ده‌سپيشخه‌رى فه‌يلى هه‌وه‌جه‌ وه‌پيمان ديرێد

عه‌لى ئه‌لشێخ مسته‌فا

شه‌فه‌ق نيوز/ ناخوازم ئه‌و ده‌سكه‌فت دوياخره‌ هه‌ڵم بكا ك ده‌سه‌يگ له‌ كورده‌يل فه‌يلى ئه‌نجامى دان و وه‌ل ريڕه‌و گه‌رده‌لويلا بچێد، ئه‌يه‌ يه‌كم چشتيگه‌ له‌ى جووره‌ له‌بان ئى ئاسته‌و هه‌وڵ جددييگه‌ ئه‌را كيشانن ديد راى گشتى ئۆرپى و ئاشناكردنى وه‌و زوڵمه‌يله‌ ك هاتنه‌ تويش كورده‌يل فه‌يلى و له‌وانه‌يش له‌وه‌خت رژيم وه‌رين سه‌دام.

 

له‌ڕاسى سه‌ركرده‌و سه‌رۆكه‌يل حزبه‌يل كوردستانى ئى دوسيه‌ له‌وه‌رده‌م راى گشتى جه‌هانى و له‌وه‌رده‌م باڵوێزه‌يل ده‌وڵه‌ته‌يل تر يه‌كێتى ئۆرپا له‌ عراق خستوينه‌ ڕوى له‌ بوونه‌يل گوزه‌يشت، وه‌لێ ئاكام و چه‌وديريكردنى تيه‌ريك و ناديار بوى و ته‌نانه‌ت له‌لايه‌ن ده‌سڵاته‌يليش له‌ به‌غدا ك شماره‌يگ بڕياره‌يل خاس ده‌ركرد له‌ به‌رژه‌وه‌ندى مافه‌يل كورد فه‌يلى، وه‌لێ جى داخه‌ ته‌نيا هه‌ر مره‌كه‌و بوين له‌بان وه‌ره‌قه‌.

 

حاڵه‌ته‌يليگ ئه‌ياده‌ هويرم ك وه‌چه‌و خوه‌م ديمه‌سه‌ى، ئه‌ويش له‌وه‌خت هه‌ڵمه‌ت هه‌مه‌جيانه‌ى يه‌كه‌مين(سه‌ره‌تاى ساڵه‌يل هه‌فتاى سه‌ده‌ى وه‌رين)ده‌رهه‌ق پيكهاته‌گه‌مان، ك ئه‌و وه‌خته‌ له‌ خوه‌ندنگا هاتمه‌و ئه‌را ماڵ، ئمجا له‌ ناوچه‌ى نه‌هزه‌ چه‌وم كه‌فته‌ سه‌ياره‌يل پيكاب و پياوه‌يل پۆليس وه‌ زوور شماره‌يگ ژن و مناڵ و پياو پيركه‌فتگ سوار كرديان، منيش كه‌ميگ وسيام تا بزانم چه‌ روى ئه‌ياد، هاوڕيه‌گه‌م وته‌پيم: ئه‌يه‌ هه‌ڵمه‌ت كووچ وه‌پيكردنه‌! منيش يه‌كسه‌ر ئه‌سر له‌ چه‌وم هاته‌ خوار وه‌شيوه‌يگ نائيرادى و شووڕا بويه‌ بان گوونايه‌يلم له‌وه‌ختيگ ئه‌و ديمه‌ن نائنسانيه‌ و دڕندانه‌ وه‌چه‌و ديم ك جوور كاوڕ و ميه‌ ره‌فتار وه‌ل ئه‌و مه‌ردم ته‌سفيركرياگه‌ كرديان، يه‌كسه‌ر هاوڕيه‌گه‌م ئه‌سره‌گه‌م سڕى و وت: چه‌س.. تواێد پياوه‌يل پۆليس وه‌ى حاڵه‌و بويننه‌د و بووه‌نه‌مان وه‌ره‌و مه‌رز؟ ئمجا رووژيگ دوياتر چه‌وم كه‌فته‌ كه‌سه‌يليگ له‌ ده‌يشت ناوچه‌گه‌مان و هاتنه‌ ناو (عه‌گد ئه‌لئه‌كراد)و مينه‌ى ئامێرته‌له‌فزيۆن و يه‌خچاڵ و ناوماڵه‌ كرديان وه‌ ئه‌رزان بسينن، چوينكه‌ زانستيان مه‌ردم فه‌يلى ته‌سفير ئه‌كريه‌ن و ناچارن وه‌ هه‌ر نرخيگ پرتاڵيان بفووشن.

