كورديگ فه‌يلی كوڕيگ بارزانی له‌ كوشتن له‌ به‌غدا قورتار كرد

شفق نيوز

ئه‌و هه‌وڵه‌ له‌ساڵ ١٩٧١ تا ئيسه‌ هه‌ر له‌ هوير مه‌ندگه‌و دويای ساڵيگ له‌ ئمزاكردن ريككه‌فتن ئازار له‌وه‌ختيگ ك ئدريس بارزانی ره‌حمه‌تی وه‌ ياوه‌ری عه‌ريف برواری ره‌حمه‌تی و شوفێره‌گه‌يان و كه‌سيگ تر له‌بان داوه‌ت فه‌رمی حزب به‌عس هاتنه‌ به‌غدا.

له‌وه‌ختيگ ك ئدريس بارزانی ره‌سيه‌ به‌غدا له‌ ميوانخانه‌ی"ئاشتورا"له‌ مه‌يدان عوقبه‌ بن نافع له‌ شان باره‌گای رووژنامه‌ی "ئه‌لسه‌وره‌"ی وه‌رين داوه‌زی ك خاوه‌نه‌گه‌ی ناوی حاجی عه‌ليجان فه‌يلی بوی، مارف عوسمان ناسرياگ وه‌ "ئه‌بو وه‌فا" ك ئه‌ويش كورد بوی و ژير وه‌ژير له‌ به‌رژه‌وه‌ندی پارت ديموكرات كوردستان كار كردياد و ده‌سميه‌تده‌ريگ بوی له‌ ده‌زگای حزب به‌عس ئاگادار ره‌حمه‌تی عه‌زيز محه‌مه‌د ره‌حيم قه‌يتويلی "ئه‌بو سامی" كرد ك ناسريا وه "عه‌زيز مزه‌مد"و باوگ دكتۆر كه‌مال قه‌يتويليه‌‌و له‌ ريكخستنه‌يل نهێنی پارتی بوی و راسه‌وخۆ له‌ژير سه‌رپه‌رشی خوه‌م بوی، وه‌ ئه‌وه‌ك زويتر پيلانيگ ئاماده‌ كرياگه‌ ئه‌را كوشتن ره‌حمه‌تی ئدريس بارزانی له‌لايه‌ن ئاسايش گشتی و بڕيگ كورد خيانه‌تكار نه‌يار جمشت كوردی و بنه‌ماڵه‌ی بارزانی نه‌مر له‌و ماوه‌ له‌وه‌خت چگنی ئه‌را به‌شداريكردن له‌ دانيشتن وه‌ل سه‌ركرده‌يل به‌عسی له‌شوون ره‌سينی وه‌ رووژيگ ئه‌را به‌غدا، ك ئه‌بو سامی يه‌كسه‌ر هات ئاگادارم كرد ك منيش له‌و سه‌رده‌مه‌ وه‌رپرس لق په‌نج پارت ديموكرات كوردستان له‌ به‌غداو سه‌رۆك يه‌كێتی نه‌وجوانه‌يل كوردستانيش بويم ئه‌را ئه‌وه‌ك ئاگادار حه‌بيب محه‌مه‌د كه‌ريم سكرتێر پارته‌گه‌ بكه‌يم تا ئاگادار نه‌مر مه‌لا مسته‌فای بارزانی بكا له‌ی مه‌سه‌له‌.

ئيمه‌يش وه‌ فه‌رمان بارزانی نه‌مر نه‌خشه‌يگ دانايم ئه‌را قورتاركردن ره‌حمه‌تی ئدريس بارزانی و كله‌وكردنی وه‌ هه‌ڵه‌په‌ڵه‌ ئه‌را كوردستان، ئمجا دويای ره‌سينی ئدريس ره‌حمه‌تی ئه‌را ماڵ ئه‌بو سامی جنگه‌ كورديه‌گه‌ی "باوگ نه‌يچێروان"ئه‌وه‌ز كرديم وه‌ قاتيگ فه‌رمی و سه‌ياره‌ی تايبه‌تيگ ئه‌رای ئاماده‌ كرديم ك كورديگ فه‌يلی شوفێری بوی تا بڕه‌سنيده‌ی هه‌رێم كوردستان، دی ئه‌و نه‌خشه‌ی ئيمه‌ سه‌ركه‌فت و ئدريس ره‌حمه‌تی وه‌ سه‌ڵامه‌تی له‌ هه‌مان ئيواره‌ی ئه‌و رووژه‌ ك ره‌سيه‌ به‌غدا ده‌ركرديم و ته‌نيا عه‌ريف حه‌ميد برواری ره‌حمه‌تی و شوفێره‌گه‌ی مه‌ندن وه‌ل كه‌سيگ تر وه‌ جنگ كورديه‌و، چوينكه‌ عه‌ريف حه‌ميد را تاڕاديگ له‌ روخساره‌و جوور ره‌حمه‌تی ئدريس بارزانی بوی و شباهه‌ت ئه‌و دا.

ئه‌را ئی رووژه‌گه‌ی تر په‌لامار ئه‌و سه‌ياره‌ دريا ك عه‌ريف حه‌ميد برواری له‌تی بوی وه‌رجه‌ ئه‌وه‌ك بڕه‌سيده‌ شوون خواست و بڕيگ چه‌كدار گوڵه‌واران سه‌ياره‌گه‌ كردن و برواری و شوفێره‌گه‌ی زه‌خمدار بوين و جيواز كريان ئه‌را نه‌خوه‌شخانه‌، وه‌لی ره‌حمه‌تی ئدريس بارزانی وه‌ سه‌ڵامه‌تی ره‌سيه‌ كوردستان.

دويای ئه‌و رويداگه‌ يه‌كسه‌ر ئيزگه‌و ته‌له‌فزيۆن سه‌ر وه‌ حزب به‌عس هه‌واڵ كوشتن ئدريس بارزانی بڵاو كرد ك گوايا ده‌س خيانه‌تكار ئه‌و كرده‌وه‌ ئه‌نجام دانه‌و باوه‌ڕيان ئه‌وه‌ بوی ك گوايا ئدريس كوشياگه‌، وه‌لی دوياخر له‌شوون ته‌ماشاكردن ناسنامه‌ی زه‌خمداره‌يل ئه‌رايان ده‌ركه‌فت ك ئدريس بارزانی له‌ناويان نه‌ويه‌و ئه‌رايان ئسپات بوی ك پيلانه‌گه‌يان شكه‌ست هاوردگه‌و هه‌ڵه‌په‌ڵه‌ كردنه‌ له‌ بڵاوكردنه‌وه‌ی هه‌واڵه‌گه‌و ئاشكرا بوی ك خوه‌يان ئه‌نجامی دانه‌.

بيگومان ئی كار و شكه‌ست ئه‌و پيلانه‌ وه‌ هه‌وڵ فه‌يلی بوی و هه‌ر وه‌ختيگيش باس ئی رويداگه‌ بكريه‌يد كه‌س ياد و نه‌خش ره‌حمه‌تی "عه‌زيز مزه‌مد" له‌تی ناكاو يه‌يش نموونه‌يگه‌ له‌ وه‌فاو دڵسووزی ئه‌و پياوه‌ ئه‌را كيشه‌ی ملله‌ته‌گه‌ی.

يه‌دوڵڵا كه‌ريم فه‌يلی

ج . أ