په‌تاى نه‌خوه‌ندنه‌وه‌ى كتاو

شفق نيوز

 

دیارده‌ى نه‌خوه‌ندنه‌وه‌ له‌ كوومه‌ڵگا كاریگه‌رى فره‌یگ دیرید، یه‌یش له‌وه‌ختیگ ك له‌ میدیایه‌یله‌و باس له‌ پیشكه‌فتن شاره‌یلمان كریه‌ید، یا باس له‌ هاوردن سستم خوه‌ندن و په‌یڕه‌و سویدى و پیاده‌كردنى كریه‌ید، یا باس له‌ شماره‌و چه‌نه‌ها زانكۆ و ده‌زگایه‌یل رووشنهویرى دویاى راپه‌ڕین كریه‌ید. وه‌لى وه‌ل ئه‌وه‌یشا نوڕید كاره‌گه‌ وه‌و جووره‌ نیه‌ ك چشته‌گه‌ ئسپات بكریه‌ید، سه‌ره‌تا بایه‌سه‌ بویشیم سستم هووكاره‌كردن و په‌روه‌رده‌ كلاسیكیه‌و مه‌ردمان ئاست نزم و كلاسیك جیوه‌جى كه‌ن، له‌وه‌ر ئه‌وه‌ تاكیگ تیه‌یده‌ به‌رهه‌م ك ئاست زانستى و ماریفه‌تى نزیكه‌و بوود له‌ نه‌خوه‌نه‌وار، چوینكه‌ خوه‌ندكار كورد له‌ رۆتین وه‌رگرتن ده‌رس و شیواز ده‌رخكردن و فامستن مانایى سه‌رگه‌ردانه‌و خوه‌ندكاریگه‌ نه‌ له‌ زووان و نه‌ له‌ هویركارى و جوگرافیاى نیشتمانه‌گه‌ى خوه‌ى ئه‌و زیره‌كى ته‌واوه‌ داشتوود، ته‌نانه‌ت ئاست خوه‌ندكار زانكۆیه‌یلمانیش نیه‌ڕسیده‌ ئاست زیره‌كى و زانایى خوه‌ندكاره‌یل ئۆرپى قوناغ ناوه‌ندى له‌ڕوى زانیارى و مانسته‌یل سه‌ره‌تاییش.

 

له‌یه‌یش گرینگ تر ئه‌وه‌سه‌ ك خوه‌ندكار كورد ئه‌و كلتوور گرینگه‌ هیمان له‌لاى سه‌رچه‌وه‌ نه‌گرتگه‌و نه‌ویه‌سه‌ میكانیزمیگ له‌ ژیانى، ك هان دریاوید بگه‌ردیده‌ شوون سه‌رچه‌وه‌و كتاو، وه‌ل ئه‌وه‌یشا هویچ كه‌ناڵیگ ته‌له‌فزیۆنى زانستى یا ماریفى له‌ كوردستان وجوود نه‌یرید بیجگه‌ كلیپ سه‌قه‌ت گورانى و هه‌ڵپه‌ڕه‌گه‌ى چه‌نباره‌ ك نه‌وه‌یلیگ غه‌ریزى بى ناوه‌ڕووك ده‌سه‌وه‌ر ئه‌كاو  خى ده‌نه‌ مه‌ى و قومار و قلیانكیشان و هویچ تر له‌لیان نیایده‌ به‌رهه‌م.

 

له‌ هه‌مان وه‌خت ئمڕوو دوینیم ك ریژه‌ى ئه‌و خوه‌ندكار و قوتابیه‌یلیشه‌ ك واز له‌ خوه‌نستن تیه‌رن وه‌تایبه‌ت قوناغ ناوه‌ندى روى له‌ زیایبوین كردگه‌و مل نه‌ن وه‌ره‌و بازاڕ و په‌یاكردن كار، ك له‌یوا دیاره‌ ناچارى و كه‌مده‌سییش له‌ى دیارده‌ حاكمه‌و بڕیارده‌ره‌.

 

هه‌ر له‌وه‌ر ئه‌وه‌یش دوینیم دیارده‌ى نه‌خوه‌نه‌وارى و نه‌خوه‌ندنه‌وه‌ هه‌ڕشه‌ له‌ كوومه‌ڵگاى كورده‌وارى ئه‌كاو كۆمپیته‌ر و ئه‌نته‌رنێتیش فره‌ شه‌رمنن و نه‌تویه‌نستنه‌ بوونه‌ جیگر و به‌دیل خاسیگ .

 

ئاشتى عه‌زیز

ج . أ