له‌ ئاسانه‌ى ساڵ سه‌روه‌خوه‌يى

سوبحى ساڵه‌يى

شه‌فه‌ق نيوز/ له‌ ئيچنه‌ رووژه‌يليگ له‌ گشت ساڵيگ، به‌شبه‌شه‌و بويم، جوور ئه‌وه‌گ به‌شبه‌شيم له‌بان چه‌ن بنه‌مايگ، ئه‌ويش ئه‌را به‌شبه‌شى قسه‌كه‌ره‌يل له‌بان ساڵ گوزه‌يشته‌و قسه‌كه‌ره‌يليگ له‌بان ئاينده‌، ئمجا قسه‌كه‌ره‌يل له‌بان گوزه‌يشته‌يش بوونه‌ دو به‌شه‌و، ئه‌ويش له‌ناونى ئه‌وانه‌گ قسه‌ له‌بان رووژه‌يل سه‌خت و پڕ ژان و ياساشكنه‌يل ئاسايشى مه‌ترسيدار و ناكووكيه‌يل و شكه‌سته‌يل ئابوورى و قه‌يرانه‌يل سياسى و ئه‌و كرده‌وه‌يله‌ ك دژ مافه‌يل ئاده‌ميزادن و داعش و تاوانه‌يل تازه‌ى ئه‌كه‌ن و له‌ناونى ژارى و بيكارى و كاره‌ساته‌يل و حاڵه‌ته‌يل تويڕه‌يى و گومبوين و ترس و له‌رزه‌و به‌شبه‌شى و كيمشه‌كيشه‌يليگ ك ره‌سيه‌ راده‌ى جه‌نگ راسه‌وخۆ ناونى برايه‌يل.

 

ئمجا له‌ قسه‌يل پڕ له‌ نه‌فامى و نامه‌نته‌قييان گشت ده‌روازه‌يليگ له‌ڕويمان ئه‌وه‌سن جوور ئه‌وه‌گ له‌ كووتايى دونيا بژيه‌يم، بڕيگيش له‌ليان وه‌ هه‌واڵه‌يل ژنه‌فياگيان باس له‌ هه‌ڵسيان و موححيبه‌ت و خاسسازى و سه‌ركه‌فتنه‌يل و ده‌سكه‌فت و دووسى ئه‌كه‌ن ك جيوه‌جى بوينه‌و بارودوخه‌گه‌ وه‌و شيوه‌ تاريف ئه‌كه‌ن جوور ئه‌وه‌گ له‌ساى شاريگ خاس بژيه‌يم، مه‌ردمانيگيش باس خاسيه‌يل ساڵ گوزه‌يشت ئه‌كه‌ن و زيره‌كى ده‌رئه‌خه‌ن له‌ نواگرتن له‌ نيشانه‌يل پرسيار فريه‌و ناپه‌سه‌ن و له‌ليانيش هه‌ن تاوتويكردن مه‌سه‌له‌يل شه‌رعى و زه‌ره‌ده‌يل مه‌يدانى قه‌بول ناكه‌ن ك فريه‌جار ئه‌ڕه‌سێده‌ راده‌ى واين په‌تى، ك وه‌ قسه‌يل و مه‌هانه‌يل راسيگ خوايارن ئه‌و تاوتويه‌ يه‌كلاوه‌ بكه‌ن و لاپه‌ڕه‌ى هويره‌وكردن خراو لاوه‌ن و هساوه‌يل هه‌ڵه‌ بكوشننه‌و ك گشت ساڵێگ دوباره‌وه‌ ئه‌كريه‌ن.

 

وه‌لێ قسه‌كه‌ره‌يل له‌بان ساڵ ئاينده‌، ئه‌وانيش دابه‌ش بوينه‌ له‌ناونى كه‌ه‌سه‌يليگ ك روێداگ سياسى و بار ئابوورى و كۆمه‌ڵايه‌تى لێڵ و نارووشن دوينن، بگر فريه‌ لێڵيگ و په‌يوه‌سى ئه‌كه‌ن له‌ناونى كه‌ش شكه‌ست و ده‌ركه‌فتن تونڕه‌وى و تاريفكردن ناوچه‌گه‌ وه‌گشتى وه‌ مه‌يدان ئه‌را كيشمه‌كيش شوفێنى و تايفى و هه‌رێمى دوينن جوور ئه‌وه‌گ بويشێد دونيا ها ‌بان پشت عفريته‌و.