 

له‌و رووژه‌يله‌ چشتيگ تر بيجگه‌ نويسانن نه‌ياشتم، وه‌ قه‌ڵه‌مه‌گه‌م ده‌سكردمه‌ نويسانن ديمه‌نه‌يله‌ ك روێدا له‌وه‌رچه‌وم ده‌رهه‌ق ئى چين له‌ مه‌ردم عراق، ئمجا ئه‌و ريپۆرتاج زينگه‌ خستمه‌ ناو زه‌رفيگ و ناونيشانى نام ئه‌را يه‌كيگ له‌ رووژنامه‌يل له‌ ده‌وڵه‌تيگ تر ك چه‌ ئه‌ياده‌ تويش كورده‌يل فه‌يلى. ئه‌وسايش لوبنان ته‌نيا ده‌وڵه‌تيگ بوى ك جووريگ له‌ ئازادى رووژنامه‌گه‌رى له‌تى بوى، دى نازانم ئه‌و ريپۆرتاجه‌ بڵاو كريا يا نه‌كريا؟ وه‌لێ من وژدانم وه‌پى ره‌حه‌ت بوى و ته‌نانه‌ت وه‌وه‌يشه‌و نه‌وسيام، به‌ڵكوو هه‌وڵ ديام وه‌ختى ك له‌ ئۆرپا بويم له‌وه‌ر خوه‌نين، له‌وار كه‌ميگ تويه‌نسيم هه‌وڵ بيه‌يم و هه‌ڵمه‌تيگ كرديم ئه‌را روژنامه‌يل سويدى و هه‌ر وه‌و خاتريشه‌ كلكرياگ ئه‌و وڵاته‌و بڕيگ له‌ وڵاته‌يل تر ده‌سكردنه‌گه‌شت ئه‌را ناو كه‌مپ ته‌سفيركرياگ و كووچ وه‌پيكرياگه‌يل فه‌يلى له‌ ئيران، ك يه‌يش ناڕه‌حه‌ت حكومه‌ت سه‌دام كرد له‌و وه‌خته‌ ك ناچار بوى له‌ژير فشار له‌ سه‌ركرده‌يل وڵاته‌يليگ ديموكراسى ئه‌و هه‌ڵمه‌ت گه‌وراى يه‌كه‌مه‌ گير بيه‌ێد ده‌رهه‌ق كورده‌يل فه‌يلى وه‌رجه‌ ئه‌وه‌گ جاريگتر ده‌س وه‌پى بكه‌ن له‌ سه‌ره‌تاى ساڵه‌يل هه‌يشتا.

 

