ئه‌مريكا و به‌عس

شفق نيوز

و ئه‌منی و ئداری عراق له‌ ته‌وق سه‌ر تا په‌نجه‌ی پايان بايه‌سه‌ به‌عسی بوياتان و هه‌ركه‌سيگ وه‌ئاشكرا ئنتماكردن ئه‌را حزب به‌عس ره‌ته‌و بكرداگ ، ئه‌وه‌ بيگومان يه‌كسه‌ر په‌لكيش زندان كرياو سزای خوه‌ی وه‌رگردياگ ، وه‌ سه‌ده‌ها جاريش ئه‌و سزا ره‌سياگه‌ مه‌رگ .

گشت ئه‌و حزبه‌يله‌ ك له‌عراق بوين يا ئه‌وه‌سه‌ له‌ به‌ره‌ يا جه‌بهه‌يگ جه‌نگ خويناوی بوين وه‌ل حزب به‌عسا يائه‌وه‌سه‌ له‌ده‌يشت وڵات بوين و ده‌نگيان وه‌ زه‌حمه‌ت ره‌سياگه‌ وڵات . مه‌عنای ئه‌وه‌سه‌ ماوه‌ی ٣٥ ساڵه‌ گشت ئه‌و كه‌سه‌يله‌ له‌مه‌يدان ئداری و سياسی و سه‌ربازی ره‌سينه‌ ، له‌مه‌دره‌سه‌ی به‌عس په‌روه‌رده‌ بوين ، بيجگه‌ به‌شيگ له‌كورد و شيعه‌ نه‌وگ ك وه‌رده‌وام له‌بان خاك عراق چالاكی سياسی و روی وه‌ڕوی بوينه‌وه‌ داشتن . ئمڕوويش وه‌ختيگ لوجنه‌ی پرس وپرسكاری و دادوه‌ری شماره‌يگ له‌قه‌واره‌ی سياسی و كانديدكرياگ له‌به‌شداريكردن پرووسه‌ی هه‌ڵوژاردن دويره‌و خه‌يگ ، ئه‌را ئيمه‌ی كورد كاره‌گه‌ دو سه‌ريه‌  يه‌كميان وه‌ك لايه‌نيگ تاريخ تاوانه‌يل به‌عس دوشمنيگ سه‌رسه‌خت ئيمه‌ بويه‌ ، وه‌لی واقع ئمڕوو به‌عس وه‌مه‌عنای سونی عه‌ره‌ب ، ئه‌وانيش وه‌ك يه‌كم وه‌يه‌كڕه‌سين جوگرافی ئه‌وه‌نه‌ دوشمنمان نه‌ون و ئه‌وه‌نه‌ ته‌نگه‌تاو نه‌كريه‌ن و ، وه‌لای تون وتيژيا نه‌چن خاسه‌ ، وه‌لی وه‌لای ئه‌مريكاوه‌ ئمڕوو فره‌ گرنگ ياموهمه‌ گشت تاكيگ ئی عراقه‌ به‌شداری له‌ پرووسه‌ی سياسی عراق بكا ، چوينكه‌ لای ئه‌وان وه‌شيوه‌ی ره‌سمی حزب به‌عس لاورياگه‌ .

ئه‌وه‌ك ئه‌مريكا توايگه‌ی ، ئه‌وه‌سه‌ ك دوباره‌ وه‌زعه‌گه‌ نه‌چووگه‌وه‌ ئه‌را سه‌ختی و خاڵ سفر له‌عراق ، وه‌تايبه‌ت له‌ڕوی ئه‌منيه‌وه‌ ، چوينكه‌ ئه‌مريكا له‌يوا بڕيار ياقه‌راره‌ تا كووتايی ساڵ ٢٠١١ گشت هيزه‌يلی بكيشيگه‌وه‌ . ئمجا ئه‌گه‌ر ئيسه‌ پرووسه‌ی سياسی بشيويه‌يگ ئه‌وه‌ بووگه‌ ئشاره‌ی ترسناكيگ ئه‌را ئه‌مريكا وه‌ك ئه‌فغانستان ، چوينكه‌ ئه‌فغانستان له‌شوون ٩ ساڵ رووژ وه‌ رووژ روی له‌خراوی ئه‌كاو هويچ خاسه‌وبوينيگ له‌تی نيه‌ ، ئه‌ويش وه‌جووريگ ك فره‌يگ له‌وڵاته‌يل به‌شداربوی له‌هيزه‌يل ئيساف تاقه‌تيان نه‌مه‌ندگه‌و ئاشكرای ئه‌وه‌ كردنه‌ ك هه‌وڵداين وه‌ل ئه‌فغانستانا هويچ فايده‌يگ نه‌يريگ و ديموكراسيه‌تيشی وه‌كه‌ڵك نيايگ ، له‌وه‌ر ئه‌وه‌ جوير به‌راورد يامقارنه‌ وه‌ل ئه‌فغانستانا ، عراق فره‌ پيشكه‌فتگه‌ له‌بان گشت ئاسته‌يل ژيان ، له‌وه‌ر ئه‌وه‌ وه‌لای ئه‌مريكاوه‌ بڕياره‌گه‌ی پرس وپرسكاری و دادوه‌ری له‌وه‌رجه‌ گشت لايه‌نيگ ئه‌را ئه‌مريكا بڕياريگ ترسناكه‌ ، چوينكه‌ واقع عراق لای ئه‌مريكا ئاشكراسه‌ ك كورده‌يل چه‌ توان يا شيعه‌ چه‌ توايگ ؟ بيگومان ئه‌وه‌يش مينيگه‌وه‌ عه‌ره‌ب سونيه‌و خاس زانيگ ئه‌وانيش چه‌ توان ، وه‌لی ئاشكراسه‌ ك ئه‌مريكا سه‌د له‌سه‌د وه‌ل داوای هويچ پيكهاته‌يگا نيه‌ ، به‌ڵكوو ها وه‌ل مقه‌يه‌تيكردن باڵانسه‌گه‌و نه‌شيويه‌يگ ، هه‌ر له‌وه‌ر ئه‌وه‌يش وه‌رگری يا دفاع له‌ دويره‌و خرياگه‌يل هه‌ڵوژاردن ئه‌كا نه‌ك له‌ به‌عسيه‌يل .