وه‌رجه هه‌ر دوشمنیگ تر خوه‌مان دوشمن خوه‌مانیم
یه‌كه‌م دوشمنمان وه‌رجه گشت چشتیگ تویڕه‌یى و گووشداینه وه گومان و دویره‌وگرتنه له یه‌كسانى هه‌قه‌یل و ئه‌نجامداین سیاسه‌ته‌یل ناهه‌قى و كوتان ته‌بڵ جه‌نگه وه‌بى هووكار، دى نازانیم چوین چاره‌سه‌ر ئى نه‌خوه‌شیه بكه‌یم مه‌گه‌ر وه‌كوشتن نه‌خوه‌شه‌گه.
كوشتن مه‌سه‌له‌ى مه‌ترسیداریگه‌و خودا وه گووره‌ى شه‌رع دایناگه‌و نه‌بایه‌د وه فه‌تواى ناوه‌جى سه‌رپیچى له‌لى بكه‌یم یا وه‌گووره‌ى بڕیاره‌یل وه‌رده‌وام. جى داخه كوشتن له عراق ماوه‌ى فره‌یگ وه‌رده‌وام بوى، ك ئایا چشت خاسیگ له‌لى كه‌فته‌و بیجگه مردن و كاولكارى و خوینڕشانن؟ ئایا بویه مایه‌ى چشت خاسیگ له زه‌لگاوه‌یل و راپه‌ڕین شه‌عبانیه‌و ئه‌نفال و هه‌ڵه‌بجه‌و به‌غداو به‌سره‌و سامه‌ڕاو حله‌و نه‌ینه‌واو دوجێل و فه‌لوجه‌و حه‌ویجه‌و كه‌ركووك و دوزخورماتو و ته‌لعه‌فه‌ر و شوونه‌یل تر؟ ئایا جه‌نگه‌یلمان وه‌ل ئیران و كوه‌یت چشت خاسیگ له‌لى كه‌فته‌و؟ ئایا ئه‌گه‌ر جه‌نگ تازه په‌یا بوود له‌ناونى خوه‌مان ژیان و حاڵمان خاستره‌و بوود؟
ئنجا ئه‌گه‌ر هه‌ركه‌سیگ له ئیمه وه دوشمن ته‌ماشاى ئه‌واكه‌ى تر بكاو ئه‌واكه‌یش تریش وه پلاندانه‌ر ته‌ماشاى لایه‌ن وه‌رانوه‌رى بكا، ئه‌وه بیگومان ئیمه وه‌ره‌و جه‌نگ گام نه‌یم و گشتمانیش ناهه‌قیم له به‌رپاكردنى.
ئمڕوو ده‌نگ نه‌شاز له ده‌نگ ئه‌قڵ باڵاتر بویه‌و ده‌س گرته‌سه بان خوه‌ینیشانداینه‌یل ئاشتیانه‌و ده‌نگ تویڕه‌ییش زاڵ بویه‌سه بان ده‌نگ وه‌رپرسیارێتى و دانایى و زوورم قسه‌و لێدوانه‌یل ناوه‌جى و ناهه‌قیه‌و خوازیار كوشت و كوشتاره وه‌بى له‌وه‌رچه‌وگرتن رینمایه‌یل شه‌رعى و ده‌ستوورى.
ته‌نیا هه‌قیگ ئه‌وه‌سه ك وه‌رگرى له ئاسایش و ئازادى و به‌رژه‌وه‌ندیه‌یل ره‌وامان بكه‌یم وه‌بى جیاوازى، هه‌ر له‌وه‌ر ئه‌وه‌یش بایه‌سه روى وه‌ڕوى ترۆر و تون وتیژى بویمنه‌وه‌و بگه‌ردیمنه شوون هه‌قه‌یلمان ، هه‌ر له‌وه‌ر ئه‌وه‌یش هویچ رییگ تر له‌وه‌رده‌ممان نیه ته‌نیا گفتگوو نه‌ود له‌وه‌رخاتر بنیاتناین ده‌زگایه‌یل ده‌ستوورى ده‌وڵه‌ت تا بنبڕ خراوه‌كارى بكا و ڕى له كه‌ناته‌كاره‌یل بگرید چ هاووڵاتى چ وه‌رپرسه‌یل جوور ئه‌وه‌ك ده‌وڵه‌ته‌یل پیشكه‌فتگ په‌یڕه‌وى كه‌ن له جه‌هان.
عادل عه‌بدولمهدى
ج . أ
