میدیا سه‌رچه‌وه‌ى تون وتیژى

شفق نيوز

زوڵم و زوور میدیا ته‌نیا نیشانداین فیلمه‌یل تون وتیژى و خوینڕشانن نیه‌، به‌ڵكوو له‌ شیواز وه‌كارهاوردن زووانیگ ئه‌را هویره‌و كردن و قسه‌كردن له‌بان دونیاو ده‌وروه‌ر و رویداگه‌یلى، خوه‌ى له‌ خوه‌ى هه‌ڵگر تون و تیژیه‌ له‌ فكره‌و ده‌رخستنى، ك یه‌یش وه‌ ئاشكرا له‌ زووان میدیایى و ره‌سمه‌یل ره‌نگه‌و داگه‌.

هه‌ر وه‌و خاتریشه‌ دوینیم ك زوڵم و زوور و تون وتیژى ئه‌نجام دریه‌ید تا جارجاریگ جوور به‌رهه‌م میدیایه‌یل هساو بكریه‌ید، ئه‌را نموونه‌: ئه‌گه‌ر میدیایه‌یل ئیمه‌ هه‌میشه‌ هه‌واڵ خوه‌یكوشتن ژنه‌یل و جایه‌ڵ جوانه‌یل بكه‌نه‌ سه‌رباس هه‌واڵه‌یل مه‌یلكیش له‌وه‌ر كیشه‌ى خیزانى و كیشه‌یل تر كومه‌ڵایه‌تى، ئه‌وه‌ بیگومان روخسار مه‌تسیداریگ دیرید له‌وه‌ك خوه‌یكوشتن بووده‌ دیارده‌یگ ئاسایى رووژانه‌.

راسه‌ حاڵه‌ت خوه‌یكوشتن وه‌ مانایگ تر مه‌سه‌له‌ى وجوود كیشه‌ى ده‌روینیه‌، وه‌لى بڵاوكردنه‌وه‌ى وه‌رده‌وام ریژه‌ى ئه‌و خوه‌یكوشتنه‌یله‌ هانده‌ریگه‌ ئه‌را زیایبوین ریژه‌ى خوه‌یكوشتنیش، یه‌یش بیجگه‌ ئه‌وه‌ك هه‌رچه‌نى حاڵه‌ته‌یل خوه‌یكوشتن كیشه‌یلیگن ده‌روینى و كومه‌ڵایه‌تى و ئابوورى، وه‌لى بڕیارداین و هانده‌ر له‌ زیایبوینى هه‌واڵه‌یل خوه‌یكوشتنه‌.

له‌یرا دوینیم خوه‌یكوشتن جوور مه‌سه‌له‌یگ تون وتیژى چ له‌ خود رویداگه‌س چ له‌بڵاوكردنه‌وه‌ى هه‌واڵه‌گه‌س. راسه‌ ك شایه‌ت ئامانج له‌ بڵاوكردن هه‌واڵ خوه‌یكوشتن زه‌نگ هوشیاركردنه‌وه‌ى لایه‌ن په‌یوه‌ندیدار بوود له‌ حكوومه‌ت، وه‌لى دویاخر جووره‌ هانداینیگه‌ له‌ هویر و باوه‌ڕ خوه‌یكوش وه‌تایبه‌ت له‌لاى چینه‌یل كه‌م ئه‌زموون و ناخاڵه‌و جایه‌ڵ جوانه‌یل.

دى نوڕید مه‌یلكیشان راى گشتى و حكوومه‌ت ئه‌را گرفت و كیشه‌ى تر جوور بیكارى یا كیشه‌ى خیزانى هانده‌ر و ریخوه‌شكه‌ره‌ له‌ ئاساییكردن مه‌سه‌له‌ى خوه‌یسزانن یا خوه‌یكوشتن، له‌لایگیشه‌و گرینگیداین وه‌ خوه‌یكوشتن له‌لاى مه‌ردمانیگ له‌ كومه‌ڵگاى ئیمه‌ بووده‌ میكانیزمیگ نادروس و نه‌گونجیاگ ك هه‌ركه‌سیگ حه‌ز له‌لى بكا یا خوازیاریه‌ په‌نا بووه‌یده‌ وه‌ر خوه‌یكوشتتن له‌وه‌ر ئه‌وه‌ك ده‌نگدانه‌وه‌و كاریگه‌رى سه‌ختیگ دیرید له‌بان راى گشتى!

ماناى ئه‌وه‌سه‌ میدیا بزانید و نه‌زانید، هانده‌ر و به‌شداریكه‌ره‌ له‌و پرووسه‌ى نائنسانیه‌ ك پیش ئه‌یاد ئه‌را ئاده‌میزاد، هه‌ر وه‌و خاتریشه‌ وه‌كارهاوردن ئى جووره‌ تون وتیژیه‌ له‌ میدیا بووده‌ مایه‌ى زه‌ره‌د ئه‌را تاكه‌یل كومه‌ڵگاى ئنسانى.

نه‌وزاد جه‌لال

ج . أ