وه‌نه‌وشه‌ ئه‌را سه‌رژان و كه‌مخه‌وى

شفق نيوز

وه‌نه‌وشه‌ له‌ژیان بڕیگ له‌ ناوداره‌یل دونیا نه‌خش مێژوویى دیرید، ناپلیۆن پۆناپۆرت ئاشقیگ سه‌رسام ئى جووره‌ گوڵه‌ بویه‌و له‌دویاى نه‌مه‌ندنیشى وه‌نه‌وشه‌ كریاسه‌ نیشانه‌ى وه‌فادارى له‌ فره‌نساو تائیسه‌یش ملله‌ت ئه‌و وڵاته‌ گرنگى فریه‌یگ ئه‌یه‌نه‌ گوڵه‌ وه‌نه‌وشه‌.

وه‌ختیگیش جۆزفین ژن خوازى له‌جیاى نوقڵ وه‌نه‌وشه‌وارانى كریا، بیجگه‌ ئه‌وه‌یش وه‌نه‌وشه‌ قانجاز فریه‌یگ دیرید ئه‌را ئاده‌میزاد، وه‌تایبه‌ت شاره‌زایه‌یل و ئه‌وانه‌ك له‌مه‌یدان گژوگیاى پزیشكى كار ئه‌كه‌ن فیشتر قانجازه‌گه‌ى زانن.

عه‌لائه‌دین سه‌جادى وه‌ى شیوه‌ باس له‌ قانجازه‌یل وه‌نه‌وشه‌ كردگه‌ و ئویشید:

* چاره‌سه‌ر "گه‌لویبه‌سیان و هه‌ناسه‌بڕكى" ئه‌رك گوڵه‌ وه‌نه‌وشه‌س، هه‌ركه‌سیگیش ئى حاڵه‌ته‌ داشتوود ئه‌تویه‌نیدقانجاز له‌ وه‌نه‌وشه‌ بكاو تیكه‌ڵى وه‌ل ئاو بكاو له‌لى بخوه‌ید.

* فره‌كه‌س هه‌ن تویش سه‌رژان ئه‌یه‌ن، وه‌تایبه‌ت ئه‌و سه‌رژانه‌ ك له‌خوینه‌و په‌یا ئه‌دێ، ئمجا له‌ى حاڵه‌ته‌ گوڵه‌ وه‌نه‌وشه‌ له‌یرا نه‌خش خوه‌ى دوینید و بووكردنى چاره‌سه‌ر خاسیگه‌ ئه‌ڕاى.

* وه‌نه‌وشه‌ ده‌وڵه‌مه‌نه‌ وه‌ فیتامین(A و C)، بیجگه‌ ئه‌وه‌یش قانجاز دیرید ئه‌را چاره‌سه‌ر كردن ژانژوو و سقانژان.

* نه‌ف له‌ى گوڵه‌ وه‌رگیریه‌ید ئه‌را كیشه‌ى قه‌بزى و كه‌مخه‌وى و چشته‌یل تر.

* ئه‌گه‌ر تیكه‌ڵ بكریه‌ید وه‌ل شیر و دویاخریش بسایده‌ى ده‌م وچه‌ود، هه‌رچى په‌ڵه‌و سیه‌یى ده‌مچه‌و هه‌س گشتى لاوه‌یدو جوانیه‌و ئه‌كاو ڕوینه‌گه‌یشى چاره‌سه‌ره‌ ئه‌را ئه‌وانه‌ك قژیان ڕزیه‌ید .

حه‌سه‌ن عه‌بدوڵڵا

ج . أ