ سه‌رجه‌م لاێه‌نه‌یل چه‌ویان له‌ سوریه‌ بوێ و چاودێری جم وجوێل داعش له‌ شوونێگ ئه‌ڕا شوونێگتر كردیان ، واشنتون له‌ ئه‌وپه‌ر شه‌رمه‌زاری بوێ وه‌ختێگ بوردومانه‌یل سنوردار داعش كردیاد ئه‌ڕا نوا گردن له‌ پێشڕه‌وی كردنێ ، له‌ حاڵێگ داعش زیاتر وه‌هێزه‌و بوێ و وه‌ره‌و ناوچه‌یلتر پێشڕه‌وی كرد ، دویاێ ساڵێگ له‌ بوردومان هێزه‌یل هاوپه‌یمان ناوده‌وڵه‌تی وه‌ سه‌ركرده‌یی ئه‌مریكا و جه‌نگ توند له‌ ناونی هێزه‌یل حكومه‌ت و چه‌كداره‌ توندڕه‌وه‌گان ، ڕومادی پایته‌خت ئه‌نبار وه‌ته‌واوه‌تی كه‌فته‌ ده‌س داعش ، و ئه‌مریكا بێجگه‌ لێدوانه‌یل یا ته‌سریحه‌یل ڕه‌شبینانه‌ و جار جارێگ گه‌شه‌بینانه‌ ، هوێچ كارێگ ئه‌ڕا به‌رزه‌و كردن وره‌ێ هێزه‌یل عراقی یا حكومه‌ت عراقی نه‌كرد.

سه‌روك په‌رله‌مان سه‌لیم جبوری نائومیدی خوه‌ێ نیشاندا له‌ وه‌راوه‌ر شكسته‌یل په‌یه‌ڵپه‌ێ سوپای عراق له‌ سه‌رجه‌م جه‌بهه‌یل جه‌نگ دژ وه‌ داعش و پێشبینی كرد له‌حاڵه‌ت سزا نه‌داین ئه‌وانه‌گ له‌ داگیر كردن موسل و دویاخر ڕومادی وه‌رپرس بوێنه‌ ، سوپای عراق هه‌ڵوه‌شێه‌یگه‌و ، وه‌لێ له‌و لاوه‌ نه‌خش هێزه‌یل حه‌شد شه‌عبی ڕوژ وه‌ ڕوژ زیاتر بته‌وه‌و بووگ و كه‌م كه‌م نیشتگه‌ بووگه‌ سوپاێ خاوه‌ن تواناێگ و بوێه‌ هوكارێگ ئه‌ڕا نوا گردن له‌ داڕمیان سوپای عراق و چاره‌سه‌ر كردن ، هه‌ڵه‌یل وه‌زاره‌ێ وه‌رگری ك له‌ دو ساڵ ئێ دویاخره‌ كه‌ڵه‌كه‌ بوێن و بوێه‌ بایس داگیر كردن چه‌ندین شار له‌ لاێه‌ن داعشه‌وه‌ وه‌ ده‌س ناین له‌ بان چه‌ك و ساز وبه‌رگ سه‌ربازی ك به‌سه‌ ئه‌ڕا چه‌كدار كردن سوپای چه‌ن وڵات.

وڵاته‌یل ده‌وروه‌ر عراق ، ئێقه‌رگه‌ حه‌ماس ئه‌ڕا یه‌كگرتگی خاك عراق نه‌ێرن ، له‌وه‌ر ئه‌وه‌گ هه‌میشه‌ وڵاتێگ پر له‌ جه‌نگ وقه‌یران  و پاشا گه‌ردانی و هه‌میشه‌ پێكهاته‌گانێ هانله‌ ململانێ و هه‌میشه‌ ده‌سڵات داره‌یل ئێ وڵاته‌ مه‌یل چه‌سپانن ڕژیم دكتاتوری و ده‌س درێژی كردن له‌ بان وڵاته‌یل هاوسا دێرن ، شاێه‌دیش به‌ش به‌شه‌و كردن عراق وه‌نه‌ف به‌عزێ له‌ سه‌ركرده‌یل ئه‌و ولِاته‌یله‌ بووگ ، هه‌رچه‌ن ك شایه‌دیش ئه‌و به‌شه‌و كردنه‌ بووگه‌ سونه‌تێگ و یه‌كگرتگی وڵاته‌یل هاوسایش ته‌هدید بكه‌ێگ و بكه‌ێگه‌یانه‌ وڵاته‌یل بوێچگ بوێچگ.

فه‌ره‌ كه‌س و لاێه‌ن و وڵات هانه‌و باوه‌ڕه‌ ك بارودوخ عراق ڕه‌سیه‌سه‌ بن به‌س و به‌ش به‌شه‌و كردن ئێ وڵاته‌ باێه‌د ئه‌نجام بگرێ ، ئه‌ڕا نوا گردن له‌ خوێن ڕێژی وه‌تایبه‌ت دی وه‌یه‌كه‌وه‌ ژیان له‌ ناونی پێكهاته‌ نه‌ته‌وه‌یی و مه‌زه‌ویه‌گان مه‌حاڵه‌و بوێه‌ ، كورد وه‌رده‌وامه‌ له‌ پروژه‌ێ جیاوه‌ بوێن ، عه‌ره‌به‌یل شیعه‌ و سوننه‌ دی نیه‌توێه‌نن وه‌ل یه‌كا هه‌ڵبكه‌ن له‌ سایه‌ێ بوێن ڕێكخراوه‌یل ئاینی توندڕه‌و ك گشت چشت له‌ عراق وێران كردنه‌ و ململانی و ڕویداگه‌یل وه‌ره‌و به‌ش به‌شه‌و كردن ئاراسه‌ كریه‌ن.

هادی جلو مه‌رعی

ج ك