باڵوێزيگ ئێزيدی له‌ نه‌ته‌وه‌يل يه‌كگرتگ

شفق نيوز

ئی روێداگ گه‌ورا له‌وه‌ختيگ بوی ك ئێزيديه‌يل له‌حاڵه‌تيگ ناڕه‌حه‌تی و دڵته‌نگی فريه‌يگ ژيه‌ن، يه‌يش وه‌جووريگ ك له‌يوا له‌ ته‌حسين سه‌عيد مير ئێزيديه‌يل كرد له‌ ماڵ پاشايه‌تی بريتانی بويشێد: ناتوانيم دی له‌ عراق بژيه‌يم يا ئه‌وه‌سه‌ مقه‌يه‌تيمان بكه‌ين يا قاپی كووچكردن ئه‌رامان واز بكه‌ين، وه‌لێ ئه‌وه‌ بوی ناديه‌ موراد پاڵه‌وان و ئازا جوور پاڵه‌وانه‌يل كويه‌ی به‌رز جوور عه‌نقا له‌ژير خوه‌ڵه‌كوو هاته‌ ده‌نگ تا بويشێد نه‌ ئه‌را دڵته‌نگی و شكه‌ست، خوه‌مان نايه‌يمنه‌ ده‌س دڵته‌نگی و مقاومه‌ت ئه‌كه‌يم تا دويا هه‌ناسه‌. ناديه‌ موراد بيده‌نگی شكان تا بويشێده‌ جه‌هان عاره‌ له‌باندان تا ئيسه‌ بيده‌نگين!! وه‌خت ئه‌وه‌ هاتگه‌ كومه‌ڵگای ناوده‌وڵه‌تی باێده‌ ده‌نگ و هاوكاری بكا له‌ ئازادكردن گيرياگه‌يلمان له‌ده‌س ترۆريسته‌يل داعش، وه‌خت ئه‌وه‌ هاتگه‌ دادگايی تاوانباره‌يل بكريه‌ن ك ئه‌و كاره‌سات و تاوانه‌يله‌ ده‌رهه‌قمان ئه‌نجام دان.

ناديه‌ موراد ئێزيدی ك بويه‌ باڵوێز نيازپاكی له‌ نه‌ته‌وه‌يل يه‌كگرتگ و ده‌نگيگ، نوێنه‌رايه‌تی گشت قوربانيه‌يل له‌ناوبردن وه‌جه‌م و كوشتن و ترۆر ئه‌كا له‌ جه‌هان له‌ی نه‌مام ته‌مه‌نه‌، ك بيگومان ده‌سكه‌فت گه‌ورا وه‌ده‌س ئه‌يه‌رێد له‌ ئاينده‌ نه‌ك هه‌ر ته‌نيا ئه‌را ئێزيديه‌يل، به‌ڵكوو له‌بان ئاست ملله‌ته‌يل جه‌هان وه‌گشتی، ك يه‌يش ئه‌وه‌ بوی زوورم سه‌رۆك و كه‌سايه‌تی و وه‌رپرسه‌يل حكومی له‌گشت جه‌هان جه‌خت له‌لی كردن له‌ په‌يامه‌يليان و لێدوانه‌يليان وه‌ی بوونه‌وه‌و له‌وانه‌يش نه‌يچێروان بارزانی سه‌رۆك حكومه‌ت هه‌رێم كوردستان له‌ په‌يامه‌گه‌ی ئه‌را بان كی مۆن وه‌ بوونه‌ی دامه‌زرانن ناديه‌ موراد جوور باڵوێز نيازپاكی ك له‌تی وت: گشتمان دڵنيايم له‌وه‌گ ئی ئافره‌ت ئێزيديه‌ ك مه‌ينه‌تی فريه‌يگ هاته‌ تويشی و خاوه‌ن ئه‌زموون گه‌وراتريگه‌ له‌ ته‌مه‌نی توانای ئه‌نجامداين ئه‌ركه‌يلی ديرێد وه‌ وه‌رپرسيارێتييه‌و وه‌ل ئازايه‌تی ته‌ماميگ.

خه‌يری ئبراهيم كۆرۆ