ئاست بایه‌خداین سه‌ركردایه‌تى كوردستانى وه‌ جایڵه‌یل و پشتگیرى كردنیان

شفق نيوز

وه‌ڕیه‌وبردنى خریا ده‌سیان، چوینكه‌ یانه‌ پڕوزه‌ و زینى و چالاكن، و له‌وه‌ر ئه‌وه‌سه‌ ك دوینید زوورمى وڵاته‌یل جه‌هان باوش ئه‌را جایڵه‌یلیان وازكه‌ن و سه‌رپه‌رشتیان كه‌ن له‌ لایه‌نه‌یل هووكاره‌كردن و خوه‌نین و ته‌ندروستى و په‌یاكردن ده‌رفه‌ت كار، ئه‌وه‌ بیجگه‌ كارئاسانى كردن ئه‌را ژن خوازینیان، و وه‌ى جووره‌ بوونه‌ هێز بن نه‌هاتى ئه‌را هه‌ڵگردن وه‌رپرسیارى نیشتمانى... هه‌ر له‌وه‌ر ئه‌وه‌یشه‌سه‌ ك كۆنفرانسه‌یل ناوده‌وڵه‌تى گریه‌ دریه‌ید ئه‌را به‌رزه‌وكردن ئاستیان و مه‌شقداینیان له‌بان وه‌رگردن ئه‌رك و وه‌رپرسیارى تاگه‌ر ئاماده‌ بكریه‌ن و له‌ ئاست خواست بوون، و كاڵین گیان نیشتمانى و دووسداشتن هاوكارى و وه‌وه‌رچه‌وگردن به‌رژه‌وه‌ندى گشتى ملله‌ت و ئه‌وپه‌ر هه‌وڵداین وه‌خاتر په‌ره‌سه‌ندن و ئاوه‌دانكردن نیشتمان و پیشكه‌فتنى.

له‌وه‌ر ئه‌وه‌یشه‌ سه‌ركردایه‌تى كوردستانى بایه‌خ گه‌ورایگ دایه‌سه‌ جایڵه‌یل وه‌تایبه‌تى بیكاره‌یلیان و باوش ئه‌رایان وازكردیه‌، وه‌ى جووره‌ حكوومه‌ت هه‌رێم كوردستان له‌ بودجه‌ى ساڵ 2011 بڕ 25 ملیار دینار ته‌رخان كردیه‌ ئه‌را پویلداركردن پرۆژه‌یل جایڵه‌یل ئه‌را نه‌هیشتن بیكارى و چاره‌سه‌ركردن كێشه‌یل جایڵ و جوانه‌یل وه‌ پشتگیرى كردن له‌ پرۆژه‌یلیگ بویچگ ئه‌را جایڵه‌یل و دامه‌زرانن سه‌ندووق پشتگیریكردن له‌و جایڵه‌یله‌ ك عومریان هاناوبه‌ین 16 تا 30 ساڵانى و له‌ ڕووشنایى و چوارچیوه‌ى ئى پرۆژه‌ حكوومه‌ت هه‌رێم كوردستان قه‌رته‌یلیگ ده‌یده‌ جایڵه‌یل ك له‌ یه‌ك تا 15 میلیۆن دیناره‌ ئه‌را جیوه‌جیكردن پرۆژه‌یلیان.

شایان وتنه‌ ك پرۆژه‌یگ هه‌س وه‌ناو(كار ئه‌را گشت) ك حكوومه‌ت هه‌رێم كوردستان وه‌ریگه‌ى وه‌زاره‌ت كار ده‌رفه‌ت كار ئه‌را 3000 بیكار له‌ ماوه‌ى سێ ساڵ هاتى دابین كه‌ید و مه‌شقداینیان له‌ بنكه‌یل مه‌شقداین پیشه‌یى و كوومه‌ك كردنیان له‌ چوارچیوه‌ى سه‌ندووق پشتگیریكردن له‌ جایڵه‌یل.

ئى پرۆژه‌و پرۆژه‌یلیگتر بى گومان به‌شدارى كه‌ن له‌ كه‌مه‌وكردن دیارده‌ى بیكارى، و له‌هه‌مان وه‌ختیش وه‌زاره‌ت كار ده‌سمیه‌ت كه‌رت تایبه‌ت ده‌ید له‌و كۆمپانیایه‌یله‌ ك ده‌رفه‌ت كاركردن ئه‌را بیكاره‌یل دابین كه‌ن و مسۆگه‌ر كردن ده‌رفه‌ت كار ئه‌را لاى كه‌م 10% له‌لیان، و ئامانج سه‌ره‌كى ئى كاریشه‌ هانداین جایڵه‌یله‌ له‌ چوارچیوه‌ى سیاسه‌ت وه‌كاره‌وناین و بته‌وكردن نه‌خش و ده‌ور كه‌رت تایبه‌ت ئه‌را جمانن بارووه‌زع ئابوورى و هانداین جایڵه‌یل ئه‌را كاركردن له‌ كه‌رت تایبه‌ت چوینكه‌ ئى جایڵه‌یله‌ خاوه‌ن وزه‌ى گه‌ورایگن ك بایه‌ته‌ وه‌كارباریه‌ن ئه‌را بیناكردن كوومه‌ڵگا له‌ گشت لایه‌نیگ ، له‌لایگتر ئیجووره‌ قه‌رته‌یلیگ بوونه‌ مایه‌ى تیكه‌ڵابوین ئى جایڵه‌یله‌ وه‌ناو كوومه‌ڵگا و هیلیده‌یان پشت وه‌خوه‌یان بووه‌سن و ئاست ئابوورى خوه‌یان به‌رزه‌و بكه‌ن و یه‌یشه‌ به‌شدارى كه‌ید له‌ زینیه‌وكردن بازاڕ كاركردن چوینكه‌ جایڵه‌یل له‌ هه‌ر مه‌یدانیگ كار بكه‌ن سوود و مه‌نفه‌عه‌ت ڕه‌سننه‌ كوومه‌ڵگا. له‌ هه‌مان وه‌خت كاركردن جایڵه‌یل له‌ى پرۆژه‌یله‌ بووده‌ مایه‌ى سه‌قامگیرییان و هس كردنیان وه‌ ئارامى ئه‌را مسۆگه‌ركردن ئاینده‌یان.

له‌هه‌مان وه‌خت حكوومه‌ت هه‌رێم كوردستان بایه‌خ فره‌یگ دایه‌سه‌ پرۆژه‌ى ژنخوازین جایڵه‌یل و له‌ى باوه‌ته‌ سه‌رۆك حكوومه‌ت هه‌رێم جه‌خت له‌بان زیایكردن سلفه‌ى زه‌واج كرد وه‌خاتر هانداین جایڵه‌یلمان ئه‌را ژنخوازین وه‌ زیایكردن بڕ سلفه‌گه‌ له‌ یه‌ك ملیۆن ئه‌را دو میلیۆن نیم دینار و یه‌یشه‌ به‌ش بویچگیگه‌ له‌و هه‌مكه‌ پرۆژه‌یله‌ ك حكوومه‌ت هه‌رێم جیوه‌جییان كه‌ید ئه‌را دابینكردن ده‌رفه‌ت كار كردن ئه‌را جایڵه‌یل بیكار، ئه‌وه‌ بیجگه‌ دابین كردن ده‌رفه‌ت خوه‌نین ئه‌را ئه‌وانه‌گ حه‌زكه‌ن خوه‌نین باڵاى خوه‌یان ته‌واوبكه‌ن.

 

مه‌حه‌مه‌د عه‌لى سه‌ماوى