 

بڕيگيش بازوو خوه‌يان نيشان ئه‌يه‌ن و تومه‌تبار و قسه‌ وه‌و كه‌سه‌يله‌ ئه‌كه‌ن چه‌واشه‌يانن و باس له‌ هه‌قه‌وكردن تايفى ئه‌كه‌ن، هه‌ر وه‌و خاتريشه‌ له‌ڕى چه‌ن قسه‌يگه‌و ئه‌تويه‌نيم بڕه‌سيمنه‌ قه‌واره‌ى ئه‌و ره‌گه‌زى ريشگداره‌ له‌ فكره‌ سياسيه‌گه‌ى له‌ وه‌رانوه‌ر كه‌سه‌يل تر.

 

دى مه‌سه‌له‌گه‌ له‌ناونى ئه‌يانه‌و ئه‌وانه‌، كه‌سه‌يليگ هه‌ن وه‌ دروس قسه‌ له‌بان ساڵ گوزه‌يشت ئه‌كه‌ن، باس له‌ خاسى و خراويه‌يلى ئه‌كاو ئوميده‌واره‌ بار سياسى تازه‌يگ په‌يا بدێ له‌ ساڵ تازه‌و كووتايى وه‌ قه‌يرانه‌يل باريه‌ێد و تاريفيگ ئه‌را سه‌ركه‌فتن ئدارى و ئابوورى و ئاسايشى پيشكه‌ش بكا ك له‌تى متمانه‌ دروس بكه‌يم وه‌خوه‌مان و ئه‌وانه‌گ به‌شدارمانن له‌ خوه‌شى و ته‌نگى تا ده‌ربچيم له‌ شكه‌ست.

 

شايه‌ت ئيمه‌ له‌ وڵاتيگ ژيه‌يم نايه‌ێده‌و جوور جاران، كه‌سيش ناتويه‌نێد حوكمى وه‌ ئاسن و ئاگر بكاو حزبيگ سياسى يا سه‌ركرده‌يگ سياسييش له‌تى نيه‌ دگان وه‌و هه‌ڵه‌يله‌ بنه‌ێد ك دژمان ئه‌نجام دريا وه‌ دريژايى نزيكه‌ى سه‌ده‌يگ، ئمجا هه‌رچه‌نى ئيمه‌ له‌ى وڵاته‌ تام گشت ناخوه‌شى و كاره‌ساتيگ كرديمنه‌ له‌ئاكام شه‌راكه‌ت چه‌سپياگ و هه‌ر‌چه‌نى شه‌ريكه‌يلمان نه‌ف وه‌رناگرن له‌ گشت ئه‌و ئه‌زموونه‌يل تيه‌ڵه‌و عبره‌ت له‌لى وه‌رناگرن له‌ ره‌فتار دادگه‌رانه‌ وه‌لماناو هيمان هه‌ر هه‌ڵه‌يل وه‌رين دوباره‌وه‌ ئه‌كه‌ن و فيشتريش وه‌ل به‌رزه‌وكردن دروشمه‌يل دوشمنكارانه‌ دژ كيشه‌يل ره‌وامان، هه‌ر وه‌و خاتريشه‌ له‌وه‌ر ئه‌وه‌گ ساڵ تازه‌ بدێده‌ ساڵ سه‌روه‌خوه‌يى، بايه‌سه‌ له‌بانمان يه‌كه‌مجار هساوه‌يل خوه‌مان وه‌ل خوه‌مانا پاكه‌و بكه‌يم و دويه‌ميش وه‌ل مه‌ردمان تر، ئه‌ويش وه‌و خاتره‌ ك ساڵ تازه‌ جياواز بدێ و پڕ بدێ له‌ گه‌شبينى و سه‌ركه‌فتن و كه‌ش ناوخوه‌يى خاسيگ باێده‌ وجوود ئه‌را داين بڕيار سه‌روه‌خوه‌يى ك مه‌ردم كوردستان پشتگيرى له‌لى ئه‌كه‌ن، ئمجا قسه‌كردن له‌ى باوه‌ته‌و وه‌ل گشت ئه‌وانه‌گ مه‌سه‌له‌گه‌ گرينگه‌ له‌لايان له‌ ناوخود و ده‌ورگرد وڵاته‌گه‌ و جه‌ختكردن له‌بان ئه‌وه‌كيش ك ئى سه‌روه‌خۆييه‌ هه‌ڕه‌شه‌ له‌ به‌رژه‌وه‌نديه‌يليان ناكا، به‌ڵكوو ماناى مقه‌يتيكردنه‌ له‌ هاوسايه‌تى و دووسى و وه‌خشين و چه‌وديرى به‌رژوه‌نديه‌يل يه‌كترى.

سوبحى ساڵه‌يى