ئى كۆنفرانس دوياخره‌ له‌بان كورده‌يل فه‌يلى بيگومان ئاشناى راى گشتى له‌ ئۆرپا وه‌و كيشه‌ ئه‌كا، ك بڕيگ له‌و دوسيه‌يله‌ فريه‌ گرينگه‌ له‌وار باس بكريه‌ێد، ئمجا وه‌ختى ك ئه‌را يه‌كيگ له‌ چاپه‌مه‌نيه‌يل كار كرديام له‌ سويد په‌يوه‌ندييگ له‌ وزاره‌ت كووچ و كاروبار په‌نابه‌ره‌يله‌و وه‌پيم ره‌سى وتنه‌پيم: "كورده‌يل فه‌يلى كيين و جياوازييان چه‌س وه‌ل باقى كورده‌يل تر، يه‌يش له‌وه‌ختيگ ك ئه‌وانه‌گ داواى ماف په‌نابه‌رى ئه‌كه‌ن له‌ سويد زوورميان كورد فه‌يليين!".منيش جواوئه‌و پرسياره‌ دام وه‌ شيوه‌يگ دريژيگ و چه‌ن مه‌سه‌له‌يگ له‌تى ئاشكرا كردم ك ئه‌وان زوتر له‌لايان ئاشكرا نه‌وێد و گووڤاره‌يل سويديش ده‌سكردنه‌ بڵاوكردن ئه‌و په‌يجوريه‌، يه‌يشله‌ حاڵه‌تيگ نه‌ك هه‌ر راى گشتى ده‌ره‌كى و ئۆرپى وه‌شيوه‌يگ دياريكرياگ ك چشتيگ له‌بان فه‌يليه‌يل نه‌زانستيان، ئمجا له‌ كۆنفرانسيگ ك له‌لايه‌ن كومه‌ڵه‌ى خوه‌ندكاره‌يل كورد له‌ ئۆرپا ئه‌نجام دريا له‌ ساڵه‌يل هه‌فتاى سه‌ده‌ى وه‌رين، هه‌مان پرسيار له‌ يه‌كيگ له‌ كورده‌يل قامشلى له‌ليم كريا ك ئه‌ويش وتياد ئيوه‌ وه‌ چه‌ له‌ئيمه‌و باقى كورده‌يل‌ جياوازين، ئايا ئيوه‌ مه‌سيحيين؟

 

بيگومان فه‌يليه‌يل غه‌يره‌ منيش هه‌وڵ ديان ئه‌را ئه‌وه‌گ مه‌ينه‌تيه‌يل ئى پيكهاته‌ بڕه‌سننه‌ راى گشتى جه‌هانى، وه‌لێ ئه‌وه‌گ له‌ى دوياخره‌ تيميگ كورد له‌ژير گومه‌ز په‌رله‌مان ئۆرپى ئه‌نجامى دا باوه‌ڕم ئه‌وه‌سه‌ كار خاسيگ بوى و ئوميده‌واريم خزمه‌ت وه‌ گشتمان بكا وه‌تايبه‌ت پشتگيرى ده‌زگايه‌يل و حزبه‌يل كوردستانى بيجگه‌ پشتگيرى هووكاره‌يل ره‌سانن و راى گشتى كوردى ئه‌تويه‌نن هه‌وڵ فيشتريش بيه‌ن و بايه‌سه‌ له‌بان ريكخه‌ره‌يل ئى كۆنفرانسيشه‌ ئاشكراكردن فيشتريگ بيه‌ێد له‌بان مه‌سه‌له‌گه‌و دوياخريش بايه‌سه‌ له‌بان گشتمان پشتگيرى ئه‌وانه‌ بكه‌يم ك ده‌سپيشخه‌رى ئه‌كه‌ن ئه‌را ئاشناكردن ئى كيشه‌، چوينكه‌ ئى مه‌سه‌له‌ ده‌سكه‌فته‌ ئه‌را گشتمان و بايه‌سه‌ وه‌رده‌وامى وه‌پى بيه‌يم دوياى ئه‌وه‌گ شه‌كه‌ت بويمن له‌ جيوه‌جيكردن بڕيگ له‌لى له‌ناو وڵات، ك دوياخريش بايه‌سه‌ فه‌يليه‌يل ناوخود و ده‌يشتيش يه‌كه‌و بگرن ئه‌را جيوه‌جيكردن ئاره‌زووه‌يل گشتمان و بايه‌سه‌ هه‌ر له‌ ئيسه‌و هه‌وڵ بدريه‌ێد ئه‌را جيوه‌جيكردن خاڵه‌يل به‌ياننامه‌ى كووتايى ئه‌و كۆنفرانسه‌.

عه‌لى ئه‌لشێخ مسته‌فا.