بارزانى نه‌مر.. ڕووشنایى له‌ تاریخ نه‌ته‌وه‌یگ

شفق نيوز

كه‌ن و ڕویداگه‌یل گوزه‌یشت كاریگه‌رى خوه‌ى نیشان ده‌یگ  له‌بان ئمڕوو. وه‌گووره‌ى پرسیار فه‌لسه‌فى ك ئویشیگ : ئایا بایه‌سه‌ چشته‌یلیگ  ڕوى بیاتاگ بیجگه‌ ئه‌وه‌ك ڕویدا؟ جواوه‌گه‌ى (نه‌خه‌یر... چوینكه‌ ڕویدا).

ئیمه‌ زانیم ك نه‌تویه‌نستیم دویه‌كه‌ چشتیگ  دروس بكه‌یم خاستر له‌ئیسه‌، ئه‌وه‌یش وه‌ناونیشان ئه‌وه‌ك ئه‌وه‌ك بوى دروسكریا، وه‌لى دروسكردن چشت له‌ى وه‌خته‌ تاڕادیگ  كاریگه‌رى دیریگ  له‌چه‌و دویه‌كه‌، وه‌ى جووریشه‌ وه‌ل پیاوه‌یل تاریخا، ك كاریگه‌رى دیرن له‌ى وه‌خته‌و به‌شدارن له‌ دروسكردنى وه‌هه‌ر جووریگ  بووگ جویر ئه‌وه‌ك تا دویه‌كه‌ پاڵه‌وان ڕویداگه‌یل گوزه‌یشته‌ بوینه‌و ئه‌و پاڵه‌وانیه‌تیه‌ ئیسه‌یش هه‌ر وه‌رده‌وامه‌، یه‌یش مه‌عناى ئه‌وه‌سه‌ ئیمه‌ وه‌ختیگ  گوزه‌یشته‌ له‌یه‌كه‌و ده‌یم توایم نه‌خشه‌ى ئمڕوو وه‌پى دابنه‌یم وه‌شیوه‌ى خاسیگ .

له‌وه‌ختیگیش پاڵه‌وانه‌یل یا ئه‌و سه‌ركرده‌یله‌ خوه‌نیمه‌وه‌ ك تاریخیگ  داشتنه‌ وه‌ كرده‌وه‌یلیان، هویچ چشتیگ  ئه‌ڕایان پیشكه‌ش نه‌كردیمنه‌و ڕووشناییگ  وه‌پیان نه‌یایمنه‌، ئمجا با زیاتر قسه‌گه‌مان ئاشكرا بكه‌یم، ك ته‌ڵا هه‌ر ته‌ڵاس ك جویر كانزا یا مه‌عده‌نیگ  سروشتیه‌و قیمه‌ت خوه‌ى دیریگ  و تیكه‌ڵ نیه‌وگ وه‌ل باقى كانزایه‌یلاو هه‌ر مقه‌یه‌تى له‌ تایبه‌تمه‌ندى خوه‌ى ئه‌كا. هه‌ر له‌وه‌ر ئه‌وه‌یش سه‌ركرده‌و كه‌سایه‌تیه‌یل گه‌ورا له‌تاریخ نیه‌وگ هویچ له‌لیان كه‌مه‌و بكه‌یم یا چشتیگ  ئه‌ڕایان زیاى بكه‌یم، چوینكه‌ ئه‌وان له‌دونیا ده‌رچین و تواسن ناویان له‌تاریخ بمینیگ ، ئه‌گه‌ریش كه‌سه‌یلیگ  تواسن ناویان بنویسیه‌یگ  له‌تاریخ جویر ئه‌وه‌ك خوه‌یان تواسن نه‌ك جویر ئه‌وه‌ك تاریخ تواس، بیگومان ئه‌و مه‌به‌سه‌ وه‌رده‌وام نیه‌ له‌گشت وه‌ختیگ  یا وه‌ل گشت كه‌سیگا، ئه‌را نموونه‌: تا دویه‌كه‌ باوه‌ته‌یلیگ  ناو عه‌بدولكه‌ریم قاسم وه‌ دكتاتۆر بردیان، ك ئمڕوو هه‌مان دكتاتۆر ئویشنه‌پى سه‌ركرده‌ى نه‌مر، ئمجا عه‌بدولكه‌ریم له‌ دونیا ده‌رچى وه‌ چاره‌نویس خوه‌ى نه‌ك وه‌ خواست ئیمه‌، ك ئمڕوو خاسیه‌یل فره‌یگ  له‌بانى نوسیه‌یگ  و ئه‌گه‌ر بایگ  و ژیانى له‌یه‌كه‌و به‌یم ئه‌وه‌ به‌رژه‌وه‌ندى ئیمه‌ تواس و ئیمه‌یش نیه‌تویه‌نیم هویچ چشتیگ  ئه‌ڕاى بكه‌یم و هویچ له‌لى بووه‌یم. ئمجا ئیمه‌ وه‌ختیگ  ئویشیم ژیان كه‌سایه‌تییگ  بخوه‌ننه‌وه‌ یا له‌باوه‌ت مه‌لا مسته‌فاى نه‌مر بزانن، ئه‌وه‌ بیگومان ئامانجمان ئه‌وه‌سه‌ بزانیم له‌ى سه‌رده‌مه‌ جموجویلى چوینه‌ ك هه‌رچه‌نى له‌دونیایش ده‌رچیه‌، وه‌لى هه‌ر نه‌مره‌ وه‌گووره‌ى ئه‌وه‌ك پیشكه‌شى كرد له‌و سفه‌ت و كاره‌یل جوان و بى وینه‌ ك ڕیڕه‌ویگ  بوى ئه‌را ملله‌ت و هه‌ر ئه‌و سفه‌ته‌یلیشه‌ گه‌ورایه‌یل تاریخ زنگه‌و ئه‌كا.

ئیمه‌ وه‌ختى له‌بان بارزانى نه‌مر نویسیم ڕووشنایى له‌ تاریخ نه‌ته‌وه‌، هویچ چشتیگ  پیشكه‌ش وه‌و نه‌مره‌ نه‌كردیمه‌ ك خوه‌ى وه‌ هویر وڕا و كاره‌یلى خوه‌ى ئاشنا كرد وه‌تاریخ، ئمجا ئیمه‌ ئه‌گه‌ر وه‌ وژدانه‌وه‌ باسى نه‌كه‌یم له‌وه‌ر هه‌ر هووكاریگ ، ئه‌وه‌ تاریخ له‌ئاستى وژدان خوه‌ى خه‌یگه‌ كار ك چوین بویه‌. هه‌ر له‌وه‌ر ئه‌وه‌یش بایه‌سه‌ له‌بان ملله‌ت كورد ڕووژ له‌دایگبوینى یا هه‌ر ڕووژیگ  له‌ خه‌باتى بكه‌نه‌ جه‌شنیگ  نیشتمانى، ك یه‌یش ئه‌رك په‌رله‌مان كوردستانه‌، چوینكه‌ ئى جووره‌ ڕووژیگ  ئیمه‌و نه‌وه‌یل ئاینده‌مان هه‌وه‌جه‌ وه‌پى دیریم.