گه‌ناته‌كارى ئمڕوو نیه‌وگه‌ ده‌سپیچگ تاوانه‌یل سته‌مكار دویه‌كه‌

شفق نيوز

كیشن ئه‌را رووژگار گوزه‌یشت و ئاره‌زوومه‌ندن ئه‌و وه‌خته‌یله‌ دوباره‌ بایگه‌وه‌و خاسیه‌یلى تیرنه‌ هویر له‌وه‌ختیگ ئى واقعه‌ دوینن و به‌راورد‌ى كه‌ن وه‌ل رووژگار ئه‌وسایا له‌ڕوى ئاسایش و كیشه‌و گرفته‌وه‌، یا له‌ڕوى ئه‌وه‌ك ده‌وڵه‌ت وه‌پیا گوزه‌ر ئه‌كا له‌ هووكاره‌یل گه‌ناته‌كارى و چوین عراقى له‌یوا وه‌پى هاتگه‌ یا ئه‌وه‌سه‌ له‌وه‌ر مه‌ترسى هه‌یوایگ یا زندانى بویه‌ له‌ ماڵه‌گه‌ى خوه‌ى و كه‌فته‌سه‌ ناونى مردن و ژیانیگ  ئارام و ئاسایش.

فره‌كه‌س دگان وه‌ ڕاسیا نه‌ن و شانازى كه‌ن، ك مه‌سه‌له‌ى له‌سێداره‌داین یا كوشتن و زندانى له‌ سه‌رده‌مه‌یل وه‌رین و قوربانى جه‌نگه‌یل، گشت ئه‌یانه‌ وه‌یه‌كه‌وه‌ ره‌سیه‌ ده‌یه‌ها یا سه‌ده‌ها هه‌زار، وه‌لى ئمڕوو دوینید گشت ڕووژیگ ده‌یه‌ها كه‌س و جار له‌یوایشه‌ هه‌س وه‌ سه‌ده‌ها له‌ناونى شه‌هید و زه‌خمدار و ڕفیاگ و كوشیاگ و كووچ وه‌پیكریاگ و باركریاگ وه‌رده‌وام كه‌فیگه‌وه‌، بیگومان یه‌یش راسییه‌و دروو نیه‌، چوینكه‌ ئاسایش نیه‌و خوین ڕشاننه‌و مه‌ترسى فره‌یگ وجوود دیریگ ئه‌را ئاده‌میزاد، وه‌ل ئه‌وه‌یشا گه‌ناته‌كارى بویه‌سه‌ بنه‌ماو ده‌سپاكى كه‌مه‌و كیشه‌و گرفت زیاتره‌و بویه‌، له‌ هه‌مان وه‌خت دوینید ئمڕوو ئازادى گومه‌ جویر سه‌رده‌مه‌یل وه‌رین، وه‌لى غه‌ڵه‌ته‌ به‌راورد یا مقارنه‌ى غه‌ڵه‌ت وه‌ غه‌ڵه‌ت بكریه‌یگ وه‌ شوه‌یگ نا مه‌نتقى، چوینكه‌ به‌عزه‌ كه‌سه‌یلیگ هه‌ق ڕه‌فتار خاس ده‌نه‌ گوزه‌یشته‌و مردن مه‌ردم له‌ى رووژه‌یله‌ كه‌نه‌ ده‌سپیچگ ئه‌را رووژه‌یل گوزه‌یشت سه‌رده‌م وه‌رین، وه‌ل ئه‌وه‌یشا گه‌ناته‌كارى حزبه‌یل یا بڕیگ له‌لیان و بڕیگ له‌ ده‌زگایه‌یل ده‌وڵه‌ت مه‌عناى ئه‌وه‌ نیه‌ گشت ده‌زگایه‌یل بگریگه‌وه‌و قه‌بوول كریه‌یگ، یا گومبوین دیموكراسى له‌ى رووژگاره‌ مه‌عناى پیرووزى سته‌مكارى رووژه‌یل گوزه‌یشته‌ نیه‌، یا رفانن هاووڵاتى له‌لایه‌ن میلیشیایه‌یل فڵانه‌ حزب مه‌عناى خاسكردن و په‌سه‌نى ده‌زگایه‌یل ئاسایش وه‌رین نیه‌.

بیگومان ئاده‌میزاد هه‌ر ئاده‌میزاده‌، ك قیمه‌دارترین چشته‌ له‌ى جه‌هانه‌و خاسترین و جوانترین و په‌سه‌نترین دروسكریاگه‌ له‌ناونى دروسكریاگه‌یل خودا. ئمجا به‌دبه‌ختى ئیسه‌ مه‌عناى ده‌وڵه‌مه‌نى گوزه‌یشته‌ نیه‌. هه‌ر له‌وه‌ر ئه‌وه‌یش به‌راورد یا مقارنه‌ى راسه‌قینه‌و له‌بان بنه‌ماى خاس و دروسیگ بایه‌سه‌ وه‌و جووره‌ بكریه‌یگ ك گوزه‌یشته‌ چوین بویه‌و ئیسه‌ چوینه‌. ئیسه‌ با هویر له‌وه‌ بكه‌یم ك ئه‌را ئاینده‌ چه‌ بكه‌یم، با بزانیم چه‌ له‌سیاسه‌ت توایم، له‌ ئابوورى، له‌ رووشنهویرى و گشت مه‌یدانه‌یل تر ژیان، بائیسه‌ ریك بكه‌فیم له‌بان ئه‌وه‌ك چوین ئه‌وه‌ك توایمنه‌ى باریمنه‌ى دى، با ریك بكه‌فیم له‌بان ئه‌وه‌ك گشت سه‌رده‌میگ گوزه‌یشته‌ خاسى و خراوى خوه‌ى داشت، با ده‌رد رووژگار گوزه‌یشت له‌هویره‌و بووه‌یم و خودا پشتگیر عراقیه‌یل بوود.